Tobit 6
6
Si Tobias Nakadakop sang Isda
1Gani naglakat si Tobias kag ang anghel padulong sa Media. Gindala ni Tobias ang iya ido. Sa tapos ang isa ka adlaw nga pagpanglakaton, nagpahuway sila sa panghigaron sang Suba sang Tigris. 2Naglusong si Tobias sa suba sa paghugas sang iya mga tiil sang hinali lamang bumutwa ang isa ka daku nga isda kag gintinguhaan sini nga halunhonon ang pihak niya nga tiil. Nakasinggit si Tobias, 3kag ang anghel nagsiling sa iya, “Dakpa ina nga isda kag indi gid pagbuy-i!”
Gilayon nga gindakop ni Tobias ang isda kag iya ini ginguyod pakadto sa pangpang.
4Nagsiling ang anghel, “Lihapa ang isda kag kuhaa ang iya apdo, tagipusoon kag atay. Tagoa ini kay sarang ina magamit nga bulong, pero ihaboy ang mga tinai.”
5Gintuman ni Tobias ang ginsiling sang anghel. Dayon ginluto niya kag ginkaon ang bahin sang isda. Ang nabilin iya nga gin-asinan kag ila ginbalon.
Nagpadayon ang duha sa paglakat tubtob nga malapit na sila sa Media. 6Dayon si Tobias nagsiling, “Abyan Azarias, ano nga balatian nga sarang mabulong sining apdo, tagipusoon kag atay sang isda?”
7Ang anghel nagsabat, “Ang atay kag tagipusoon sarang masugba kag magatabog ini sang demonyo ukon sang malaut nga espiritu sa mga ginapaantos sini. Ang ginapaantos magaayo sa gilayon kag indi na gid sia pagbalikan sang demonyo. 8Ang apdo mabulong mo sa tawo nga harapon. Ihamlit lamang ini sa iya mata kag huypon ang labutlabot nga nagatabon kag makakita siya liwat.”
Sa Dalanon Pakadto sa Ecbatana
9Sang makasampot sila sa Media kag malapit na lang ang siudad sang Ecbatana, 10si Rafael nagsiling, “Abyan Tobias.”
Si Tobias nagsabat, “Ano ang luyag mo isiling?”
Si Rafael nagpadayon sa pagsiling, “Karon sa gab-i, magahigda kita sa balay sang imo pariente nga si Raguel. May bugtong ini sia nga anak nga si Sara 11kag tungod kay suod niya ikaw nga pariente, may kinamatarong ikaw sa pagpangasawa sa iya. May kinamatarong man ikaw sa pagpanubli sang tanan nga mga pagkabutang sang iya amay. 12Ini si Sara isa ka babayi nga may paghangop, maisog kag matahom gid. Ang iya amay maayo nga tawo. Karon sa gab-i hambalon ko ang iya amay sang imo tuyo sa pagpangasawa sa iya anak kag magapasugot sia nga ang iya anak mangin-imo asawa. Dayon, sa aton pagbalik gikan sa banwa sang Rages, hiwaton ta ang kasal. Indi gid magpamalibad si Raguel nga ipaasawa ang iya anak sa imo. Kag indi man sia magtugot nga iban nga tawo ang magpangasawa sa iya anak. Kon iban nga tawo ang pakaslan niya sa iya anak, ti mangintakos sia sang kamatayon suno sa Kasugoan ni Moises. Si Raguel nakahibalo nga ikaw lamang ang may kinamatarong sa pagpangasawa sang iya anak kag sa pagpanubli sang iya pagkabutang. Gani sunda ang akon panugyan. Karon sa gab-i, amon nga sugilanonan ni Raguel ini nga butang agod nga mahitso ang inyo pag-asawahay ni Sara. Sa aton pagbalik gikan sa banwa sang Rages dalhon naton sia pauli.”
13Dayon si Tobias nagsiling kay Rafael, “Abyan Azarias, nakabati ako natungod sa pito ka mga bana ni Sara nga nagkalamatay sa gab-i sang ila kasal. 14Suno sa sugid nga akon nabatian ini sila ginpamatay sang demonyo. Wala niya ginahalitan si Sara, pero iya ginapatay ang tagsa ka lalaki nga magpalapit kay Sara. Nahadlok ako sa sining demonyo. Bugtong ako nga anak sang akon mga ginikanan kag kon mapatay ako, manginkabangdanan ini sang ila man kamatayon. Wala na gani sila sing anak nga makalubong sa ila.”
15Ang anghel nagsabat, “Nalipatan mo na bala ang panugyan sang imo amay? Ginsilingan ka niya nga mangasawa ka sang isa ka babayi gikan sa inyo tribo. Gani, pamatii sing maayo ang akon igasiling. Indi ka magpalibog natungod sa demonyo. Pangasaw-a si Sara! Akon nahibaluan nga karon nga gab-i si Raguel magapasugot nga batunon ka ni Sara. 16Sa pagsulod mo sa kwarto, dalha ang tagipusoon kag atay sang isda. Isugba ini sa nasunog nga insyenso 17agod nga ang baho sini magtugob sang hulot. Sa pagpanimaho sini sang demonyo magapalagyo sia kag indi na gid sia magpalapit kay Sara liwat. Pero sa wala pa kamo maghulid, magpangamuyo kamo sa Ginoo sang langit, nga sia magkaluoy kag magbantay sa inyo. Indi ka magkahadlok. Gintalana na nga daan halin pa sa pagtuga sang kalibutan nga si Sara mangin-imo asawa. Luwason mo sia gikan sa gahom sang demonyo kag magaupod sia pauli sa imo balay. Ikaw kag si Sara pagabugayan sang madamo nga mga kabataan nga manginpalangga gid ninyo. Gani, indi ka magkahadlok!”
Ginpamatian sing maayo ni Tobias ang ginhambal ni Rafael. Iya nahibaluan nga si Sara pariente sang iya amay. Nagbatyag si Tobias sing paghigugma kay Sara kag ginhandom niya ang pagpangasawa sa iya.
Currently Selected:
Tobit 6: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012