Tobit 2
2
Ang Pagsaulog sa Panimalay
1Sang pagpauli ko, nag-uporay kami liwat sang akon asawa nga si Ana kag sang akon anak nga si Tobias. Sang ginsaulog namon ang Pentecostes nga amo ang Piesta sang mga Simana, nagkaon ako. 2Sang matalupangdan ko nga madamo ang manamit nga pagkaon, ginsugo ko ang akon anak, “Tobias, magkadto ka sa gwa kag magpangita sang Judio nga imol nga yari diri ginbihag sa Ninive, pero matinumanon sa kasugoan sang Dios. Dalha sia diri agod makakaon sia upod sa aton. Indi ako magkaon kon indi pa ikaw makaabot.”
May Ginpatay sa Ninive
3Gani naggwa si Tobias sa pagpangita sini nga tawo. Pero nagbalik sia sa gilayon nga nagasinggitan: “Tatay! Tatay!”
Namangkot ako, “Ngaa? Ano ang natabo?”
Nagsabat sia, “Isa sang aton kadugo ginpatay! Ginkuga sia kag ang iya bangkay ginhaboy sa tiendahan.”
4Nagtindog ako sa gilayon kag magwa sa balay nga wala makakaon. Ginkuha ko ang bangkay sa dalan kag ginbutang sa isa ka pasilungan. Ginbilin ko ini didto agod akon malubong sa pagkahapon. 5Dayon nagbalik ako sa balay kag magpanghugas. Nagkaon ako nga nagapangalisod. 6Akon nadumdoman ang ginsiling ni Amos nga propeta sa mga taga-Betel,
“Ang inyo pagkinasadya pagabuslan sang kasubo,
kag ang inyo malipayon nga ambahanon pagabuslan sang panalambiton.”
Kag naghibi ako.
7Sang magtunod ang adlaw, naggwa ako, nagkutkot kag ginlubong ang bangkay sang napatay nga tawo. 8Naghunahuna ang akon mga kasilingan nga nagbuang ako. Nagpamangkot sila, “Wala ka pa bala madudla? Ginhingabot ka sadto anay tungod sining imo ginabuhat, kuntani napatay ka na kon wala ka nagpalagyo. Pero karon padayon ka man gihapon sang imo pagbuhat sini.”
Nabulag si Tobit
9Pagkagab-i sina nagpaligo ako kag nagtulog ako sa gwa sang balay sa higad sang pader. Tungod kay mainit wala ko ginapanimuron ang akon habol. 10Wala ko matalupangdi nga may mga salimbabatang nga nagahalapon sa pader malapit sa akon ulohan. Samtang nagahigda ako natup-an ang akon mata sang iti nga amo ang nagkulap sang akon panulok. Nagpabulong ako sa nagkalainlain nga mga manugbulong, pero walay sapayan sang ila pagbulig nag-amat-amat nga nagharapon ako kag sang ulihi nabulag na gid.
Sa sulod sang apat ka tuig nga indi ako makakita, ang akon mga kaparientehan naluoy gid sa akon kag sa sulod sang duha ka tuig ginbuligan ako ni Ahikar antes sia magkadto sa duta sang Elam.
Ang Pinamilya nga Pagsinuaysuay
11Sang makalakat si Ahikar sa Elam, napilitan nga mag-obra ang akon asawa nga si Ana. Katulad sang iban nga mga babayi, naghabol sia. 12Ginabayaran sia sang iya obra sa tapos nga madul-ong niya ang iya nahuman sa mga tawo nga nagkontrata sa iya. Sang isa ka adlaw nga tigtulognaw, nakahabol sia sang isa ka tela. Gindala niya ini sa nagkontrata sa iya kag ginbayaran sia sa kabug-osan nga bili. Walay labot sina, ginhatagan pa sia sang isa ka kanding.
13Sang makapauli si Ana nga dala ang kanding, nagmimi ang sapat. Nagsiling ako, “Sa diin naghalin ina nga kanding? Siguro ginkawat mo ina. Ibalik ina sa tag-iya kay indi matarong ang pagkaon sang kinawatan!”
14Nagsabat sia, “Indi ini mahimo! Ginhatag ini sa akon bilang regalo nga gindugang niya sa bili sang akon gindala nga tela.” Pero wala ako magpati sa iya nga ginpanghambal, kag nagpalamula ako sa kahuya. Gani ginmanduan ko sia nga iuli ang kanding, pero nangibabaw ang iya pamat-od. Nagsinggitan sia nga nagsiling, “Karon nahibaluan ko kon sin-o gid ikaw! Sa diin na yadtong pagkabalaka mo para sa iban? Kag ano ang nasamputan sang imo maayo nga mga buhat para sa ila?”
Currently Selected:
Tobit 2: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012