Ang Kaalam ni Solomon 12
12
1Ang imo di-mamalatyon nga espiritu yara sa tagsa sa ila, 2gani imo ginasaway sing may kalulo ang mga nagapakasala batok sa imo. Ginapahanumdom mo sila sang ila ginabuhat kag imo sila ginapaandaman natungod sini agod nga ila bayaan ang ila malaut nga mga pagginawi kag magsalig sila sa imo, O Ginoo.
Ang mga Sala sang mga Taga-Canaan
3-4Imo#Deut. 12:31; 18:9-13. ginkangil-aran ang mga tawo nga nag-estar sadto anay sa imo balaan nga duta tungod kay nagbuhat sila sang makahuloya nga mga butang: nagpangabuhi sila sa tunga sang pagtuo sa mga engkanto kag nagbuhat sila sang yawan-on nga pagsimba, 5nagpamatay sila sang mga kabataan nga wala sing luoyluoy kag nagkaon sila sang lawas kag nag-inom sila sang dugo sang mga tawo. Nanginkatapo sila sa likom nga mga seremonya 6sa diin ginpamatay sang mga ginikanan ang ila wala sing mahimo nga mga kabataan. Kabubot-on mo nga ang amon mga katigulangan maglaglag sining mga tawo, 7agod nga ang duta nga imo ginpakamahal sa tanan nga kadutaan nagakabagay nga estaran sang imo mga tawo. 8Pero#Exo. 23:28. bisan sa sini, ginpakita mo ang imo kaluoy sa ila mga kaaway, tungod kay mga tawo lamang sila. Imo ginpadala ang mga putyokan una sa imo mga hangaway sa pagpamatay sa mga kaaway sa inanay. 9Kuntani ginpalutos mo sa mga matarong ang mga di-diosnon paagi sa inaway; imo kuntani sila ginpapas sa labing madali paagi sa talunon nga mga sapat ukon paagi sa isa mo lamang ka maisog nga pagmando. 10Pero sa pihak nga bahin imo ginbuhat sa inanay nga paagi ang imo pamatbat agod nga imo sila mahatagan sing kahigayunan sa paghinulsol, walay sapayan nga imo nahibaluan nga nagikan sila sa malaut nga kaliwat, nga mga malaut sila halin pa sang pagbata sa ila, kag indi nila pagbayluhan ang ila kaisipan. 11Ang bug-os nila nga pungsod ginpakamalaut halin pa sa ginsugoran, kag bisan pa nga wala mo sila ginsiluti tungod sang ila mga sala, ini wala nagakahulogan nga may nahadlukan ikaw.
Ang Dios Makagagahom
12Gintuga mo yadtong malaut nga mga tawo kag wala sing makapangapin sa ila ukon makabasol sa imo paglaglag sa ila. Wala ni isa nga makapangayo kaathagan sang imo ginbuhat ukon makapamatok sa imo paghukom. 13Ang tanan nga mga butang yara sa idalom sang imo pagtatap, kag wala sing iban pa nga dios nga imo mahatagan katarungan sang imo mga pamat-od. 14Wala sing hari ukon manuggahom sa duta nga sarang makasumbong sa imo nga wala nagakaigo ang pagsilot mo sa sining mga tawo. 15Matarong ikaw kag imo ginagamhan sing matarong ang tanan nga mga butang. Wala mo gingamit ang imo gahom sa pagkondenar sang tawo nga wala nagakabagay nga silutan. 16Ang imo kusog amo ang ginahalinan sang katarungan. Mapakita mo ang kaluoy sa tanan tungod kay ikaw ang Ginoo sang tanan. 17Ginapahayag mo ang imo kusog kon ang mga tawo magpangduhaduha sang imo himpit nga gahom, kag imo ginasilutan ang bisan sin-o nga nakahibalo sang imo gahom pero wala niya ini ginasapak. 18Bisan nga wala sing latid ang imo gahom, maluloy-on ikaw nga hukom. Sa imo luyag imo kami mahukman pero sa baylo imo kami ginagamhan nga naupdan sang daku nga pagpailob.
19Paagi sa imo mga buhat, gintudloan mo ang imo mga tawo nga ang matarong nga tawo dapat man magmaluloy-on. Ginhatagan mo sing daku nga paglaom ang imo mga tawo paagi sa pagtugot sa ila sa paghinulsol sang ila mga sala. 20Mainandamon kag mapailubon ikaw sa pagsilot sa mga kaaway sang imo mga tawo, bisan pa nga takos sila nga mapatay, imo sila ginhatagan sing kahigayunan sa pagbiya sang ila makasasala nga mga pagginawi. 21Pero estrikto ikaw sa paghukom sang imo mga tawo bisan pa nga nagbuhat ikaw sing mga kasugtanan sa ila mga katigulangan kag nagsumpa nga hatagan mo sila sing maayo nga mga butang.
22Sa pagkamatuod, ginasilutan mo kami, pero ang silot mo sa amon mga kaaway 10,000 ka pilo sang sa amon, agod nga sa amon paghukom sa iban, amon madumdoman ang imo kaayo kag sa tion nga pagahukman kami, magapaabot kami sang kaluoy.
Ang Pagsilot sa mga Taga-Ehipto
23Kag gani imo ginsakit ang mga buangbuang nga nagpangabuhi sing malaut, ginsakit mo sila paagi sa mga makahaladlok nga mga butang nga ila ginsimba. 24Nagpalayo sila sa kamatuoran kag ila ginsimba ang labing makahaladlok kag makangilil-ad nga mga sapat. Madali sila nga nahaylo kasubong sang magamay nga mga kabataan. 25Gani, imo sila ginsilutan tungod sang ila pagkahangag, kag ang imo paghukom nagbuhat sa ila nga daw mga buangbuang. 26Diutay yadto nga paghukom, pero ang mga wala nagpamati sa imo mga paandam nagakabagay sa pagbatyag sang tama kabug-at nga paghukom sang Dios. 27Sang silutan mo sila paagi sa sadto nga mga sapat nga ila ginkabig subong mga dios, naghinakit sila kag ila natalupangdan nga ang matuod nga Dios amo sia nga sa masunson ila ginpamatukan nga kilalahon. Gani nag-antos sila sang katapusan nga silot.
Currently Selected:
Ang Kaalam ni Solomon 12: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012