Tobit 4
4
Ang Panugyan ni Tobit sa Iya Anak nga si Tobias
1Sa sina gid nga adlaw, nadumdoman ni Tobit ang kwarta nga iya ginbilin kay Gabael didto sa Rages sa Media. 2Gani naghunahuna sia, “Karon kay ginpangabay ko sa Dios nga iya ako kuhaon, tawgon ko ang akon anak nga si Tobias kag sugiran ko sia natungod sang kwarta.”
3-4Gani, gintawag ni Tobit si Tobias kag silingan, “Anak, kon mapatay ako, hatagan mo ako sing nagakaigo nga paglubong. Sa akon pagtaliwan, ipakita mo ang pagtahod sa imo iloy. Tatapa sia samtang nagakabuhi sia. Kag kon mapatay sia, ilubong sia sa tupad sang akon lulobngan. Buhata ang makapahalipay sa iya kag likawi pirme ang mga bagay nga makapakalisod sa iya, kay imo dumdomon pirme nga iya gintaya ang iya kabuhi sa pagbata sa imo.
5“Indi pagkalimti ang Ginoo nga aton Dios sa tanan nga adlaw sang imo kabuhi. Indi ka magpakasala sing hungod sa buot kag tumana ang iya kasugoan. Buhata ang maayo sa tanan nga tion kag likawi ang kalautan. 6Tinguhaa ang pagkatampad sa imo mga hilikuton kag manginmadinalag-on ka sa tanan mo nga ginahimo.
7“Magmaalwan ka sa mga tawo nga matutom sa pagtuman sa mga kasugoan sang Dios. Kon kuripot ka sa mga imol, ang Dios manginkuripot man sa imo. 8Maghatag ka suno sa imo masarangan. Kon manggaranon ka, maghatag sing bugana. Kon imol ka, tinguhai nga maghatag bisan diutay lang. 9Katumbas ini sang napatago nga kwarta. Pagabatunon mo ang imo padya sa tion nga may kinahanglanon ka. 10-11Ang imo pagtatap sa mga kubos kasubong sang halad nga makapahamuot sa Dios sa langit. Buhata ini tanan kag maluwas ka sa madulom nga kalibutan sang mga minatay.
12“Anak, likawi ang malain nga mga babayi. Labaw sa tanan, magpangasawa ka sang babayi gikan sa aton tribo tungod kay nagikan kita sa kaliwat sang mga propeta. Indi ka magpangasawa sang walay labot sa aton. Dumdoma nga ang aton mga katigulangan nga sanday Noe, Abraham, Isaac kag Jacob nagpangasawa sang ila mga kaparientehan. Ginbendisyunan sila sang Ginoo kag ginhatagan sila sang mga kaanakan kag ang ila mga kaliwat nagpanubli sang kadutaan sang Israel. 13Anak, unongi ang imo mga pariente. Indi ka magbugalon nga indi ka na magpangasawa sang isa sa ila, kay ang tagsubong sina nga bugal nagapadulong sa kapaslawan kag kalaglagan subong nga ang katamad nagadala sang kamusmosan kag kagutom.
14“Sweldohi sa gilayon ang mga nagapamugon sa imo kag indi na sila pagpahulata tubtob sa madason nga adlaw. Sa sini nga paagi ginatahod mo ang Dios kag sia magapadya sa imo. Magginawi ka sing nagakaigo sa tanan nga tion. 15Indi pagbuhata sa iban ang mga butang nga indi mo luyag buhaton nila sa imo.
“Indi ka magpahuboghubog kag likawi nga manginbisyo mo ang pag-inom sing alak.
16“Pakauna ang ginagutom kag pabayui ang mga hubo. Kon manggaranon ka, maghatag sing bugana nga naupdan sang kalipay!
17“Handai sing pagkaon ang pamilya#4:17 Handai…pamilya: ukonMagbutang ka sing pagkaon sa iya lulobngan. sang napatay nga tawo nga mainunongon sa Dios, apang indi ini pagbuhata sa malaut nga tawo.
18“Batuna ang laygay sang mga maalam kag hupti ang mapuslanon nga mga panugyan.
19“Dayawa ang Ginoo nga imo Dios sa tagsa ka kahigayunan. Pangayua ang iya pagbulig sa bisan ano nga imo pagabuhaton agod nga magmadinalag-on ka. Ang Dios wala nagahatag sing kaalam sa mga tawo sang iban nga mga pungsod. Sia lamang ang ginahalinan sang tanan nga kaayuhan, pero kon luyag niya sarang man sia makalaglag kag makapatay sa imo.
“Panumdoma ang akon mga laygay kag indi ini pagkalimti sa bisan ano nga tion.
20“Tobias, anak, luyag ko mahibaluan mo nga may madamo ako nga kwarta nga ginbilin sadto anay kay Gabael nga anak ni Gabrias didto sa Rages sa Media. 21Imol na kita karon, pero indi ka magpalibog. Ang Dios magapauswag sang imo pangabuhi kon imo tumanon ang iya mga sugo kag likawan mo ang pagpakasala.”
Currently Selected:
Tobit 4: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012