Tobit 8
8
Ang Pagtabog sa Demonyo
1Sa tapos sila makakaon kag daw tion na sa pagtulog, gindala sang mag-asawa si Tobias sa hulot-tululogan. 2Nadumdoman ni Tobias ang ginsiling sa iya ni Rafael, gani iya ginkuha ang atay kag tagipusoon sang isda gikan sa iya binagtong. Ginsugba niya ini sa nasunog nga insyenso. 3Ang baho nagtabog sa demonyo kag nagpalagyo ini sa Ehipto.#8:3 EHIPTO: Ginhunahuna sang una nga ang Ehipto amo ang pinakamalayo nga lugar sang kalibutan kag ilistaran sang mga demonyo kag malaut nga mga espiritu. Ginlagas sia ni Rafael didto kag gingapos ang iya mga tiil kag mga kamot.
Ang Pangamuyo ni Tobias
4Sang sila na lang nga mag-asawa didto sa kwarto, nagbangon si Tobias kag nagsiling sa iya asawa, “Palangga, magbangon ka. Mangamuyo kita sa Ginoo nga iya kita kaluoyan kag bantayan.” 5Gani nagbangon si Sara agod nga makabuylog sa pangamuyo sang iya bana nga bantayan sila sang Dios. Si Tobias nagpangamuyo:
“Dalayawon ka, O Dios, sang amon mga katigulangan.
Pagdayawon ang imo ngalan sa walay katubtoban.
Dayawon ka sang tanan nga mga tinuga sa langit kag sa duta.
6Imo gintuga si Adan kag imo ginhatag sa iya si Eva
nga mangin-iya asawa, salaligan kag kabulig.
Nanginginikanan sila sang bug-os nga katawhan.
Nagsiling ka, ‘Indi maayo nga mag-isahanon ang tawo.
Hatagan ko sia sing kabulig.’
7Ginoo, ginpili ko si Sara indi tungod sang unodnon nga handom
kundi tungod nga ini matarong.
Kaluoyi kami kag itugot nga magkabuhi kami sing malawig.”
8Dayon nagsiling sila, “Amen” 9kag naghigda sila sa pagtulog.
Ang Mabinalak-on nga mga Ginikanan
Sang madalom na ang kagab-ihon, gintawag ni Raguel ang iya mga suloguon kag ulupod sila nga naggwa sa pagkutkot sang lulobngan. 10Naghunahuna sia sa iya kaugalingon, “Ayhan mapatay man si Tobias kag ang mga tawo magakadlaw kag magyaguta sa amon.” 11Sang matapos nila ang pagkutkot sang lulobngan, nagpauli si Raguel kag nagsiling sa iya asawa, 12“Ipatan-aw sa isa sang mga suloguon nga babayi kon bala buhi pa si Tobias. Kon patay na sia, ti aton sia ilubong sa wala pa sing may nakahibalo.” 13Gani ginsugo nila ang isa sang mga suloguon nga babayi nga may dala nga suga sa pagtan-aw kon buhi pa si Tobias. Sang maabrihan sang suloguon ang pwertahan sang hulot iya nakita nga nagakatulog sing mahamuok ang mag-asawa. 14Gani, nagbalik gilayon ang suloguon kag ginpahibalo niya si Raguel kag si Edna nga si Tobias buhi kag wala man sia maano. 15Dayon si Raguel#8:15 Raguel: Ang iban nga mga manuskrito maysila. nagdayaw sa Dios sang langit nga nagasiling:
Ang Pangamuyo ni Raguel
“Dalayawon ka, O Dios.
Kabay pa nga dayawon ka sang imo mga katawhan sa walay katubtoban.
Kabay pa nga dayawon ka nila sa putli nga tagipusoon.
16Ginadayaw ko ikaw tungod kay ginlipay mo ako.
Nanginmaluloy-on ka sa amon
kag wala mag-abot ang akon gid ginkahadlukan.
17Takos ka sang amon pagdayaw, O Ginoo,
ginkaluoyan mo ining pamatan-on nga mag-asawa,
ang bugtong nga mga anak sang ila ginikanan.
Karon, itugot sa ila ang imo kaluoy kag pag-apin.
Hatagi sila sing malipayon nga pangabuhi nga napun-an sing paghigugma.”
18Dayon ginmanduan ni Raguel ang iya mga suloguon nga ila ulian ang lulobngan sa wala pa magpabanagbanag ang adlaw.
Ang Punsyon sang Kasal
19Si Raguel nagpangabay sa iya asawa sa pagluto sang madamo nga tinapay para sa daku nga punsyon. Dayon nagkuha sia sing duha ka mga baka nga toro kag apat ka mga karnero nga lalaki gikan sa iya panong. Ginpaihaw niya ini sa iya mga suloguon bilang handa para sa punsyon sang kasal. 20Ginpatawag niya si Tobias kag nagpanumpa,#8:20 nagpanumpa: Ang iban nga mga manuskrito maynagsiling. “Indi kamo anay magpauli sa sulod sang duha ka simana. Magpabilin kamo diri kay ululupod kita nga magkaon kag mag-inom. Maayo ini para sa akon anak sa tapos ang iya makakulogmat nga pag-antos. 21Pagkatapos sini, kuhaa ang katunga sang tanan ko nga pagkabutang kag magpauli ka sa imo mga ginikanan nga wala sing sablag. Ang katunga nga nabilin imo man panublion sa tapos kami mapatay ni Edna. Indi ka magpangduhaduha sang amon pagpalangga sa imo. Sugod karon anak namon ikaw subong nga anak namon si Sara. Sa sina mapasalig ko ikaw, anak ko.”
Currently Selected:
Tobit 8: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012