Tobit 10
10
Ang Pagkalangkag ni Tobit kag Ana
1Samtang nga didto si Tobias sa Ecbatana, sa adlaw-adlaw nga tanan ginaisip ni Tobit kon pila gid ka adlaw ang kinahanglanon sa paglakat pakadto sa Rages tubtob ang pagbalik sa Ninive. Sang maghusto ang mga inadlaw kag wala pa makapauli si Tobias, nagsiling si Tobit sa iya asawa, 2“Ano bala ang natabo kay Tobias? Napatay na ayhan si Gabael kag tungod sini wala na sing may magahatag sang kwarta?” 3Natublag gid si Tobit.
4Si Ana nagsiling, “Nasiguro ko nga patay na ang akon anak.” Dayon naghibi sia kag nagpanalambiton. 5“O anak, kalipay sang akon kabuhi! Ngaa nga gintugotan ko pa ikaw sa paglakat?”
6Gintinguhaan ni Tobit ang paglugpay sa iya asawa. Nagsiling sia, “Magpakatawhay ka, palangga, indi ka magpangasubo. Wala sing malain nga natabo sa aton anak. Ayhan may mga hitabo nga wala niya ginapaabot nga amo ang nag-atraso sa ila. Kag luwas sina, ang iya upod masaligan naton nga pariente. Indi sia pagpangalisdi, palangga. Ginasiguro ko nga sa sini nga tinion nagapauli na sia diri.”
7Si Ana nagsabat, “Hipos lang dira kag pabay-i lang ako! Indi ka na magbutig sa akon. Patay na ang akon anak.” Sa tagsa ka adlaw, nagagwa si Ana sa balay kag maglantaw sa alagyan nga gin-agyan ni Tobias kag magbantay sa iya tubtob maghapon. Wala sia luyag nga may mag-uloulo sa iya#10:7 Wala sia luyag nga may mag-uloulo sa iya: Ang iban nga mga manuskrito may Indi gid sia magkaon. kag sa kahapunanon sa iya pagpauli, nagahibi sia kag nagakasubo para sa iya anak, kag sa bug-os nga gab-i, indi sia matulogan.
Ang Pagpauli gikan sa Ecbatana
Sa tapos ang duha ka simana nga punsyon nga ginhiwat ni Raguel, para sa kasal sang iya anak nga si Sara, si Tobias nagkadto sa iya kag nagsiling, “Tugoti na ako nga makapauli. Nasiguro ko nga ang akon mga ginikanan wala na nagahunahuna nga makita pa nila ako liwat. Tatay, tugoti ako nga makapauli ako sa akon amay. Nasugid ko na sa imo ang iya kahimtangan sang paghalin ko didto.”
8Pero si Raguel nagsabat, “Diri ka lang anay sa akon, anak. Pasugoan ko lang ang imo amay kag pahibaluon ko sia nga maayo ka man diri.”
9Nagpamilit si Tobias sa pagsiling, “Indi na ako makatener pa diri! Pahanugoti ako sa pagpauli sa akon amay.”
10Gani, sa gilayon, gintugyan ni Raguel kay Tobias si Sara nga iya asawa. Ginhatag man niya ang katunga sang tanan niya nga mga pagkabutang: mga suloguon, mga baka, mga karnero, mga asno, mga kamelyo, mga bayu, kwarta, kag kagamitan sa sulod sang balay. 11Ginhakos ni Raguel si Tobias kag ginpalakat sila sa tapos niya sila mabendisyunan nga nagasiling, “Maayo lang nga paglakat, anak. Kabay pa nga ang Ginoo sang langit magbantay sa inyo ni Sara. Kabay man nga magkabuhi pa ako sa pagtan-aw sang akon mga kaapuhan.” 12Dayon nagsiling sia kay Sara, “Mag-upod ka sa imo bana kag mag-estar ka sa balay sang imo mga ugangan. Sugod karon, mga ginikanan mo sila subong nga si nanay mo kag ako imo man mga ginikanan. Kabay nga ang akon mabatian natungod sa inyo mga maayo lamang samtang nga nagakabuhi pa ako.” Nagpaalam sia sa ila kag iya sila ginpalakat.
Dayon si Edna nagsiling kay Tobias, “Tobias, palangga ko nga anak, kabay nga pakamaayuhon sang Ginoo ang imo pagpauli. Kag kabay nga makakita pa ako sang akon mga kaapuhan. Sa presensya sang Ginoo, ginatugyan ko sa imo pag-atipan ang akon anak. Indi sia paghatagi sing kalain sang buot samtang ikaw nagakabuhi. Maayo lang nga paglakat! Sugod karon, si Sara imo asawa kag ako ang imo iloy. Kabay pa nga magmainuswagon ang aton pagkabuhi.” Ginhalukan niya sila kag ginpalakat.
Currently Selected:
Tobit 10: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012