Ang Kaalam ni Solomon 14
14
Ang Pagpaanggid sa mga Diosdios nga Kahoy sa Arka nga Kahoy ni Noe
1Sa amo man nga paagi, ang tawo nga nagahanda sa pagpanakayon sa mabalod nga kadagatan nagapangayo sing bulig sa isa ka kahoy nga indi subong kapag-on sang barko nga iya pagasakyan. 2Ang barko ginbuhat sang tawo sa tuyo nga maganansyahan kag ang panday nagabuhat sini sing mainamligon. 3Pero ang imo pagbantay, O Amay, amo ang nagatimon sini. Imo ini ginapaagi sa hilway nga alagyan sa mabalod nga kadagatan. 4Ang mga tawo bisan nga indi batid sa dagat nagapanakayon tungod kay ikaw ang sarang makaluwas sa ila sa katalagman. 5Imo kabubot-on nga ang mga butang nga imo gintuga paagi sa imo kaalam dapat pagagamiton. Gani ang mga tawo makapanakayon sa dagat paagi sa sakayan kag makalambot sila sang dungkaan nga indi sila maano, tungod kay ginasalig nila ang ila kabuhi sa sinang diutay nga bahin sang kahoy.
6Amo ini ang natabo sadto anay sang ang mga kaliwat sang mga bugalon nga mga higante nga nagaamat-amat kalamatay. Ang paglaom sang kalibutan nagdangop sa isa ka arka sa idalom sang imo pagtuytoy kag ginbilin sa kalibutan ang bag-o nga kaliwatan sa pagpadayon sang mga katawhan. 7Ginbendisyunan ang arka nga kahoy ni Noe agod nga mabuhi ang mga matarong, 8pero ang pagpakamalaut yara sa mga diosdios nga ginbuhat sang tawhanon nga mga kamot. Ang pagpakamalaut nanginyara man sa nagbuhat sini tungod kay ginhimo niya ini kag ining nagakadunot nga butang ginatawag niya nga dios. 9Ginakangil-aran sang Dios ang di-diosnon nga mga tawo kag ang mga diosdios nga ila ginbuhat, 10dayon iya pagasilutan ining mga naghimo kag ang ila mga hinimuan. 11Gani, pagahukman sang Dios ang mga diosdios bisan pa nga ginbuhat ini gikan sa tinuga sang Dios, tungod kay nahimo ini nga makangilil-ad nga mga butang nga nanginsiod sa mga kalag sang mga tawo nga buangbuang.
Ang Gingikanan sang Pagsimba sa mga Diosdios
12Ang sala sa pagpakighilawas nagsugod sa tion nga ginbuhat ang mga diosdios. Gindagtaan nila ang kabuhi sang tawo halin sang tion nga ginbuhat ini. 13Wala ini sila sa ginsugoran kag indi sila magpadayon sa wala sing katapusan. 14Nanginyari sila sa kalibutan tungod sang tawhanon nga bugal kag tungod sini ang madali nga pagkadula nila ginplano na nga daan.
15May isa anay ka amay nga nagpangalisod sing tuman tungod sang temprano nga kamatayon sang iya anak, gani nagbuhat sia sang imahen sining iya anak nga sa hinali ginkuha sa iya. Dayon iya ginpasidunggan ang isa ka patay nga tawo kasubong sang isa ka dios, kag ginpaalinton niya sa iya mga sakop ang isa ka likom nga mga bulohaton kag mga seremonya. 16Samtang nagaligad ang mga panahon, ining di-diosnon nga pagbinatasan nagbakod nga nagbakod, tubtob nga sang ulihi nahimo ini nga kasugoan kag ang mga manuggahom nagmando nga simbahon ang mga diosdios. 17Kon ang mga sakop nagaestar nga malayo gid sa hari nga ila luyag dayawon, pero indi sila makabuhat sini sa iya atubang, ginapanan-aw nila ang iya hitsura kag nagabuhat sila sang imahen sining hari nga ila ginapasidunggan. 18Ang daku nga handom sang naghimo sining imahen nagpalapnag sa tiko nga pagsimba sini, bisan sa mga tawo nga wala gani makakilala sa hari. 19Ang manugbuhat ayhan luyag magpahumuot sa hari, gani iya himuon nga ang iya nabuhat nga imahen mas matahom pa sang sa hari mismo. 20Dayon ang mga tawo maganyat sang matahom nga imahen sa bagay nga ang hari nga sadto anay ila ginadayaw mangin imahen nga ila ginasimba. 21Gani ini tanan manginmakamamatay nga siod tungod kay ang mga tawo nga nagapangalisod, ukon sa idalom sang pagginahom sang hari, magahatag sang pagdayaw sa mga bato kag kahoy sa baylo sa Isa lamang ka Dios.
Ang Resulta sang Pagsimba sa mga Diosdios
22Ang isa ka butang nagpadulong sa isa pa gid ka butang. Indi tuman nga magsayop ang ihibalo natungod sa Dios. Ang mga tawo nagkabuhi sa magamo nga pagginawi, pero ila ini gintawag nga paghidait tungod sang ila kulang nga paghibalo. 23Ginpamatay nila ang mga kabataan sa ila hilikuton agod sa patilaw sang bag-o nga mga sumolunod, nagsaulog sang likom nga mga misteryo kag naghiwat sang seremonya nga naupdan sang mga pagbinastos kag wala nagakaigo nga mga bulohaton. 24Tungod sini wala na sing pagkaputli ang ila kabuhi ukon pag-asawahay. Ang isa ka tawo nagapatay sa isa paagi sa pagluib ukon nagahatag sang kalisod paagi sa pagpanginbabayi sa asawa sang isa. 25Ang tanan nanginmagamo tungod sang maduguon nga pagpamatay, pagpangawat, pagdaya, kagarukan, pagluib, kagamo, binutig, 26pagtublag sa inosente nga mga tawo, di-mapinasalamaton, pagmudmod sang moralidad, sala sang tawhanon nga kinaugali, ang pagkaguba sang pag-asawahay, pagpanginbabayi kag pagpanginlalaki, kag pagpakighilawas. 27Ang pagsimba sa mga diosdios nga ang ila mga ngalan indi dapat ihambal amo ang ginsugoran kag katapusan, ang kabangdanan kag ang bunga sang tagsa ka kalautan. 28Ang mga tawo nga nagasimba sa ila madulaan sing pagpugong sang ila kaugalingon sa kalipay, ang mga kabutigan ginabilang nila nga mga panagna. Nagakabuhi sila sing malaut kag ila ginalapas ang ila kaugalingon nga mga pulong nga wala sang pagpangduhaduha. 29Nagasumpa sila sa kabutigan nga wala nagapaabot sing silot tungod kay ang mga diosdios nga ila ginasaligan wala sang kabuhi. 30Pero pagasilutan sila tungod sa duha ka rason: nahauna, nakasala sila batok sa Dios sang nagsimba sila sa mga diosdios, kag ikaduha, diutay ang ila paghangad sa pagkabalaan kag tungod sini nagabinutig sila sa pagtiplang sa mga tawo. 31Sa pagpakasala sang mga di-matarong, pagapangitaon sila indi tungod sang gahom sang butang nga ila ginsumpaan kundi tungod sang silot nga nagakabagay sa mga makasasala.
Currently Selected:
Ang Kaalam ni Solomon 14: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012