Judit 1
1
Ang Pag-away ni Nabucodonosor kag Arfaxad
1Samtang si Haring Nabucodonosor nagagahom sang Asiria gikan sa kapital nga siudad sang Ninive, si Haring Arfaxad nagagahom man sang Media gikan sa kapital nga siudad sang Ecbatana. 2Ang siudad sang Ecbatana ginpalibutan ni Haring Arfaxad sang isa ka pader nga nagataas sing 105 ka tapak kag nagadamol sing setentay singko ka tapak. Nahuman ini sa nalagari nga bato nga ang tagsa ka tabla nagadamol sing apat kag tunga ka tapak kag nagalaba sing siyam ka tapak. 3Sa tagsa ka pwertahan nagpahimo sia sang tore nga nagataas sing 150 ka tapak kag nagadamol ini sa sadsaran sing nobenta ka tapak. 4Ang tagsa ka pwertahan may kataason nga 105 ka tapak kag may sangkad nga sesenta ka tapak agod nga mahapos ang pag-agi pasulod sang iya bug-os nga hangaway nga nagamartsa.
5Sa ika-12 nga tuig sang paghari ni Nabucodonosor, nagpakig-away sia batok kay Haring Arfaxad didto sa malapad nga wayang sa palibot sang siudad sang Rages. 6Madamo nga mga pungsod ang nagdampig kay Haring Arfaxad—ang bug-os nga mga tawo nga nag-estar sa mga kabukiran, ang mga nag-estar sa panghigaron sang mga suba sang Tigris, Eufrates kag Idaspes. Nagdampig man sa iya ang mga tawo nga sakop ni Haring Arioc nga hari sang mga Elamita. Madamo nga mga pungsod ang nagpakigbahin sa sining paghiliugyon sang mga Caldeanhon.
7Dayon si Haring Nabucodonosor sang Asiria nagpadala sang isa ka mensahe nga nagapangayo sang bulig gikan sa mga taga-Persia, sa mga pungsod nga nahamtang sa nakatundan katulad sang Cilicia, Damasco, Libano kag Anti-Libano upod ang mga nagaestar sa panghigaron sang baybay 8kag sa mga taga-Carmel, Galaad, naaminhan nga Galilea kag lakip ang nagaestar sa malapad nga Kabakuloran sang Jezreel. 9-10Nagpangayo man sia sing bulig sa mga taga-Samaria kag sa mga nagaestar sa kaingod nga mga banwa sini, sa mga nagaestar sa nakatundan nga bahin sang Suba sang Jordan tubtob sa mga siudad sang Jerusalem, Betania, Kolus, Kades kag Gosen. Ang mensahe nakalambot man sa mga siudad sang Ehipto subong sang Tafanhes, Rameses, Tanis, Memfis padulong sa mga lugar sa ibabaw sang Suba sang Nilo tubtob sa dulonan sang Etiopia. 11Pero wala gid sing bisan isa sining nahinambitan nga mga pungsod kag siudad ang nagbuylog sa pangabay ni Haring Nabucodonosor kag nagpamalibad sila sa pagpakigbahin sa inaway. Naghunahuna sila nga wala sing padaog ang hari sa sining iya pagpakig-away, gani wala sila mahadlok sa iya kag ginpapauli nila ang mga mensahero sang hari nga wala makatigayon sang bulig kag sa daku nga kahuya.
12Tungod sini, daku gid ang kaakig ni Haring Nabucodonosor sa sini nga mga pungsod kag siudad kag nagsumpa sia nga itaya niya ang iya bug-os nga ginharian sa pagtimalos sa sadtong mga tawo. Nagpanaad sia nga pamatyon niya ang tanantanan nga mga pumoluyo sang Cilicia, Damasco, Siria, Moab, Ammon, Juda kag Ehipto—tanan nga nagaestar halin sa baybayon sang Mediteraneo tubtob sa Gulfo sang Persia.
13Sa ika-17 nga tuig sang iya paghari, ginpangulohan ni Haring Nabucodonosor ang iya mga hangaway batok kay Haring Arfaxad. Nalutos niya ang kabug-osan nga mga hangaway ni Haring Arfaxad lakip ang tanan nga mga nagasalakay sa kabayo kag karwahi. 14Dayon ginpanag-iyahan ni Haring Nabucodonosor ang kabug-osan sang Media kag ginsulong niya ang siudad sang Ecbatana. Gin-agaw niya ang mga tore sini, ginkuha ang mga pagkabutang sa mga balaligyaan, kag ang matahom nga siudad nangindagway sang kalaglagan. 15Gindakop niya si Haring Arfaxad sa mga kabukiran sang Rages kag iya ini ginpatay. 16Si Haring Nabucodonosor kag ang bug-os niya nga hangaway nagbalik sa Ninive dala ang tanan nila nga mga inagaw sa inaway. Didto nagpahuway sila kag nagkinalipay sa sulod sang apat ka bulan.
Currently Selected:
Judit 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012