Ang Kaalam ni Solomon 13
13
Ang Kabuangan sa Pagsimba sa mga Tinuga
1Ang bisan sin-o nga wala nagakilala sa Dios isa ka buangbuang. Ini nga mga tawo nagatan-aw sang maayo nga mga butang sa ila palibot, pero indi nila makita ang buhi nga Dios. Ila ginton-an ang mga butang nga iya ginhimo, pero wala nila ginakilala ang nagbuhat sini nga mga butang. 2Sa baylo, nagapati sila nga ang mga dios nga nagagahom sa kalibutan amo ang kalayo ukon hangin ukon bagyo ukon ang nagalibot nga mga bituon ukon nagadaganas nga mga tubig ukon ang mga bagay sa kalangitan. 3Nalipay gid ang mga tawo sa pagtan-aw sing katahom sining mga butang kag naghunahuna sila nga ini mga dios, pero ila kuntani talupangdon nga ini nga mga butang may agalon nga labaw pa sang sa ila tanan, tungod kay sia amo ang tagtuga sang katahom kag sang tanan nga mga butang. 4Tungod kay ang mga tawo nagkatingala sa gahom sini nga mga butang kag sang ila pagbinatasan, kuntani ang mga tawo magtuon paagi sa ila nga ang ila tagtuga sini mas gamhanan pa. 5Sa pagtalupangod naton sang pagkalapad kag sang pagkatahom sining mga tinuga, nagatuon man kita sang Manunuga sining mga butang.
6Pero ayhan tuman ka estrikto sa aton sa sini nga mga tawo. Ayhan luyag man nila masalapuan ang Dios pero indi nila sia sarang makita. 7Nalikupan sila sang mga hinimuan sang Dios sa bagay nga padayon ang ila pagtulok sa sini nga mga butang tubtob nga sang ulihi nahaylo sila nga ini nga mga butang amo ang mga dios tungod kay ang mga butang nga ila makita tama katahom. 8Pero sa gihapon ining mga tawo wala sing rason agod nga indi sila mabasol. 9Kon may ikasangkol sila sa paghibalo kag sa pagtukib nahanungod sang kinaugali sang kalibutan, ngaa bala nga wala gid nila masalapui ang Ginoo sang tanan nga mga butang?
Ang Kabuangan sa Pagsimba sa mga Diosdios
10Pero#Isa. 44:9-20; Jer. 10:1-6; Sul. Jr. 8-73. ang labing makaluluoy nga mga tawo amo yadtong nagalaom sa mga butang nga wala sing kabuhi, mga tawo nga nagasimba sa mga butang nga ginbuhat sang tawhanon nga mga kamot, kasubong sang mga imahen sang mga kasapatan nga nahuman sa bulawan kag pilak ukon sang mga wala sing pulos nga mga bato nga ginsinsil sang isa ka tawo sa nagliligad nga mga tinuig. 11Ang sampaton nga eskultor nagapulod sang nagakaigo nga kahoy, iya ini panitan nga may paghalong kag dayon sa iya sampaton nga kinaadman buhaton ini nga isa ka mapuslanon nga butang. 12Ang nabilin sa sining kahoy iya ginagatong sa pagluto sang iya pagkaon agod makapabusog sa iya. 13Pero may yara nga bahin sining kahoy nga indi mapuslan kay ayhan tiko ini kag napun-an sing mga gulodgulod nga bahin. Sa iya pagpahuwayhuway, iya ini gutibon sing maayo kag sa iya pagpulupatawhay buhaton ini nga imahen sang isa ka tawo, 14ukon sang isa ka indi mapuslan nga sapat. Iya ini pintahan sing bug-os sing pula agod makapulan ang mga depekto sini. 15Dayon ihanda niya ang nagakaigo nga bahin sang dingding sa diin iya ini ilansang. 16Ginahalungan niya nga indi ini mahulog tungod kay iya nahibaluan nga isa lamang ini ka diosdios kag nagakinahanglan sang bulig kay ang diosdios indi makabulig sang iya kaugalingon. 17Pero wala sia nahuya sa pagpangamuyo sa sining walay kabuhi nga butang para sa ila pag-asawahay, mga kaanakan kag mga pagkabutang. 18Maluya ang diosdios, pero iya sia ginapangamuyoan agod hatagan sia sang maayo nga lawas. Patay ini, pero nagapangamuyo sia sa sini agod nga hatagan sia sang kabuhi. Wala ini sing eksperiensya, pero nagapangamuyo sia sa sini nga buligan. Indi ini makalakat, pero sa sini nagapangamuyo sia sang isa ka madinalag-on nga pagpanglakaton. 19Wala sing gahom ang iya sini mga kamot, pero sa sini nagapangayo sia sang bulig para sa iya negosyo, sa pag-angkon sang kwarta kag sa iya trabaho.
Currently Selected:
Ang Kaalam ni Solomon 13: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012