Ang Kaalam ni Solomon 15
15
Nagahatag ang Matuod nga Dios sang Kabuhi nga Nagapadayon
1Pero ikaw nga amon Dios maluloy-on, matuod kag mapinasensyahon. Imo ginagamhan sing may kaluoy ang kalibutan. 2Bisan pa nga makasala kami, sa gihapon imo kami tungod kay nahibaluan namon ang imo gahom. Kag tungod kay amon nahibaluan nga imo kami, indi kami magpakasala. 3Ang pagkilala sa imo amo ang himpit nga pagkamatarong. Ang pagkilala sang imo gahom amo ang pagsugod sang kabuhi nga nagapadayon. 4Wala kami ginpatalang sang malaut nga kinaadman sang tawo, ukon sa wala pulos nga butang nga ginpintahan sang pintor, ukon sang bisan ano nga diosdios nga ginpintahan sang nanarisari nga kolor. 5Ang pagtan-aw sa sini nga mga butang nagapukaw sang balatyagon sang buangbuang nga mga tawo kag nagatulod sa ila sa paghandom sang isa ka walay kabuhi nga imahen. 6Ang tawo nga nagabuhat sini nga butang, ukon nagahandom kag nagasimba sa sini nga mga butang, nagahigugma sa kalautan kag nagaani sang nagakaigo suno sa iya ginalauman.
Ang Kabuangan sang Pagsimba sa Lunang nga mga Diosdios
7Ang maninihon nagadihon sing mahumok nga lunang kag mainamdamon nga nagahimo sang tagsa ka butang suno sa aton pagagamitan. Ang iban niya nga mga hinimuan mapuslanon kag ang iban indi mapuslanon, pero ini tanan nahuman niya sa amo man nga lunang, kag iya ini gindihon sa amo man nga paagi. Ang maninihon mismo ang nagapat-od kon ano ang iya pagabuhaton kag kon para sa ano ang gamitan sini. 8Sia man tawo nga gindihon gikan sa duta unauna lamang sa iya mga ginbuhat, kag sa tapos ang malip-ot nga tinion, iya ibalik ang kalag nga ginpahulam sa iya, kag magabalik sia sa amo man nga duta nga iya ginhalinan. Tawo sia, pero iya ginausikan ang iya pagpangabudlay sa pagdihon sang walay pulos nga diosdios gikan sa amo man nga lunang nga iya ginakuhaan sa pagbuhat sang mga kolon. 9Ang iya kabuhi malip-ot kag sa indi madugay mapatay sia, pero wala niya ginatalupangod ini. Ginakompetensyahan niya ang mga nagadihon sa bulawan, pilak kag bronsi kag nagahimo sia sang mga butang pareho sang ila paghimo. Ginapabugal niya ang mga butang nga iya ginapanghimo, pero ini sila mga bugos. 10Ang iya tagipusoon nahuman sa abo. Ang iya paglaom mas barato pa sang sa yab-ok. Ang iya kabuhi indi magmahal sang sa lunang nga iya ginadihon, 11tungod kay wala niya makilala ang Dios nga nagdihon sa iya, ang Dios nga naghatag sa iya sang buhi nga kalag kag buhi nga espiritu. 12Daw hampanganan ang iya pagbanta sang kabuhi, isa ka tiendahan sa diin sia makaganansya. Nagapati sia nga magatipon sia sang kwarta bisan pa nga himuon niya ini sa malaut nga mga paagi. 13Ining maninihon nga nagabuhat sang mga diosdios kag madali mabuong nga mga kolon gikan sa lunang, mas nakahibalo sang sa iban nga nagapakasala sia.
Ang Pagsilot sa mga Ehiptohanon
14Pero ang pinakabuang sa tanan nga mga tawo nga ang panghunahuna mas manubo pa sang sa iya sang mga lapsag, amo ang mga kaaway nga nagapigos sang imo mga tawo, O Ginoo. 15Naghunahuna sila nga ang ila tanan nga mga imahen mga dios, bisan pa nga may mga mata ini pero indi makakita, wala nagaginhawa bisan pa may mga ilong, indi makabati bisan pa may mga dulonggan, indi makabatyag bisan pa may mga tudlo, kag indi makalakat bisan pa may mga tiil. 16Ang tawo nga ang iya espiritu hinulaman lang naghimo sa ila. Wala sing tawo nga makabuhat sang isa ka dios nga kaparehas sang tawo. 17Ang tagsa ka tawo mapatay sa madali man ukon sa madugay, pero ang binuhatan sang tawo nga may malaut nga mga kamot patay na nga daan halin sa ginsugoran. Ang tawo mas maayo sang sa iya ginasimba kay sia buhi, pero ang iya ginasimba patay kag wala gid ini sang kabuhi halin sang una. 18Ining mga tawo nagasimba sang makangilil-ad kag wala sing alam nga mga sapat. 19Sa ila nga pagkasapat, wala gid ini sang katahuman nga sarang makatulod sa tawo sa paghandom sa ila. Ginligaran sila sang Dios mismo sang ginpakamaayo kag ginbendisyunan niya ang iban nga mga tinuga.
Currently Selected:
Ang Kaalam ni Solomon 15: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012