Ang Amba sang Mga Ambahanon 5
5
Ang Lalaki
1Nagsulod ako sa akon hardin,
hinigugma ko, akon asawa.
Ginatipon ko ang akon mira kag mga pahumot,
ginakaon ko ang akon dugos lakip ang iya balayan,
ginainom ko ang akon bino kag gatas.
Ang mga Babayi
Mga magkahagugma, magkaon kag mag-inom,
tubtob mahubog kamo sang gugma!
Ang Ikap-at nga Ambahanon
Ang Babayi
2Nagakatulog ako, pero ang akon tagipusoon nagabugtaw.
Nadamgo ko ang akon kahagugma nga nagapanuktok sa pwertahan.
Ang Lalaki
Pasudla ako, palangga ko, akon hinigugma,
himpit ko nga alimokon.
Ang akon ulo nabasa sang tun-og,
kag ang akon buhok nahum-og sang ambon.
Ang Babayi
3Nakauba na ako sang akon bayu,
isul-ob ko pa bala ini liwat?
Ginhinawan ko na ang akon mga tiil,
higkuan ko pa bala ini liwat?
4Ang akon kahagugma nag-uyat sang pintal sang pwertahan,
kag nakunyag ako nga malapit na sia.
5Handa na ako sa pagpasulod sang akon kahagugma.
Ang akon mga kamot nahibo sang mira,
ang akon mga tudlo nagatulo sang mira,
sa nagakapot ako sang uloyatan sang pwertahan.
6Ginbuksan ko ang pwertahan para sa akon kahagugma,
pero wala na sia.
Luyag ko gid mabatian ang iya tingog!
Ginpangita ko sia, pero wala ko sia makita.
Gintawag ko sia, pero wala gid sing sabat.
7Ang mga ronda nga nagapatrolya sa siudad nakakita sa akon,
ginbunal nila ako kag ginpilasan,
ang mga bantay sa pader sang siudad nagkuha sang akon kunop.
8Magsaad kamo sa akon, mga babayi sang Jerusalem,
nga kon makita ninyo ang akon kahagugma,
sugiri sia nga maluya ako tungod sang akon balatyagon.
Ang mga Babayi
9Labing matahom sa mga babayi,
lain gid bala ang imo kahagugma sang sa kay bisan sin-o?
Ano bala ang kinaayo sa iya
nga magsaad kami sa imo?
Ang Babayi
10Ang akon kahagugma gwapo kag mabukod,
isa lang sia sa napulo ka libo.
11Ang iya ulo kaangay sang isa ka puraw nga bulawan,
ang iya buhok kulongkulong,
subong ini kaitom sang uwak.
12Ang iya mga mata kaangay katahom sang mga alimokon sa tupad sang sapa nga nagailig,
nga napaligusan sing gatas kag nagatindog sa higad sang sapa.
13Ang iya mga pisngi subong katahom sang isa ka hardin
nga puno sing mga tanom nga mahamot.
Ang iya mga bibig kaangay sang mga lirio,
nga nagailig sing mira.
14Ang iya mga tudlo matanos,
kag nagasuksok sang mga singsing nga may mga tampok.
Ang iya hawak subong sang mapino nga tiposo,
nga napugtakan sang mga sapiro.
15Ang iya mga paa subong sang mga haligi nga alabastro
nga napahamtang sa mga sadsaran nga bulawan.
Ang iya dagway subong sang mga Kabukiran sang Libano
nga may pinakamaayo nga mga sedro.
16Ang iya mga bibig matam-is nga halukan,
ang tanan nga nahanungod sa iya nagapawili sa akon.
Mga babayi sang Jerusalem,
kaangay sini ang akon kahagugma.
Currently Selected:
Ang Amba sang Mga Ambahanon 5: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
