Tobit 3
3
Ang Pangamuyo ni Tobit
1Naghibi ako tungod sa daku nga kahuya. Dayon sang nagahibubon-ot ako, nagpangamuyo ako sining masunod:
2“O Ginoo, matarong ka!
Maluloy-on ka#3:2 Maluloy-on ka: Ang iban nga mga teksto nagadugang sangkag matarong. sa tanan nga imo ginahimo,
matutom ka sa tanan nga bagay.
Ikaw ang hukom sining kalibutan.#3:2 Ikaw ang hukom sining kalibutan: Ang iban nga mga manuskrito mayWala ka sing ginaapinan kag matarong ka kon maghukom.
3-4Nagapakitluoy ako sa imo,
magmaayo ka sa akon.
Indi ako pagpinahi tungod sang akon mga sala
kag sang mga sala nga wala ako makahibalo.
Ginsupak ka sang akon mga katigulangan kag naglalis sila#3:3-4 Ginsupak…naglalis sila: Ang iban nga mga manuskrito mayNaglalis ako. sang imo mga sugo,
pero indi ako pagsiluti tungod sang ila mga sala.
Ginbuot mo nga agawan ang imo mga tawo sang ila mga pagkabutang,
ginbihag sila kag ginpamatay.
Ginhimo mo kami nga halimbawa
sang pagyaguta kag kahuloy-an
sa mga pungsod nga sa diin ginlapta mo kami.
5Masunson ginhukman mo ang akon mga katigulangan tungod sang ila mga sala
kag imo ako ginsilutan tungod sang akon kasal-anan.
Nanginmalalison kami kag ginsikway namon ang imo mga sugo.
Gani nangintakos kami sang imo mga pagsilot.
6“Karon, buhata sa akon ang imo luyag.
Kuhaa ang akon kabuhi kag hilwaya ako sa sining kalibutan,
kag ibalik ang akon lawas sa duta.
Mas maayo pa nga mapatay ako.
Ginasakit ako sang mga pagyaguta nga wala nagakabagay sa akon,
kag ginadulaan ako sing paglaom.
Ginoo, magsugo ka—
tapusa ang tanan ko nga mga pag-antos,
dalha ako sa kapahuwayan nga dayon.
Batuna ang akon pangamuyo.
Mas maayo pa nga mapatay ako sang sa magpadayon nga buhi nga nagabakho
kag nagaantos sa tunga sang mapait nga mga pagyaguta.”
Ang mga Palaligban ni Sara
7Sa sadto man nga adlaw, sa siudad sang Ecbatana sa Media, may isa ka babayi nga si Sara. Anak ini sia ni Raguel kag nahanabo nga ang isa sang mga suloguon nga babayi sang iya amay nagyaguta sa iya. 8Makapito na sia makapamana pero ang demonyo nga si Asmodeo nagpatay sang tagsa niya ka bana sa wala pa sila nag-upod bilang may-asawa. Ang suloguon nga babayi nagsiling kay Sara, “Ikaw gid ang nagpamatay sang imo mga bana! Tan-awa pito na kuntani ang nanginbana mo, pero wala sing bisan isa sa ila ang naglawig sa paghatag sa imo sing anak.#3:8 pero wala…sing anak: Ang iban nga mga manuskrito maypero wala ini nakahatag sa imo sing diutay lang nga kaayuhan. 9Amo bala ini ang kabangdanan kon ngaa ginapintasan mo kami? Maayo pa nga mapatay ka man kag mag-upod sa imo napatay na nga mga bana agod nga indi na kami makakita sang imo mga anak!”
10Sang mabatian ini ni Sara naghibi sia sa daku nga kasubo. Nagsaka sia sa iya kwarto sa balay sang iya amay kag nagpamat-od nga manginmatay sia. Pero sang mabinagbinag niya ini, nagsiling sia sa iya kaugalingon, “Indi ko pagbuhaton ini, kay ang mga tawo magayaguta sa akon amay. Magasiling sila, ‘Bugtong lang ang imo pinalangga nga anak nga babayi kag karon naghikog pa sia tungod lamang sa daku nga kalisod.’ Indi ko pagbuhaton ini kay manginkabangdanan ini sang kamatayon sang akon amay sa iya katigulangon. Pangayuon ko na lang sa Ginoo nga iya ako bawian sang kabuhi agod indi ko na mabatian ining mga pagyaguta!”
Ang Pangamuyo ni Sara
11Gani nagtindog si Sara malapit sa bintana kag nagbayaw sang iya mga kamot sa pagpangamuyo kag nagsiling,
“Ginoo sang kaluoy,
kag takos sang amon pagdayaw,
kabay pa nga pasidunggan
ang imo ngalan sa gihapon,
kag ang tanan nga imo mga tinuga
magdayaw sa imo
sa walay katapusan.
12“Ginoo, sa imo ako nagapangayo
sing bulig.
13Maghambal ka kag kuhaa ako sa
sining kinabuhi,
dayon indi ko na mabatian
ang mga pagyaguta sa akon.
14Imo nahibaluan, O Ginoo,
nga ako birhen pa tubtob karon,
nga wala sing tawo
nga nakatandog sa akon.
15Wala ko ginmusingi ang akon
pagkababayi
ukon wala ko man ginpakahuy-i
ang ngalan sang akon amay,
samtang nga nagaestar kami
sa sining duta
sa diin ginbihag kami.
Bugtong ako nga anak
kag wala na sing manunubli
ang akon amay.
Wala ako diri sing kaparientehan#3:15 KAPARIENTEHAN: Kinabatasan sa Israel ang pagpangasawa sa katapo sang tribo lamang.
nga sarang makapangasawa sa akon.
Makapito na ako mabalo
kag ngaa nga magkabuhi pa ako?
Pero kon indi ka luyag nga mapatay ako,
kuntani kaluoyan mo man ako.
Indi na ako pagpabati-a liwat
sadtong mga pagyaguta!”#3:15 kuntani kaluoyan…pagyaguta: Ang iban nga mga manuskrito maykuntani pamatian mo ang akon reklamo.
Ginpamatian sang Dios ang mga Pangamuyo ni Tobit kag ni Sara
16Ang pangamuyo ni Tobit kag Sara ginpamatian sang Dios sa langit 17kag iya ginpadala ang anghel nga si Rafael sa pagbulig sa ila. Ginpadala sia sa pagkuha sang nagkulap sa mga mata ni Tobit agod nga makakita sia liwat, kag subong man sa pagpatigayon sang pag-asawahay ni Sara kag sang anak ni Tobit nga si Tobias nga pakaisa ni Sara, kag may pinakauna nga kinamatarong sa pagpangasawa sa iya. Ginmanduan man sang Dios si Rafael nga iya tabugon ang demonyo nga si Asmodeo paggwa kay Sara. Sa sadto nga tion nga si Tobit nagapasulod sa iya balay halin sa pasiyuhan, si Sara didto sa Ecbatana nagapanaog gikan sa iya kwarto.
Currently Selected:
Tobit 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012