Ang Kaalam ni Solomon 11
11
Ang Kaalam Nagtuytoy sa mga Israelinhon pakadto sa Desierto
1Ang#Exo. 15:22–17:16. Kaalam nagdala sing kadalag-an sa mga Israelinhon paagi sa balaan nga propeta. 2Naglakat sila sa tunga sang desierto sa diin wala sing may nagaestar kag nagpatindog sila sang mga tolda sa mga lugar nga wala makadtuan sing tawo. 3Nagpangapin sila sang ila kaugalingon batok sa ila mga kaaway kag ginpangtabog nila ang mga ini. 4Sang gin-uhaw ang imo mga katawhan, O Ginoo, nagpanawag sila sa imo kag ginhatagan mo sila sing tubig nga nagtubod halin sa matig-a nga bato. 5Ang mga kalalat-an nga nagsilot sa mga taga-Ehipto nagluwas sang imo mga tawo sang yara sila sa ital-ital nga kahimtangan.
Ang Pagsilot sa mga Ehiptohanon
6-8Tungod kay yadtong mga kaaway nagmando sa pagpamatay sang tanan nga mga lapsag sang imo mga tawo, imo ginbayluhan sang dugo ang tubig sa ila mga suba.
Didto sa desierto ginpabatyag mo sing kauhaw ang imo mga tawo agod ila mabatyagan kon paano ang imo pagsilot sa ila mga kaaway. Kag dayon, sa wala nila ginpaabot, imo sila ginhatagan sing bugana nga tubig. 9Sang imo sila ginatilawan, bisan pa nga isa ini ka maluloy-on nga paghatag sa ila sang pagdisiplina, ila natun-an kon paano nimo ginasakit ang malaut nga mga tawo kon ginahukman mo sila sa imo kaakig. 10Imo gintilawan ang imo mga tawo, subong nga ang mga ginikanan nagatilaw sa ila mga anak, agod mapaandaman sila. Pero imo ginhukman ang ila mga kaaway kasubong sang paghukom sang isa ka estrikto nga hari kag ginkondenar sila. 11Nag-antos sila bisan malapit sila ukon malayo man sa imo mga tawo. 12Doble ang ila kalisod kag nagpanghakroy sila kon ila madumdoman ang nagliligad nga mga hitabo. 13Sang ila mahibaluan nga ang ila silot para sa kaayuhan sang imo mga tawo, ila natalupangdan nga ini tanan imo mga hinimuan, O Ginoo. 14Ang mga taga-Ehipto nagpanghiwala sang ila ginbuhat sa tawo nga sang sia lapsag pa, ila ginhaboy kag ginbayaan, pero sa katapusan sang mga hitabo, natingala sila sa iya. Ang matarong wala gid nag-antos sing kauhaw pareho sang ila nabatyagan.
15Ang#Exo. 8:1-24; 10:12-15. ila kalaut nagtiplang sa ila sa binuang nga mga panghunahuna, gani nagsimba sila sa mga man-og kag sa iban nga makangilil-ad nga mga sapat, mga tinuga nga indi makapangatarungan. Tungod sini, imo sila ginsilutan paagi sa sining minilyon nga mga kasapatan, 16kag imo sila gintudloan nga ang tawo ginasilutan suno sa sala nga ila ginahimo. 17O Ginoo, tungod sang imo daku nga gahom gintuga mo ang kalibutan gikan sa wala sing porma nga mga butang. Mahapos para sa imo ang pagsilot sa mga tawo paagi sa pagpadala sa ila sang mga oso ukon mabangis nga mga leon. 18Masarangan mo ang pagtuga sang bag-o kag makasiligni nga mga sapat nga nagabuga sang kalayo ukon nagangurob kag nagadala sang mangitungito nga aso ukon makapagwa sang makahaladlok nga mga igpat gikan sa ila mga mata. 19Masarangan mo man ang pagtuga sang mga sapat nga indi na kinahanglan sila magsalakay sa mga tawo kundi nga sa ila pagtulok tuman na nga makapahadlok sa ila tubtob sila mapatay. 20Pero indi na ini kinahanglan. Kuntani imo sila ginhingabot paagi sa imo pagkamatarong kag imo sila ginpamatay paagi sa paggamit sang diutay nga bahin sang imo gahom. Pero ginpili mo ang pagtakos, pag-isip kag pagtimbang sang tanan nga imo ginbuhat.
Ang Dios Gamhanan kag Maluloy-on
21Sarang mo mapahayag ang imo daku nga gahom sa bisan ano nga tion kon luyag mo kag wala sing sarang makapamatok sini. 22Sa imo panulok, ang bug-os nga kalibutan kasubong sang isa ka bilog nga balas nga indi makapahulag sang timbangan, isa ka tulo sang tun-og sa duta sa kaagahon. 23May tumbas ka nga gahom sa pagbuhat sang bisan ano, pero maluloy-on ikaw sa tanan; ginakalipatan mo ang amon mga sala kag ginahatagan mo kami sing tinion sa paghinulsol. 24Palangga mo ang tanan nga nagakabuhi; wala mo ginapakanubo ang bisan ano sang imo gintuga. Kon wala mo maluyagi ang imo mga gintuga, kuntani wala mo na lamang ini gintuga. 25Paano ang pagpadayon sang mga butang kon indi ikaw luyag? Paano ang pagpadayon sini kon wala mo ina gintuga? 26Gintugot mo nga magkabuhi ini, O Ginoo, tungod kay imo ini kag palangga mo ang tanan nga nagakabuhi.
Currently Selected:
Ang Kaalam ni Solomon 11: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012