Tobit 14
14
Ang Panagubilin ni Tobit
1-2Si Tobit nagaedad sing sesentay dos#14:1-2 sesentay dos: Ang iban nga dumaan nga mga pagbadbad maysingkwentay otso. ka tuig sang mabulag sia. Sa tapos nga makakita sia liwat, nagkabuhi pa sia sing malawig tubtob nga magtigulang na gid sia. Padayon gihapon ang iya paghatag sing maalwan sa mga imol kag padayon man ang iya pagdayaw sa Dios kag pagsugid sang iya pagkagamhanan. Napatay sia sa edad nga 112 ka tuig, kag ginhatagan sia sang dungganon nga paglubong didto sa Ninive.
3Sang nagatagumatayon na si Tobit, ginpatawag niya ang iya anak nga si Tobias kag ang pito ka mga anak nga lalaki ni Tobias#14:3 kag ang pito ka mga anak nga lalaki ni Tobias: sa Griego wala ini nga mga pulong. kag ginsilingan, 4“Anak ko, dalha sa gilayon ang imo mga anak sa Media. Nagatuo ako nga madali na lang magaabot ang kalaglagan sa Ninive suno sa ginhambal ni Propeta Nahum. Ang tanan nga ginpanghambal sang mga propeta sang Dios sa Israel natungod sa Ninive kag Asiria magakalatabo. Ini tanan manginmatuod, ang tagsa ka pulong sini magaabot sa nagakaigo nga panahon. Ako nagtuo gid nga ang tanan nga ginpanghambal sang Dios magakahanabo. Ang Dios nagatuman sang iya mga saad. Mas diutay ang katalagman mo didto sa Media sang sa diri sa Asiria ukon Babilonia.
“Ang kasimanwa naton nga mga Judio nga nagaestar sa Israel magaalaplaag kag pagabihagon sila gikan sa sinang maayo nga duta. Ang bug-os nga duta sang Israel manginlamgod; ang mga siudad sang Samaria kag Jerusalem pagatalikdan sang tanan. Ang Templo sang Dios pagasunogon kag maguba ang kabug-osan sini. Indi gid man ini maglawig. 5Pero sa liwat ang Dios magakaluoy sa iya mga katawhan kag pabalikon niya sila sa duta sang Israel. Ila liwat patindugon ang Templo, pero indi ini manginmatahom kasubong sang una, indi tubtob sa pag-abot sang nagakaigo nga panahon. Pero kon mag-abot ang nagakaigo nga panahon, ang tanan nga mga Israelinhon magabalik gikan sa pagkabihag kag ila patindugon liwat ang siudad sang Jerusalem nga manginkaangay sa katahom sang wala pa maguba ini. Ila man pagapatindugon liwat ang Templo sang Dios sa Jerusalem suno sa gintagna sang mga propeta sang Israel.
6“Dayon magabalik sa Dios ang tanan nga mga pungsod sang kalibutan. Magasimba sila sa isa lamang ka matuod nga Dios kag ila talikdan ang mga diosdios nga amo ang nagpatalang sa ila sa butig nga pagsimba. 7Ang mga pungsod sang kalibutan magadayaw sa walay katapusan nga Dios paagi sa ila pagtuman sang ginasugo sang Dios.
“Sa sina nga panahon, ang Dios magaluwas sa tanan nga mga Israelinhon nga nanginmainunongon sa iya. Dalhon sila liwat sing tingob sa Jerusalem kag panag-iyahan nila ang duta ni Abraham kag didto magakabuhi sila nga may kalinong sa walay katapusan. Magakalipay ang tanan nga nagahigugma sa Dios sa bug-os nila nga tagipusoon kag kalag, pero dulaon niya sa ibabaw sang duta ang tanan nga mga malaut kag mga makasasala.
8“Gani, mga anak, tumana ninyo ang akon ginasiling. Simbaha ninyo ang Dios nga may daku nga katutom kag buhata ninyo ang iya nahamut-an. 9Tuytoyi ninyo ang inyo mga anak sa pagbuhat sing matarong. Tudloi ninyo sila sa paghatag sa mga imol kag pahanumdoma sila nga ila dayawon sing masunson ang Dios sa bug-os nila nga tagipusoon.
10“Tobias, anak, maghalin ka diri sa Ninive sa labing madali. Indi ka na magpabilin pa diri. Sa tapos mo malubong ang imo iloy sa akon tupad, maghalin ka gilayon. Indi ka na magpaligad sing maskin isa ka gab-i diri. Makasasala ini nga siudad kag napun-an sang kahigkuan. Wala na sing huya ang mga tawo diri. Dumdoma ang ginhimo ni Nadab sa iya tiyo nga si Ahikar nga nagpadaku sa iya. Gintinguhaan ni Nadab nga patyon si Ahikar. Tungod sini napilitan si Ahikar sa pagpanago sa mga pantyon sang sementeryo. Nagbalik sia nga buhi, pero ang Dios nagbuot nga mapatay si Nadab tungod sang iya malain nga tinutuyo. Naluwas si Ahikar#14:10 si Ahikar: ukon ako. sa tugalbong nga gin-aman ni Nadab para sa iya tungod kay nagpanglimos sia sing maalwan sa mga imol. Pero ang tugalbong nga gin-aman ni Nadab amo man ang nagpatay sa iya kaugalingon. 11Gani karon, mga anak ko, inyo makita kon ano ang ginabalos sa mga nagakaluoy sa ila isigkatawo kag kon paano mapatay ang mga tawo nga nagalupig sa ila isigkatawo. Pero sa karon, maluya na gid ako.”
Napatay si Tobit
Gani ginpahigda nila si Tobit sa hiligdaan kag napatay sia. Ginhatagan sia sang isa ka dungganon nga paglubong. 12Sang ulihi napatay man si Ana, kag ginlubong sia sa tupad sang iya bana. Dayon si Tobias kag ang iya asawa nagsaylo sa Ecbatana didto sa Media kag nagpangabuhi sila upod sa iya ugangan nga si Raguel. 13Gintatap ni Tobias ang iya tigulang nga mga ugangan kag gintahod gid niya sila. Sang mapatay si Raguel kag Edna ginlubong niya sila didto sa Ecbatana. Ginpanubli ni Tobias ang kadutaan ni Raguel subong nga iya ginpanubli ang kadutaan sang iya amay nga si Tobit.
14-15Nagkabuhi sing malawig si Tobias kag sang nagaedad sia sing 117, napatay sia. Nasaksihan pa niya ang pagkalaglag sang Ninive kag ang pagbihag ni Cyaxaros, hari sang Media, sang mga taga-Ninive. Gindayaw ni Tobias ang Dios tungod sang pagsilot niya sang mga taga Ninive kag Asiria. Sa wala pa sia mapatay nagpasalamat sia sa ginhimo sa Ninive sang walay katubtoban nga Dios.
Currently Selected:
Tobit 14: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012