Tobit 12
12
Ang Anghel nga si Rafael
1Pagkatapos sang punsyon, gintawag ni Tobit si Tobias kag ginsilingan, “Anak, bayari ang imo upod kag indi ka magkalipat sa pagdugang sang suhol niya.”
2Nagpamangkot si Tobias, “Pila ang ibayad ko sa iya, tay? Maayo siguro nga ihatag naton sa iya ang katunga sang mga butang nga gindala namon pabalik diri. 3Ginbalik niya ako diri nga wala maano. Sia ang nagkuha sang kwarta kay Gabael, ginluwas niya si Sara nga akon asawa sa gahom sang demonyo, kag gin-ayo niya ang imo pagkabulag. Pila ayhan nga dugang ang aton ihatag sa iya?”
4Nagsabat si Tobit, “Ihatag sa iya ang katunga sang inyo dala. Takos sia sina.”
5Gani, gintawag ni Tobias si Rafael kag silingan, “Yari ang katunga sang dala naton. Imo ina kinabudlayan. Kabay nga magmaayo ang imo pagpanglakaton.”
6Dayon gintawag ni Rafael ang duha kag sang silahanon lang nagsiling sia, “Dayawa ninyo ang Dios kag isugid ninyo sa iban ang mga kaayuhan nga iya ginhimo sa inyo agod nga sila man magapasidungog sa Dios kag magkanta sila sing pagdayaw sa iya. Isugid sa tanan ang ginbuhat sang Dios kag indi kamo mag-untat sa pagdayaw sa iya.
7“Maayo nga taguon ang mga sekrito sang hari, pero ang mga hinimuan sang Dios indi dapat pagtaguon agod nga pagpasidunggan kag pagadayawon sia.
“Wala sing malain nga magaabot sa inyo kon magpadayon kamo nga nagabuhat sing maayo.
8“Mas maayo ang pagpangamuyo nga hugot sa tagipusoon kag ang pagpahamuot sa Dios paagi sa pagbulig sa mga imol sang sa manggaranon nga di-maminatud-on. Mas maayo ang paghatag sa mga imol sang sa pagtago sang bulawan. 9Ina nga pagkaalwan magaluwas sa inyo sa kamatayon kag magahugas sang inyo mga sala. Ang mga mahinatagon sa mga imol magalawig sa kalibutan, 10pero, ang nagakabuhi sa sala kag kalautan nagahalit sang ila kaugalingon.
11“Nasiling ko na sa inyo nga maayo nga taguon ang sekrito sang hari, pero ang mga hinimuan sang Dios dapat ipahayag sa tanan. Karon, ipahayag ko sa inyo nga wala sing tagutago ang bug-os nga kamatuoran. 12Sang ikaw, Tobit, kag si Sara nagpangamuyo sa Ginoo, ako ang nagdala sang inyo mga ginpangayo sa mahimayaon nga presensya sang Ginoo. Amo man ini ang akon ginbuhat sa tagsa nimo ka paglubong sang mga minatay. 13Ginpadala ako sang Dios sa pagtilaw sa imo sadtong adlaw nga nagtindog ka kag ginbayaan nimo ang imo pagkaon agod maglubong sang minatay. 14Pero iya man ako ginpadala sa pag-ayo sang imo pagkabulag kag sa pagluwas kay Sara nga imo umagad gikan sa iya mga kabudlayan. 15Ako si Rafael, isa sang pito ka mga anghel nga nagatindog sa mahimayaon nga presensya sang Ginoo kag handa sa pag-alagad sa iya.”
16Kinulbaan si Tobit kag si Tobias. Gani naghapa sila nga nagakurog sa daku nga kahadlok. 17Pero si Rafael nagsiling sa ila, “Indi kamo magkahadlok. Wala sing may matabo sa inyo. Dumdoma kag dayawa ninyo sing masunson ang Dios. 18Iya ini luyag nga mag-abot ako kag magbulig sa inyo. Wala ako mag-abot sa akon lamang. Gani mag-amba kamo sing pagdayaw sa Dios samtang nga nagakabuhi kamo. 19Sang makita ninyo nga nagakaon ako, ina tanan palanan-awan lamang ninyo kay sa pagkamatuod wala ako nagakaon. 20Kinahanglan nga dayawon kag pasalamatan ninyo ang Ginoong Dios samtang yari pa kamo sa kalibutan. Karon magabalik ako sa iya nga nagpadala sa akon. Isulat ninyo ang tanan nga nagkalatabo sa inyo.”
21Dayon si Rafael nagkayab sa kalangitan. Sang makatindog ang mag-amay, wala na nila makita si Rafael. 22Tungod sini tanan, nag-amba sila sang pagdayaw kag nagpasalamat sila sa Dios bangod sang tanan nga gamhanan nga buhat sang Dios samtang si Rafael nga anghel sang Dios kaupod nila.
Currently Selected:
Tobit 12: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012