Sirac 51
51
Isa ka Ambahanon sa Pagpasalamat
1Magapasalamat ako sa imo, Ginoo kag Hari,
kag magadayaw sa imo, Dios nga akon Manluluwas.
Nagapasalamat ako sa imo ngalan,
2kay ikaw ang nag-apin kag nagbulig sa akon,
kag ginluwas mo ang akon lawas sa kalaglagan,
gikan sa siod sang butigon nga dila,
gikan sa mga bibig nga nagahambal sing mga binutig.
Kag sa atubang sang mga yara sa akon palibot
ikaw ang nagbulig sa akon,
3kag ginluwas mo ako.
Matuod ka sa imo daku nga kaluoy kag sa imo ngalan.
Gikan sa mga bangkil sang mga buot maggus-ab sa akon,
gikan sa mga kamot sang mga nagahingabot sang akon kabuhi,
gikan sa madamo nga mga pag-antos nga akon ginbatas,
4gikan sa kainit nga nagalibot sa akon,
gikan sa tunga sang dabdab nga indi ako ang nagpasiga,
5gikan sa kadadalman sa alibutod sang lulobngan,
gikan sa mahigko nga dila kag binutig nga hambal,
6sa dila nga nagasumpa sing binutig sa pagpakalain sa akon sa atubang sang hari.
Diutayan na lang ako mapatay,
malapit na lang ako sa lulobngan.
7Ginlibutan nila ako,
wala sing isa nga makabulig sa akon,
nagpangita ako sang isa nga makabulig sa akon,
pero wala gid.
8Dayon nadumdoman ko ang imo kaluoy, O Ginoo,
kag ang imo mga binuhatan sang una nga mga panahon,
kon paano mo ginluwas ang mga nagahulat sa imo sing may pagpailob,
kag ginluwas mo sila sa mga kamot sang ila mga kaaway.
9Kag nagpadala ako sang akon pag-ampo halin diri sa duta,
nagapakitluoy ako nga luwason sa kamatayon.
10Nagpanawag ako, “O Ginoo, ikaw ang akon amay,
indi ako pagsikwaya sa mga inadlaw sang pag-antos,
sa tion nga wala ako sing mahimo sa mga bugalon.
11Dayawon ko ang imo ngalan sa walay katapusan,
kag magakanta ako sa pagdayaw nga may pagpasalamat.”
Kag ginpamatian ang akon pag-ampo
12kay ginluwas mo ako sa kalaglagan,
kag ginluwas mo ako sa sinang tion sang kalautan.
Gani, magapasalamat kag magadayaw ako sa imo,
kag dayawon ko ang ngalan sang Ginoo.
Ang Pagpangita sang Kaalam
13Sang pamatan-on pa ako, sa wala pa ako magpanglakaton,
sa akon pangamuyo, nagpangayo ako sing hayag nga hatagan ako sing kaalam.
14Sa gwa sang santuaryo nagpangamuyo ako tungod sa iya,
kag tubtob sa katapusan magapadayon ako sa pagpangita sa iya.
15Halin sa iya pagpamukadkad tubtob maluto ang iya mga bunga
ang akon tagipusoon nagakalipay sa iya.
Ang akon tiil naglakat sa tadlong nga dalan,
ginsunod ko ang iya mga tikang halin pa sa akon pagkapamatan-on.
16Paagi sa diutay nga pagpamati nabaton ko ang kaalam,
kag nakakita ako sang madamo nga mga pagtulon-an.
17Salamat sa iya kay nag-uswag ako.
Ang himaya mangin sa tagsatagsa nga naghatag sa akon sing kaalam!
18Kay nagpamat-od ako nga ibutang sia sa buhat,
nagtinguha ako sa paghimo sing maayo,
kag indi ako mahuy-an.
19Ang akon kalag nagpanikasog sa pag-angkon sa iya,
nagtuman ako sing maid-id sang Kasugoan,
ginbayaw ko ang akon mga kamot sa langit
kag naglalaw ako tungod sang akon di-pagkilala sa iya.
20Ginpatuhoy ko ang akon kalag sa iya,
kag paagi sa akon pagkaputli nakita ko sia.
Kay halin sa ginsugoran ang akon tagipusoon ginpahamtang ko sa iya,
indi niya ako pagbayaan.
21Tungod kay ang akon tagipusoon naghandom sa pagpangita sa iya,
karon nakaangkon ako sang isa ka maayo nga pagkabutang.
22Subong nga padya, ang Ginoo naghatag sa akon sing dila,
nga paagi sini magakanta ako sa pagdayaw sa iya.
23Magpalapit kamo sa akon, kamo nga wala pa matudloi,
magpungko sa akon eskwelahan.
24Ngaa magreklamo kamo kay wala kamo sini,
kon ang inyo mga kalag nagakauhaw sini?
25Nag-abri ako sang akon baba kag naghambal:
“Angkuna sia nga wala sing bayad,
26itakod ang iya gota sa inyo mga liog,
kag magbaton kamo sang mga pagtudlo,
indi sia mabudlay pangitaon.
27Tan-awa bala ninyo: wala gid man ako mabudlayi
sa pag-angkon sang daku nga kalinong.
28Paagi sa mga pagtuon ayhan magastohan ka sing madamo nga pilak,
pero salamat sa iya makaganansya ka sing madamo nga bulawan.
29Kabay nga ang inyo mga kalag magakalipay sa kaluoy sang Ginoo,
kabay nga indi gid kamo magkahuya sa pagdayaw sa iya.
30Himua ang imo hilikuton sa wala pa ang natalana nga tion,
kag sia sa iya tion magahatag sa imo sing balos.”
Currently Selected:
Sirac 51: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012