Ang Amba sang Mga Ambahanon 7
7
Ang Lalaki
1Daw ano katahom sang imo mga tiil nga may mga sandalyas,
ikaw ang labing matahom nga babayi!
Ang korte sang imo mga paa
kaangay sang binuhatan sang sampaton nga manug-obra.
2Ang imo pusod kaangay sang yahong
nga indi mawad-an sang mahamot nga bino.
Ang imo hawak kaangay sang binugkos nga trigo,
nga nalibutan sang mga lirio.
3Ang imo mga suso kaangay sang kapid nga usa,
kaangay sang duha ka gasela.
4Ang imo liog kaangay sang tore nga tiposo.
Ang imo mga mata kaangay sang mga punong sa Hesbon,
malapit sa pwerta sang daku nga siudad.
Ang imo ilong subong katahom sang tore sang Libano
nga nagatindog subong gwardya sa Damasco.
5Ang imo ulo subong kataas sang Bukid sang Carmel.
Ang imo sinalapid nga buhok madabong subong sang mapino nga purpora,
ang katahom sini nagabihag sang hari.
6Daw ano katahom sa imo, palangga ko,
daw ano ka makawiwili ang imo paghigugma.
7Ang imo tindog kaangay sang palma,
kag ang imo mga suso subong sang iya pinungpong nga bunga.
8Magasaka ako sa palma
kag magpang-ipo sang iya bunga.
Para sa akon ang imo mga suso kaangay sang pinungpong nga ubas,
ang imo ginhawa mahamot subong sang mansanas,
9kag ang imo baba kaangay sang labing maayo nga bino.
Ang Babayi
Gani pailiga ang bino sa akon kahagugma,
nga nagailig sa iya mga bibig kag mga ngipon.#7:9 Ang iban nga dumaan nga mga pagbadbadmga bibig kag mga ngipon; sa Hebreomga bibig sang mga nagakatulog.
10Iya ako sang akon kahagugma, kag ginahandom niya ako.
11Dali, hinigugma ko, makadto kita sa kaumhan,
kag magahigda kita sang isa ka gab-i sa talamnan sang ubas.#7:11 talamnan sang ubas: ukonkabarangayan.
12Magamata kita sing aga pa sa pagtan-aw sang mga ubas
kon nagapamukol na,
kon nagapamukadkad na,
kag tan-awon naton ang mga kahoy nga granada kon nagapamulak na.
Didto ihatag ko sa imo ang akon gugma.
13Masimhutan mo ang kahamot sang mandragora,
kag ang tanan nga maayo nga mga prutas yara malapit sa aton pwertahan.
Hinigugma ko, gintigana ko sa imo
ang daan kag ang bag-o nga mga kawilihan.
Currently Selected:
Ang Amba sang Mga Ambahanon 7: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
