Tobit 13
13
Ang Ambahanon sang Pagdayaw ni Tobit
1Dayon nagpangamuyo si Tobit sing subong sini:
“Dayawon ang walay katapusan nga Dios,
dayawon sia nga nagagahom.
2Iya kita ginasilutan, dayon iya kita ginakaluoyan.
Ginadala niya kita sa kalibutan sang mga patay,
dayon iya kita ginabanhaw.
Wala sing bisan sin-o nga makaluwas sa iya gahom.
3“Mga tawo sang Israel, magpasalamat kamo sa tunga sang mga kapungsoran,
sa diin ginpadala niya kamo subong mga bihag,
4kay bisan didto ginpakita niya ang iya daku nga gahom.
Dayawa sia sa atubang sang tanan nga tinuga.
Ang Ginoo amo ang aton Dios kag Amay nga walay katapusan.
5“Bisan pa nga iya kamo ginsilutan tungod sang inyo pagkamalaut
manginmaluloy-on sia,
kag gikan sa duta nga kamo ginbihag, sa diin ginlalapta niya kamo,
iya kamo pagadalhon pabalik sa duta nga inyo natawhan.
6“Magbalik kamo sa iya sa bug-os nga tagipusoon kag kalag,
magkabuhi kamo nga matinumanon sa iya.
Dayon magabulig sia sa inyo
kag indi na sia magpanago sa inyo.
Dumdoma ninyo ang mga ginbuhat sang Dios sa inyo,
kag magpasalamat kamo sa iya sa bug-os ninyo nga tagipusoon.
Dayawa ninyo ang matarong nga Ginoo,
tahura ninyo ang Hari nga walay katubtoban.
“Bisan pa nga bihag ako kag nagaestar sa malayo nga kadutaan,
magapasalamat ako sa Ginoo
kag akon ipahayag ang iya daku nga kusog sa pungsod sang mga makasasala.
‘Bayai ninyo ang pagpakasala kag buhata ninyo ang makapahamuot sa Dios!
Ayhan sa sini manginmaalwan sia
kag kaluoyan niya kamo.’
7“Dayawon ko ang akon Dios, kag magakalipay ako sa iya pagkagamhanan,
ang bug-os ko nga pagkatawo nagapasidungog sa Hari sang langit.
8“Pasugira ang tanan nga mga tawo sang iya pagkagamhanan
kag pakantaha sa pagdayaw sa iya sa Jerusalem.
9“O Jerusalem, Balaan nga Siudad sang amon Dios
silutan niya ikaw tungod sang mga sala sang imo mga tawo.
Pero manginmaluloy-on sia sa tanan nga nagabuhat sing matarong.
10Gani, magpasalamat sa Ginoo kay sia maayo.
Dayawa ang Hari nga walay katapusan.#13:10 Ang iban nga mga manuskrito wala sang bersikulo 6b-10aBisan pa…Dayawa ang Hari nga walay katapusan.
Pagapatindugon liwat ang imo Templo
kag magakalipay liwat ang imo mga tawo.
“Kabay pa nga ang Ginoo maglipay sang nabihag gikan sa imo,
kabay pa nga magtatap sia tubtob sa katubtoban
sang nagaantos mo nga mga tawo.
11“O Jerusalem, ang imo kasanag magabanaag para sa bug-os nga kalibutan
kag gikan sa malayo magapalapit sa imo ang madamo nga mga pungsod.
Ang ila mga tawo magaabot sa pagtahod sa Ginoo nga imo Dios,
kag magadala sila sing regalo para sa Hari sang Langit.
Ang imo mga kaliwatan malipayon nga magakanta sing pagdayaw sa imo mga dalanon.
Ang imo ngalan magapadayon sa walay katubtoban subong pinili nga siudad sang Dios.
12Pagapakamalauton ang bisan sin-o nga nagapamahog sa imo,
ang tanan nga magaguba sa imo, ang tanan nga magrumpag sang imo mga pader,
ang tanan nga magatumba sang imo mga tore kag magasunog sang imo mga balay.
Pero pagabendisyunan niya ang tanan nga magatahod sa imo.
13“Magakalipay ka, O Jerusalem, tungod sang matarong nimo nga mga tawo,
pagatipunon sila gikan sa ila pagkabihag
kag magadayaw sila sa Ginoo nga walay katapusan.
14“Malipayon ang tanan nga nagapalangga sa imo
kag nagakasadya sa imo kauswagan.
Magakalipay yadtong mga nagakasubo sa imo mga pag-antos karon,
kay ang imo kalipayan magapasadya sa ila sa walay katapusan.
15“Ginadayaw ko ang Ginoo, ang makagagahom nga Hari.
16Patindugon liwat ang Jerusalem
kag mangin-ilistaran ini sang Ginoo tubtob sa katubtoban.
“Daw ano ka malipayon sa akon, O Jerusalem,
kon ang akon mga kaliwat makakita sang imo kahimayaan
kag makapasalamat sila sa Hari sang langit.
“Ang imo mga pwerta pagapugtakan sang mga sapiro kag esmeralda,
ang imo mga pader sang malahalon nga mga bato.
“Ang imo mga tore pagahumanon sa bulawan
kag ang ila mga pamakod sa pinakapuraw nga bulawan.
17Ang imo mga dalanon pagasanihan sang mga rubi kag malahalon nga mga bato.
18Gikan sa imo mga ganhaan magalanog ang mga ambahanon sang pagkinasadya,
kag gikan sa tagsa ka balay, ang mga tawo magasinggit:
‘Dayawon ang Ginoo! Dayawon ang Dios sang Israel!’
“O Jerusalem, ang Dios magabendisyon sang imo mga tawo
kag indi sila mag-untat sa pagdayaw sang iya balaan nga ngalan.”
Sa sining mga pulong gintapos ni Tobit ang iya ambahanon sa pagdayaw.
Currently Selected:
Tobit 13: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012