Tobit 5
5
Paghanda sa Paglakat
1Gani si Tobias nagsabat sa iya amay, “Tumanon ko ang tanan nga ginsiling mo. 2Pero, paano ang pagkuha ko sang kwarta gikan kay Gabael? Wala gid kami magkitaay kag ano ang ipamatuod ko sa iya kon sin-o ako agod nga magsalig sia sa akon kag ihatag niya ang kwarta? Luas sini, indi ako makatultol sang alagyan padulong sa Media.”
3Nagsabat si Tobit, “May ginlagdaan kami nga kalig-unan. Dayon ginpihak ko ini sa duha ka bahin. Ang natuon sa iya ginbutang ko upod sa kwarta nga baynte na ka tuig ang nagligad! Gani karon, magpangita ka sang isa ka masaligan nga tawo nga makaupod sa imo pakadto sa Media halin diri kag pabalik. Aton sia bayaran sa inyo pagbalik diri. Pero kinahanglan nga makuha mo ang kwarta nga ginbilin ko kay Gabael.”
Nasugata ni Tobias si Rafael
4Naglakat si Tobias agod magpangita sing nakatultol sang dalan pakadto sa Media kag luyag mag-upod sa iya. Pagkagwa lang niya sa balay, nasugata niya si Rafael. Wala gid sing inalung-ong si Tobias nga si Rafael isa ka anghel sang Dios, 5gani si Tobias nagpamangkot sa iya, “Taga diin ka?”
Si Rafael nagsabat, “Isa ako ka Israelinhon kag malayo mo na nga pariente. Nagkadto ako diri sa Ninive sa pagpangita sing obra.”
Nagpamangkot si Tobias “Natultolan mo bala ang alagyan pakadto sa Media?”
6Nagsabat si Rafael, “Aba, huo. Nakakadto ako didto sing madamo na nga beses kag kabisado ko ang tanan nga mga alagyan padulong didto. Pirme ako nagadayon sa amon pariente nga si Gabael didto sa banwa sang Rages.#5:6 Rages: Sa GriegoEcbatana. Tungod kay ang Rages nahamtang sa ibabaw sang mga kabukiran, mga duha pa ka adlaw ang pagpanglakaton tubtob makaabot didto halin sa Ecbatana, ang kapital nga siudad.”
7Dayon si Tobias nagsiling kay Rafael, “Abyan, hulata ako diri. Masulod ako kag sugiran si tatay. Luyag ko nga updan mo ako pakadto didto kag bayaran ko man ikaw sang imo pag-upod sa akon.”
8Nagsabat si Rafael, “Sigi, magahulat ako, pero indi ka magdugay.”
9Nagsulod si Tobias kag ginsugid sa iya amay, “Nakakita ako sing isa ka Israelinhon nga magaupod sa akon pagpanglakaton.”
Nagsabat si Tobit, “Pasudla sia diri. Luyag ko mahibaluan kon sin-o ang iya pamilya kag sa ano nga tribo sia nagikan. Luyag ko man mahibaluan kon bala masaligan sia nga manginkaupod nimo.”
Pagkitaay ni Tobit kag ni Rafael
Gani naggwa si Tobias kag gintawag si Rafael, “Luyag si tatay magpakigkita sa imo.” Sang makasulod si Rafael, gin-abiabi sia ni Tobit.
Si Rafael nagtamyaw man kay Tobit, “Kabay pa nga yara ka sa maayo nga kahimtangan.”
Pero si Tobit nagsabat, “Bulag ako kag paano nga manginyara ako sa maayo nga kahimtangan? Daw pareho ako sang patay kag indi na ako makakita sang kasanag. Maayo pa nga napatay ako! Mabatian ko ang pagsinugilanon sang mga tawo, pero indi ko sila makita.”
Si Rafael nagsabat, “Magkalipay ka! Sa indi madugay ayuhon ka sang Dios. Indi ka magpangalisod!”
Dayon si Tobit nagsiling, “Ang akon anak nga si Tobias magalakat sa Media. Maupdan mo bala sia kag matudloan sang dalan pakadto didto? Pagabayaran ko man ikaw sang imo kabudlay.”
Nagsabat si Rafael, “Igakalipay ko ang pag-upod sa iya. Masunson nagakadto ako sa sina nga lugar kag kabisado ko ang mga alagyan sa mga kabukiran kag mga kapatagan.”
10Si Tobit nagpamangkot pa gid sa iya, “Sugiri ako, abyan, sanday sin-o ang imo pamilya kag sa ano nga tribo ikaw nagikan?”
11Pero si Rafael nagpamangkot, “Ngaa, kinahanglan gid bala nga mahibaluan mo pa ina?”
Si Tobit nagsiling, “Magsugid ka sa akon sing matuod, sin-o ka?”
12Si Rafael nagsabat, “Ako si Azarias nga anak ni Ananias nga tigulang, ang isa sang imo mga pariente.”
13Gani si Tobit nagsabat, “Ginabaton ko ikaw sa amon balay! Bendisyunan ka sang Dios, anak. Kabay pa nga wala maglain ang imo buot kay luyag ko mahibaluan ang kamatuoran tungod sa imo panimalay. Wala gid ako naghunahuna nga nagikan ikaw sa maayo nga pamilya kag pariente ka pa namon! Kilala ko si Ananias kag si Natan, ang duha ka mga anak ni lolo mo Semaya. Matutom sila sa ila relihiyon. Nagaupdanay kami sadto anay pakadto sa Jerusalem sa pagsimba didto. Ang imo mga pariente maayo nga mga tawo kag nagikan ikaw sa dalayawon nga kaliwat. Maayo nga pagpanglakaton.”
14Nagpadayon si Tobit sa pagsiling, “Bayaran ko ikaw suno sa inadlaw nga suhol kag ako magasabat sang inyo mga gasto. 15Updi sing maayo si Tobias kag dugangan ko ang imo suhol.”
16Nagsabat si Rafael “Updan ko sia. Indi ka magpalibog. Makaabot gid kami didto kag makabalik diri nga wala sing may malain nga matabo, kay indi man makatalagam ang mga alagyan.”
Si Tobit nagsabat, “Ang Dios mag-upod sa inyo!” Dayon gintawag niya si Tobias kag silingan, “Anak, ihanda ang tanan ninyo nga kinahanglanon agod makalakat kamo sa gilayon. Kabay nga ubayan kamo sang Dios kag sang iya anghel agod nga makabalik kamo sa maayo nga kahimtangan.”
Sa wala pa sila makalakat, ginhalukan ni Tobias ang iya amay kag iloy sa pagpaalam. Kag sa liwat si Tobit nagsiling, “Maayo lang nga pagpanglakaton!”
17Dayon ang iya iloy naghibi kag nagpanalambiton, “Ngaa ginpalakat mo ang akon anak? Sia lamang ang aton salaligan, kag karon, sin-o ang magatatap sa aton? 18Mas importante pa bala ang kwarta sang sa kabuhi sang imo anak nga imo ginsugo sa sining makatalagam nga bulohaton? 19Ngaa nga indi kita magpangabuhi suno sa ginhatag sang Ginoo sa aton?”
20Si Tobit nagsiling sa iya, “Magpakalinong ka. Magaabot sia didto kag magabalik diri nga wala sing malain nga matabo sa iya. Ang imo gid mga mata magatan-aw sa iya maayo nga pagbalik. 21Gani, palangga ko, untati ang imo pagpangalisod. Ang maayo nga anghel magaubay kay Tobias. Manginmadinalag-on ang iya paglakat kag magabalik sia sa maayo nga lawas.” Sa sini nga mga pulong ni Tobit, nagtawhay ang panghunahuna ni Ana kag nag-untat sia sa paghibi.
Currently Selected:
Tobit 5: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012