Ang Kaalam ni Solomon 9
9
Si Solomon Nagpangayo sang Kaalam
1“O#1 Hari 3:6-9; Klm. Sol. 7:7. Dios sang akon mga katigulangan kag maluloy-on nga Ginoo, gintuga mo ang tanan sa imo lamang pulong. 2Tungod sang imo Kaalam gintuga mo ang tawo nga maggahom sang tanan nga mga tinuga, 3sa pagdumala sang kalibutan sa pagkabalaan kag pagkamatarong, kag maghatag sang hustisya nga may katampad. 4Hatagi ako sing Kaalam nga nagapungko sa kilid sang imo trono; hatagi ako sang lugar upod sa imo mga kabataan. 5Ulipon mo ako kag kasubong sang akon iloy sadto anay. Tawo lamang ako. Maluya ako kag malip-ot ang akon kabuhi. Diutay ang akon paghangop sang Kasugoan kag kon paano ang paggamit sini. 6Bisan pa nga himpit ang tawo, pagakabigon sia nga manginwala sing pulos kon wala sia sing Kaalam nga nagikan sa imo. 7Ginpili mo ako sa tunga sang kadam-an nga manginhari sang imo mga tawo agod maghukom sang imo mga anak nga lalaki kag mga anak nga babayi. 8Ginsugo mo ako sa pagpatindog sang templo sa imo balaan nga bukid, sang altar sa Jerusalem, ang siudad nga ginpili mo nga mangin-imo ilistaran. Larawan ini sang langitnon nga templo nga imo ginhanda halin sa ginsugoran. 9Ang Kaalam nagaupod sa imo kag nakahibalo sia sang imo mga buhat; yara sia sang pagtuga mo sang kalibutan. Iya nahibaluan ang makapahamuot sa imo, kon ano ang matarong suno sa imo mga sugo. 10Ipadala sia gikan sa balaan nga kalangitan halin sa imo mahimayaon nga trono agod nga magpangabudlay sia upod sa akon kag agod matun-an ko kon ano ang makapahamuot sa imo. 11Tungod kay iya nahibaluan kag nahangpan ang tanan, iya ako matuytoyan nga may kaalam sa akon mga bulohaton. Ang iya himaya magaapin sa akon. 12Dayon akon hukman sing nagakaigo ang imo mga tawo, kag mangintakos ako sang trono sang akon amay. Pagabatunon ang akon mga binuhatan.
13“Sin-o ang magatuon sang kabubot-on sang Dios? 14Ang tawhanon nga ihibalo indi tumbas sa paghibalo kag ang aton mga pangatarungan nagapatalang sa aton, 15tungod kay ang aton mamalatyon nga mga lawas nagapaluya sang aton mga kalag. Ang lawas umalagi nga balay nga nahuman sa duta, isa ka lulan sang mapagsik nga panghunahuna. 16Ang aton mabuhat amo ang pagpakutpakot sang mga butang sa kalibutan, aton tinguhaon ang pagtuon sang mga butang nga malapit sa aton. Sin-o karon ang sarang makalaom nga iya mahangpan ang langitnon nga mga butang? 17Wala sing bisan sin-o nga makahibalo sang imo binubuot, kon indi mo anay sia paghatagan sang Kaalam kag ipadala sa iya ang imo espiritu santo. 18Sa sini nga paagi, ang mga tawo sa kalibutan ginbutang sa matadlong nga dalan. Nakahibalo sila sang imo nahamut-an kag ginluwas sila sang Kaalam.”
Currently Selected:
Ang Kaalam ni Solomon 9: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012