Ang Amba sang Mga Ambahanon 4
4
Ang Lalaki
1Daw ano katahom sa imo, palangga ko!
Daw ano ang pagsiga sang imo mga mata nga puno sang paghigugma,
nga natabunan sang imo belo.
Ang imo buhok nagasautsaot kaangay sang panong sang mga kanding
nga nagalumpatlumpat sa mga kabakuloran sang Galaad.
2Ang imo mga ngipon subong kaputi
sang bag-o lang maguntingan nga karnero
nga bag-o lang mapaligusan.
Wala sing isa sa ila nga nakulang,
sila tanan may nagakabagay nga pares.
3Ang imo mga bibig kaangay sang eskarlata nga laso,
daw ano sila katahom kon ikaw maghambal,
ang imo mga pisngi nga natabunan sang imo belo manayanaya.
4Ang imo liog kaangay sang tore ni David,
nga mabilogbilog kag mapino.
May kulintas ini nga daw ginapakabitan sang isa ka libo ka mga taming.
5Ang imo mga suso kaangay sang duha ka mga gasela,
kaangay sang kapid nga usa nga nagapanghalab sa tunga sang mga lirio.
6Tubtob nga maghuyop ang hangin sa kaagahon
kag ang kadudulman madula,
magapabilin ako sa bakulod sang mira,
sa bakulod sang insyenso.
7Daw ano katahom sa imo, palangga ko,
daw ano ka himpit sa imo!
8Upod ka sa akon gikan sa mga Kabukiran sang Libano, asawa ko,
upod ka sa akon gikan sa Libano.
Magdulhog ka gikan sa putokputokan sang Bukid sang Amana,
gikan sa Bukid sang Senir kag sa Bukid sang Hermon,
sa diin ang mga leon kag mga leopardo nagaestar.
9Ang panulok sang imo mga mata, hinigugma ko kag akon asawa,
kag ang kulintas nga imo ginasuksok
nagbihag sang akon tagipusoon.
10Ang imo gugma nagapahalipay sa akon,
hinigugma ko kag akon asawa.
Ang imo gugma mas matam-is pa sang sa bino,
ang imo agwa mas mahamot pa sang sa bisan ano nga pahamot.
11Ang katam-is sang dugos yara sa imo mga bibig, hinigugma ko,
ang imo dila gatas kag dugos para sa akon.
Sa imo bayu yara ang tanan nga kahamot sang Libano.
12Ang akon hinigugma, ang akon asawa, isa ka tinago nga hardin,
nakudalan nga hardin, nakudalan nga tuboran.
13Didto ang mga tanom nagatubo sing maayo.
Subong sang katamnan sang granada nga mga kahoy,
kag nagapatubas sing pinili nga mga prutas,
pahamot nga alhenya kag nardo,
14nardo kag asapran, kalamo kag kanela,
kag tanan nga mga kahoy nga nagapatubas sang insyenso,
mira kag aloe,
upod ang tanan nga pinakahamot nga mga agwa.
15Ang mga tuboran nagabunyag sang hardin,
ang kasulgan sang tubig
sa sapa nga nagailig gikan sa mga Kabukiran sang Libano.
Ang Babayi
16Pagmata, Amihan,
Habagat, huyop ka sa akon hardin,
pun-a ang kahanginan sang kahamot.
Pasudla ang akon kahagugma sa iya hardin
kag pakan-a sang pinakamaayo nga mga prutas sini.
Currently Selected:
Ang Amba sang Mga Ambahanon 4: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
