Ang Kaalam ni Solomon 10
10
Si Adan Gin-apinan sang Kaalam
1Ang#Gen. 1:26-28. Kaalam nag-apin sang amay sang kalibutan, ang nahauna nga tawo nga gindihon sang sia pa lamang ang natuga. Ang Kaalam nagluwas sa iya gikan sa iya malaut nga buhat 2kag ginhatagan sia sing kabakod sa paggahom sang tanan nga butang sa duta.
Si Cain Nagbiya sang Kaalam
3Pero#Gen. 4:8-13. may di-matarong nga tawo nga nagbiya sang Kaalam; ginlaglag niya ang iya kaugalingon paagi sa pagpatay sang iya utod tungod sa kaakig.
Ang Kaalam Nag-apin kay Noe
4Tungod#Gen. 7:1–8:22. sina nga sala, gin-anaw ang kalibutan pero ang Kaalam nagluwas sini liwat. Gintuytoyan niya ang matarong nga tawo sa iya mahuyang nga sakayan nga nahuman sa kahoy.
Ang Kaalam Nagbulig kay Abraham
5Sa#Gen. 11:1-9; 12:1-3; 22:1-19. tion nga napaslawan ang mga pungsod sa ila malaut nga mga tinutuyo, ang Kaalam nagkilala sang matarong nga tawo kag iya sia ginhuptan nga inosente sa atubang sang Dios. Ginhatagan sia sing kabakod sa pagtuman sang sugo sang Dios walay sapayan sang iya pagpalangga sa iya kaugalingon nga anak.
Ang Kaalam Nagluwas kay Lot
6Ang#Gen. 19:1-29. Kaalam nagluwas sa matarong nga tawo samtang nagakamatay ang di-diosnon nga mga tawo. Iya nalikawan ang kalayo nga naglaglag sang Lima ka mga Siudad. 7Makita mo pa ang palatandaan sang ila kalautan. Ang duta didto nagaaso kag lamgod. Ang mga tanom nagapamunga pero wala nagakaluto, kag makita ang haligi nga asin subong palatandaan para sa isa ka tawo nga wala nagtuo. 8Ang mga tawo sadto nga mga siudad nagsikway sang Kaalam kag indi sila makahibalo sa pagkilala kon sa diin ang maayo kag malain. Kag indi lamang ina, kundi ang mga guba sang ila siudad nagapahanumdom sa aton sang kabuangan sang ila pangabuhi agod nga indi malipatan ang ila mga kapaslawan. 9Ang Kaalam, sa pihak nga bahin, nagluwas sang iya mga alagad sa katalagman.
Ang Kaalam Nag-apin kay Jacob
10Sadto#Gen. 27:43; 28:10-22; 32:24-30. anay, ang isa ka matarong nga tawo nagpalagyo sa kaakig sang iya utod kag ang Kaalam nagtuytoy sa iya sa matadlong nga dalan. Ginpakita sang Kaalam sa iya ang ginharian sang Dios kag gintugot sa iya ang paghibalo sang balaan nga mga butang.#10:10 balaan nga mga butang: ukon mga anghel. Ang Kaalam nagbuhat sa iya nga magmadinalag-on kag mainuswagon sa iya trabaho. 11Ang mga sakon luyag kuntani magkuha sang iya pagkabutang, pero ang Kaalam nagbulig sa iya kag nagbuhat sa iya nga magmanggaranon. 12Gin-apinan sia sang Kaalam batok sa iya mga kaaway nga nagahulat sang kahigayunan sa pagsalakay sa iya. Ang Kaalam nagpadaog sa iya sa lapuyot nga inaway agod nga iya matalupangdan nga wala sing iban nga nagapabakod sa tawo luas sa pag-alagad sa Dios.
Ang Kaalam Nagluwas kay Jose
13Sadto#Gen. 37:12-36; 39:1-23; 41:37-44. anay, ang matarong nga tawo ginbaligya sa pagkaulipon, pero ang Kaalam wala magbiya sa iya. Ginluwas niya sia sa sala. Nag-upod sa iya ang Kaalam sa prisuhan, 14kag wala ini magbiya sa iya tubtob nga iya sia ginhatagan sing gahom sa pagdumala sang ginharian kag sa pagbuhat sa iya nga manugdumala sang mga tawo nga sadto anay nagpigos sa iya. Ginpakilala sang Kaalam nga binutig ang panumbongon batok sa matarong nga tawo kag iya sia ginhatagan sang walay katapusan nga kadungganan.
Ang Kaalam Nagpagwa sang mga Israelinhon gikan sa Ehipto
15Sadto#Exo. 1:1–15:21. anay, ang Kaalam nagluwas sang mga inosente kag balaan nga mga tawo gikan sa ila mga manugpigos. 16Nagsulod sia sa kalag sang isa ka alagad sang Dios kag nagpangatubang sia sa ginakahadlukan nga mga hari paagi sa pagbuhat sang mga milagro. 17Ginbalusan niya ang mga tawo sang Dios tungod sang ila mga kabudlayan. Gintuytoyan niya sila sa isa ka pagpanglakaton nga napun-an sang katingalahan. Ginhatagan niya sila sing handong kon adlaw kag sang masanag nga mga bituon kon kagab-ihon. 18Ginpaagi niya sila sa madalom nga tubig sang Mapula nga Dagat, 19pero iya ginlumos ang ila mga kaaway kag ang ila mga bangkay sini ginpangdagsa sa higad sang baybay. 20Kag gani ginpanguha sang mga matarong ang mga pagkabutang sang mga di-diosnon. O Ginoo, nag-amba sila sa imo balaan nga ngalan, nagdayaw sila sing tingob sa imo tungod kay imo sila gin-apinan. 21Ang Kaalam nagpahambal sa mga apa kag iya gani ginpahambal sing maathag ang mga lapsag.
Currently Selected:
Ang Kaalam ni Solomon 10: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012