Tobit 11
11
1Malipayon si Tobias nga naghalin sa balay sang iya ugangan. Gindayaw niya ang Ginoo sang langit kag sang duta, ang Hari sang bug-os nga kalibutan, tungod kay nanginmadinalag-on ang iya pagpanglakaton sa Rages. Nagsaad siya sa pagtahod sa iya mga ugangan tubtob nga ini sila buhi.
Ang Pagkitaay Liwat
Samtang nagapalapit sila sa siudad sang Kaserin, sa gwa sang Ninive, 2si Rafael nagsiling, “Tobias, imo nahibaluan ang kahimtangan sang imo amay sang aton paghalin. 3Magauna kita kay ihanda naton ang inyo balay antes mag-abot si Sara kag ang iban naton nga mga kaupdanan. 4Siguroha nga dala mo ang apdo sang isda.” Gani nag-una sila upod ang ido ni Tobias.#11:4 ang ido ni Tobias: Ang iban nga mga manuskrito mayang Ginoo.
5Sa sadto nga tion, si Ana nagapungko kag nagabantay sa dalan nga gin-agyan anay ni Tobias. 6Sa isa ka pisok nakita niya si Tobias nga nagapadulong kag gani nagsinggit sia kay Tobit, “Tan-awa! Nagapadulong ang aton anak kag ang iya upod!”
7Sa wala pa sila makasampot sa balay, si Rafael nagsiling kay Tobias, “Makakita liwat ang imo amay. 8Ihampol sa iya mga mata ang apdo sang isda. Ang labutlabot nga nagkulap sa iya mga mata magatukal. Kuhaon mo ini kag makakita sia liwat.”
9Nagdalagan si Ana sa pagsugata sa iya anak. Ginhakos niya ini kag nagsiling, “Karon nga nakita ko na ikaw, anak, bisan mapatay na ako!” Kag naghibi si Ana sa daku nga kalipay.
Ang Pagkakita Liwat ni Tobit
10Si Tobit nagbangon kag nasandad sia sa trangka sang pwerta. 11Ginsugata kag ginpatindog sia ni Tobias nga nagadala sang apdo sang isda. Ginhuyop niya ang mata sang iya amay kag nagsiling: “Indi ka magkabalaka, tay.” 12-13Dayon ginbutang niya ang apdo sa mga mata ni Tobit. Madugaydugay ginkakas ni Tobias ang daw labutlabot nga nagtabon sa kalimutaw sang iya amay. 14Ginhakos ni Tobit ang iya anak kag sa daku nga kalipay naghibi sia. Dayon nagsinggit sia: “Makita ko na ikaw, anak! Ikaw ang kasanag sang akon mga mata!
“Dayawon ang Dios. Dayawon sia sa iya kagamhanan.
Dayawon ang iya balaan nga mga anghel.
Kabay nga magpadayon sia
sa pagbendisyon sa aton.
Dayawon ang iya tanan nga mga anghel
sa walay katapusan.
15Ginpadalhan niya ako sining balatian
pero karon makita ko na ang akon anak nga si Tobias!”
Dayon malipayon nga nagsulod sa balay si Tobias kag sa mabaskog nga tingog nagdayaw sia sa Dios. Ginsugid niya sa iya amay kon daw ano ka madinalag-on ang iya pagpanglakaton kag indi lamang nga nakuha niya ang kwarta kay Gabael kundi subong man nga napangasawa niya si Sara nga anak ni Raguel. Yara sia nagasunod sa ulihi kag manug-abot sa indi madugay.
Ang Pag-abot ni Sara
16Malipayon nga gindayaw ni Tobit ang Dios. Naggwa sia sa pagsugata sang iya umagad sa ganhaan sang siudad. Ang mga taga-Ninive natingala sang makita nila si Tobit nga nagalakat nga wala na sing may nagatuytoy sa iya. 17Si Tobit nagdayaw sa Dios kag nagsaysay sa mga tawo kon daw ano ang pagkaluoy sang Dios sa iya kag gin-ayo ang iya pagkabulag.
Sang makaabot si Sara, si Tobit nagsiling, “Pag-abiabi, anak! Dayawon ang Dios nga nagpadala sa imo diri sa amon. Kabay nga iya bendisyunan ang imo amay, ikaw kag ang akon anak nga si Tobias. Ginaabiabi ko ikaw sa bag-o mo nga balay. Kabay nga manginmalipayon ka diri kag hatagan ka sing maayo nga lawas. Magsulod ka, anak!”
Adlaw yadto sang pagkinalipay para sa mga Judio nga nagaestar sa Ninive. 18Si Ahikar kag Nadab nga mga hinablos ni Tobit nagkadto man sa pagbuylog sa kalipay ni Tobit. Sa daku nga kinasadya, ginhiwat nila ang punsyon sang kasal ni Tobias sa sulod sang pito ka adlaw kag madamo nga mga regalo ang ginhatag sa iya.#11:18 Sa daku…sa iya: Ang iban nga dumaan nga mga pagbadbad wala nagalakip sini nga mga pulong.
Currently Selected:
Tobit 11: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012