Tobit 1
1
1Ako si Tobit kag amo ini ang kasaysayan sang akon kabuhi. Si Tobiel ang akon amay nga anak ni Ananiel kag apo ni Aduel. Ang amay ni Aduel amo si Gabael nga anak ni Rafael kag si Rafael anak ni Raguel. Ini si Raguel naggikan sa kaliwatan ni Asiel nga bahin sang tribo ni Neftali. 2Sa panahon nga si Salamanasar amo ang hari sang Asiria, nanginbihag ako gikan sa banwa sang Tisbe. Ini nga banwa nahamtang sa naaminhan nayon sang Galilea, nabagatnan sang Kades sa Neftali, naaminhan-nakatundan sang Hasor kag naaminhan sang Pogor.
Ang Nahauna nga mga Tinuig sang Kabuhi ni Tobit
3Sa bug-os ko nga kinabuhi gintinguhaan ko ang pagbuhat sang maayo suno sa kasugoan kag sa katarungan. Batasan ko ang pagbulig sa mga imol ko nga mga kaparientehan kag sa akon kasimanwa nga mga Judio nga nabihag upod sa akon sa Ninive, ang kapital sang Asiria.
4Sang lamharon pa ako, nag-estar ako sa naaminhan nga bahin sang Israel. Kinahanglan kuntani nga ang tanan nga mga tribo sang Israel magdulot sing mga halad sa Jerusalem. Amo ini ang siudad nga ginpili sang Dios gikan sa tanan nga mga siudad sang Israel, nga patindugan sang iya Templo nga mangin-iya balaan kag walay katapusan nga ilistaran. Pero ang tribo ni Neftali sa diin ako naggikan nagsikway sang siudad sang Jerusalem kag wala nila ginkilala ang mga hari nga naggikan sa kaliwatan ni David. 5Sa baylo, ang mga linahi ni Neftali nagsimba sa siudad ni Dan nga nahamtang sa mga kabukiran sang naaminhan nga Galilea. Didto naghalad ang amon panimalay sa isa ka baka nga bulawan nga ginbuhat sadto anay ni Haring Jeroboam sang Israel.
Ang Pagkatutom ni Tobit sa Iya Relihiyon
6Sa amon panimalay, ako lamang ang nagkadto sa Jerusalem sa tagsa ka pagsaulog sang kapiestahan nga ginamando sa Kasugoan ni Moises nga himuon sang tanan. Sa akon pagkadto didto, nagdala ako sang nahauna ko nga patubas, panganay nga tinday sang akon mga kasapatan, ikapulo nga bahin sang akon panong kag ang bag-o pa lamang magunting nga mga bulbol sang akon mga karnero. Ini tanan ginahalad ko sa atubangan sang altar kag ginabaton ini sang mga pari nga nagikan sa linahi ni Aaron. 7Sa mga Levita nga nagaalagad sa Dios sa Jerusalem ginhatag ko ang ikapulo nga bahin sang akon patubas, bino, lana sang olivo, granada, higos kag iban pa nga mga bunga sang kahoy. Luas lamang sa ikapito nga tuig nga wala ginaobra ang duta,#1:7 WALA GINAOBRA ANG DUTA: Tan-awa ang Lev. 25:1-7. sa tagsa ka tuig ginbaligya ko ang ikaduha nga ikapulo nga bahin sang akon pagkabutang agod may galastuhon ako sa Jerusalem sa paghiwat sang kapiestahan.
8Sa tagsa ka ikatlo nga tuig, ginahatag ko ang ikatlo nga bahin sang akon ikapulo#1:8 ikatlo nga bahin sang akon ikapulo: Ang iban nga mga manuskrito maykwarta. sa mga balo kag mga ilo kag subong man sa mga dumoluong nga nag-estar upod sa akon kasimanwa. Kag upod sa ila nagkaon ako suno sa Kasugoan ni Moises nga ginpatuman sa akon ni Debora, ang iloy sang akon lolo nga si Ananiel kay nailo ako sang mapatay ang akon amay nga si Tobiel.
Ang Pagkatutom ni Tobit sa Duta sang Asiria
9Sang hamtong na ako ginpangasawa ko si Ana nga katapo man sang akon tribo. Nag-anak kami kag ginhingalanan ko sia kay Tobias. 10Sang ulihi nabihag ako pa Asiria, kag gani nag-estar ako sa Ninive.
Samtang nagaestar kami sa Ninive, ang akon tanan nga mga kaparientehan kag kasimanwa nagkalaon sang pagkaon sang mga taga-Ninive kag sang pagkaon sang mga tawo nga nagaestar didto, 11pero ako iya wala gid naghimo sini. 12Tungod kay gintuman ko ang mga kasugoan sang Dios nga Labing Mataas, 13ginbuot sang Dios nga tahuron ako ni Haring Salamanasar kag gani ako ang ginhatagan sang katungdanan sa pagbakal sang tanan niya nga mga kinahanglanon nga kalan-on.
14Samtang nga buhi pa ang hari, masunson ako nga nagkadto sa duta sang Media sa pagbakal sang iya mga kinahanglanon didto. Sa isa sining akon pagpanglakaton, nakakadto ako sa siudad sang Rages sa Media. Didto ginpatago ko kay Gabael nga utod ni Gabrias ang kapin sa 600 ka libra nga mga sensilyo nga pilak. 15Sang mapatay ang hari nga si Salamanasar, gintal-usan sia ni Senaquerib nga iya anak subong hari. Nag-untat ako sa pagkadto sa Media kay ang dalanon pakadto didto nanginmakatalagam.
Si Tobit Naglubong sang mga Patay
16Sang buhi pa si Haring Salamanasar, ginsapupo ko ang akon kasimanwa kon yara sila sa kaiwaton. 17Ginpakaon ko sila kon sila ginagutom, ginhatagan ko sila sing bayu kon sila nagakinahanglan sing bayu. Ginapalubong ko ang bangkay sang akon kasimanwa kon makita ko nga ini ginahaboy lamang sa gwa sang pader sang siudad.
18Sang isa ka adlaw ginpakamalaut ni Senaquerib ang Dios nga Hari sang Kalangitan. Gani ginsilutan sia sang Dios paagi sa pagkalutos sa inaway nga amo ang nagtulod sa iya sa pagpalagyo halin sa Juda. Sang iya pagbalik pakadto sa Media, napun-an sia sing daku gid nga kaakig kag iya ginpamatay ang madamo nga mga Israelinhon. Sang pangitaon ni Senaquerib ang mga bangkay, indi ini makita sanglit, sa tago lamang, ginkuha ko ini kag ipalubong.
19Pero ang isa sang mga taga-Ninive nagsugid sa hari nga ako ang nagapalubong sang iya mga ginpamatay. Sang akon matalupangdan nga ang hari nakahibalo sang akon mga ginahimo, kag nabutang sa katalagman ang akon kabuhi, kinulbaan ako. Gani nagpalagyo ako kag nagpanago. 20Ginkuha ang tanan ko nga pagkabutang kag gindugang ini sa manggad sang ginharian. Ang nabilin sa akon amo gid lamang si Ana nga akon asawa kag si Tobias nga akon anak.
Ginluwas si Tobit sang Iya Hinablos
21Matapos ang anom ka simana ginpatay si Senaquerib sang duha niya ka mga anak kag dayon nagpalagyo sila sa mga kabukiran sang Ararat. Si Esarhadon nga anak ni Senaquerib amo ang nagtal-os sa iya amay. Kinuha niya nga kabulig sa palasyo ang akon hinablos nga si Ahikar nga anak ni Anael. Ginbuhat sia nga manugtatap sang tanan nga manggad sang ginharian. 22Tungod sang pagpatigayon ni Ahikar nga akon hinablos nakabalik ako sa Ninive. Ikaduha na ini nga tion nga ginbutang sia sa sini nga palangakuan, kay sa tiempo ni Senaquerib, si Ahikar yara na sa palasyo subong tagtagay sang bino, tesorero, manugtatap sang manggad sang ginharian kag manugtago sang selyo sang hari.
Currently Selected:
Tobit 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012