Ang Amba sang Mga Ambahanon 6
6
Ang mga Babayi
1Labing matahom sa mga babayi,
diin bala nagkadto ang imo kahagugma?
Sugiri kami kon diin bala nagpadulong ang imo kahagugma,
agod makabulig kami sa imo sa pagpangita sa iya.
Ang Babayi
2Ang akon kahagugma nagkadto sa iya hardin,
sa diin ang mga kahoy nga pahumot nagatubo.
Nagapahalab sia sang iya mga panong sa hardin
kag nagatipon sang mga lirio.
3Ang akon kahagugma akon, kag iya ako,
nagapahalab sia sang iya mga panong sa tunga sang mga lirio.
Ang Ikalima nga Ambahanon
Ang Lalaki
4Palangga ko, matahom ikaw subong sang Jerusalem,
subong katahom sang siudad sang Tirsa,
makahalawhaw subong sini nga mga siudad.
5Indi ako pagtuloka,
kay ginabihag mo ako.
Ang imo buhok nagasaot subong sang panong sang mga kanding
nga nagalumpatlumpat sa kabakuloran sang Galaad.
6Ang imo mga ngipon subong kaputi sang panong sang mga karnero
nga bag-o lang mapaligusan.
Wala sing isa sa ila nga nadula,
tanan sila may nagakabagay nga mga pares.
7Ang imo mga pisngi manayanaya
nga ginatabunan sang imo belo.
8May sesenta ka mga rayna, kag otsenta ka mga babayi,
kag mga kadalagahan nga indi maisip!
9Pero isa lamang ang akon ginahigugma,
kag sia matahom subong sang alimokon.
Sia bugtong nga anak nga babayi sang iya iloy,
pinalangga nga anak sang iya iloy.
Ang tanan nga mga kadalagahan nagatulok kag nagadayaw sa iya,
Ang mga rayna kag mga babayi nagaamba sa pagdayaw sa iya.
10Sin-o bala ini nga kon tan-awon subong sang kabugwason?
Subong sia kasanag
kag kasilaw sang adlaw ukon sang bulan.
11Nagdulhog ako sa mga katamnan sang mga kahoy nga almendro,
sa pagtan-aw sang bag-o nga mga tanom sa kapatagan,
sa pagtan-aw sang ugbos sang mga ubas
kag sang mga bulak sang mga granada nga nagapamukadkad.
12Nagapalangurog ako, ginpukaw mo ang akon balatyagon
sa paghigugma subong sang soldado nga nagasakay sa karwahi padulong sa inaway.
Ang mga Babayi
13Saot, saot ka,#6:13 Saot, saot ka: ukonBalik, balik ka. O Sulamnon nga babayi.
Saot, saot ka, kag patan-awa kami sa imo.
Ang Babayi
Ngaa bala luyag kamo magtan-aw sa akon
samtang nagasaot ako sa tunga sang nagaraya nga mga tumalan-aw?
Currently Selected:
Ang Amba sang Mga Ambahanon 6: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
