Tobit 7
7
Sa Balay ni Raguel
1Sang makasulod na si Tobias kag si Rafael sa siudad sang Ecbatana, si Tobias nagsiling, “Abyan Azarias, dalha ako dayon sa pagpakigkita kay Raguel.” Gani gindala sia sang anghel sa balay ni Raguel. Sa ila pag-abot, ila nakita si Raguel nga nagapungko sa pwertahan sang iya pasiyuhan. Ang duha naghatag sa iya sing katahuran kag si Raguel nagsabat: “Sulod kamo, mga abyan. Bukas ang akon balay para sa inyo.”
Ginpasulod sila ni Raguel sa iya balay 2kag si Raguel nagsiling sa iya asawa nga si Edna, “Indi bala nga ining pamatan-on daw pareho gid sang hitsura sang akon pakaisa nga si Tobit?”
3Nagpamangkot si Edna, “Sa diin kamo maghalin?”
Si Tobias kag si Rafael nagsabat, “Mga Israelinhon kami sa tribo ni Neftali, pero nagaestar kami nga mga bihag sa siudad sang Ninive didto sa Asiria.”
4Nagpadayon sa pagpamangkot si Edna, “Kon amo, kilala ninyo ang amon pakaisa nga si Tobit?”
Nagsabat ang duha, “Huo, kilala namon sia.”
Si Edna nagpamangkot liwat, “Kamusta sia?”
5Nagsabat sila, “Buhi sia kag maayo man.”
Nagpadayon si Tobias sa pagsiling, “Amay ko si Tobit.” 6Pagkabati sini ni Raguel, nagtindog sia kag sa nagatalangison sa daku nga kalipay, ginhakos si Tobias. 7Dayon nagsiling sia, “Bendisyunan ka sang Dios, anak. Maayo kag dungganon ang imo amay. Daw ano kasubo nga mabulag ang maalwan kag matarong nga tawo kasubong niya!” Ginhakos niya liwat si Tobias kag naghibi sa abaga sini. 8Si Edna nga iya asawa kag si Sara nga iya anak naghibi man tungod kay Tobit.
Sa pagpakita sang iya mainit nga pag-abiabi, si Raguel nag-ihaw sang isa ka karnero nga lalaki para kay Tobias kag kay Rafael. Sa tapos sila makapaligo kag sang madali na lang sila magkaon, namangkot si Tobias kay Rafael, “Abyan Azarias, san-o mo pa hambalon si Raguel nga pangasaw-on ko si Sara?”
9Pero ini nga pamangkot nabatian ni Raguel, gani nagsiling sia kay Tobias, 10“Magkaon kag mag-inom anay kamo. Magpangalipay kamo karon nga gab-i. May kinamatarong ka, Tobias, sa pagpangasawa kay Sara kag indi ako magtugot nga iban ang magpangasawa sa iya tungod kay ikaw ang pinakasuod ko nga pariente. Pero ipahibalo ko sa imo ang matuod anak, 11nga napakasal ko na si Sara sa pito ka mga lalaki nga aton tanan pariente. Tanan sila nagkalamatay sa gab-i sang ila kasal sang buot na sila magsulod sa hulot-tululogan. Pero karon, anak, magkaon ka kag mag-inom. Ang Ginoo magabantay sa inyo nga duha.”
Si Tobias nagsabat, “Indi ako magkaon ukon mag-inom sa wala pa nimo mahatag ang imo pasalig.”
12Gani si Raguel nagsabat, “Ginapasalig ko ikaw. Ipaasawa ko sa imo si Sara suno sa ginapatuman sang Kasugoan ni Moises. Ang Dios sa langit nagpakamaayo sini nga kasal gani batuna sia nga mangin-imo asawa. Sugod karon imo sia asawa kag ikaw iya bana. Mangin-imo sia sugod karon tubtob sa katubtoban. Kabay pa nga ang Ginoo sang langit magbantay sa inyo karon nga gab-i. Kabay nga kaluoyan kag buligan niya kamo.”
Ang Pagkasal
13Dayon gintawag ni Raguel ang iya anak. Sang makasulod si Sara, gin-uyatan sia ni Raguel sa kamot kag ginhatag kay Tobias. Kag nagsiling, “Batuna sia subong imo asawa suno sa ginatudlo sang Kasugoan ni Moises. Dalha sia sa balay sang imo amay. Kabay nga ang Dios sang langit maghatag sa inyo sing malipayon nga pag-asawahay.”
14Dayon nagpangayo sing papel si Raguel sa iya asawa. Sang nabaton niya ang papel, ginsulatan niya ini sang isa ka kasugtanan nga nagapamatuod nga si Sara nagpakasal kay Tobias suno sa Kasugoan ni Moises. 15Ang kasal ginsundan sang pagkinaon.
16Ginsilingan ni Raguel ang iya asawa, “Palangga, ihanda ang bakante nga hulot kag dalha didto si Sara.”
17Gani ginhanda ni Edna ang hiligdaan suno sa ginsiling sang iya bana kag gindala niya didto si Sara. Si Sara naghibi. Ginpahiran ni Edna ang mga luha sang iya anak kag ginsingganan, 18“Indi ka maghibi, anak. Napat-od ko nga ang Ginoo sang langit magahatag sa imo sing kalipay kag indi kasubo karon nga gab-i. Gani, magkalipay ka, anak.” Dayon naggwa si Edna sa kwarto.
Currently Selected:
Tobit 7: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012