Sirac 50
50
Si Simon Anak ni Onias
1Ang Pinakamataas nga Pari nga si Simon nga anak ni Onias
amo ang nagpakaayo sang Templo sang sia buhi pa,
kag sa iya panahon ginpalig-on niya ang santuaryo.
2Sia ang nagpahamtang sang mga sadsaran sang mataas kag doble nga pader,
kag ang mataas nga pader sa palibot sang Templo.
3Sang iya panahon ginkutkot ang bubon,
isa ka kuluhaan sing tubig nga pareho kadako sang manipulon nga tangke nga bronsi.
4Sa iya handom nga maluwas ang iya mga tawo sa kalaglagan,
ginpalig-on niya ang siudad batok sa pagsalakay sang mga kaaway.
5Daw ano ka mahimayaon sa iya upod sa mga tawo nga nagalibot sa iya,
sang paggwa niya sa Labing Balaan nga Duog.
6Kaangay sang bituon sa pamanagbanag sa tunga sang mga panganod,
kaangay sang ugsad nga bulan,
7kaangay sang adlaw nga nagasilak sa Templo sang Labing Mataas,
kaangay sang balangaw nga nagabanaag batok sa masilaw nga mga panganod,
8kaangay sang mga rosas sa panahon sang pagtubo sang mga tanom,
kaangay sang mga lirio sa tupad sang tuboran sang mga tubig,
kaangay sang mga sedro sang Libano sa panahon sang tingadlaw,
9kaangay sang kalayo kag insyenso sa insensario,
kaangay sang kupa nga pinapa nga bulawan
nga napunihan sang tagsa ka sahi sang malahalon nga bato,
10kaangay sang isa ka kahoy nga olivo nga nagapamungingi sing mga bunga,
kaangay sang sipres nga nagalambot sa mga panganod.
11Sang pagsuksok ni Simon sang iya matahom nga bestidora
kag nagsaka sia sa balaan nga altar
nga napanaptan sa himpit nga himaya,
ang pasiyuhan sang Templo tungod sa iya nanginmahimayaon kon tulokon.
12Kag sang batunon niya ang mga inughalad gikan sa kamot sang mga pari,
sia gid nagtindog sa tupad sang altar,
nga ginalibutan sang madamo niya nga mga utod nga lalaki.
Kaangay sia sang isa ka linghod nga sedro sa Libano,
nga daw ginalibutan sang mga palma.
13Sang ang tanan nga mga anak nga lalaki ni Aaron sa ila mahimayaon nga mga bayu,
nga ang mga halad sa Ginoo yara sa ila mga kamot,
nagtindog sila sa atubang sang katilingban sang Israel.
14Samtang ginatapos niya ang mga tulomanon sa mga altar,
nga nagadulot sing nagakabagay nga halad para sa Labing Mataas, ang Makagagahom,
15gin-uyatan niya ang kupa,
kag gin-ula ang ilimnon nga duga sang ubas,
gin-ula ini sa tiilan sang altar,
ang kahumot nga naluyagan sang Labing Mataas, ang Hari sang tanan.
16Dayon ang mga anak nga lalaki ni Aaron nagsinggit
kag nagpatunog sang ila mga trumpeta nga nahimo sa pinapa nga metal,
kag mabatian ang daku nga ginahod
subong pagpahanumdom sa atubang sang Labing Mataas.
17Kag sa gilayon ang tanan nga mga tawo
nagahapa sing tingob sa duta
sa pagsimba sa ila Ginoo,
ang Makagagahom, ang Dios nga Labing Mataas.
18Kag upod sa mga kantora nga nagaamba sang ila mga kanta sang pagdayaw,
matam-is ang lanton sang ila mga tingog.
19Ang mga tawo nagapakitluoy sa Ginoo
nga Labing Mataas kag Maluloy-on,
tubtob natapos ang pagsimba
kag ang mga tulomanon nahimo.
20Dayon#Num. 6:24-27. nagpanaog si Simon kag nagbayaw sang iya mga kamot
sa ibabaw sang katilingban sang Israel,
sa paghatag sa ila sang bendisyon sang Ginoo gikan sa iya mga bibig,
kag sa paghimaya sa iya ngalan.
21Kag sa liwat ang mga tawo naghapa
sa pagbaton sang bendisyon halin sa Labing Mataas.
Ang Bendisyon
22Kag karon dayawon ang Dios sang bug-os nga kalibutan,
ang nagahimo sang gamhanan nga mga binuhatan bisan diin,
nga nagbayaw sang aton mga inadlaw halin sa aton pagkatawo
kag nagkaluoy sa aton.
23Kabay nga bugayan niya kita sing malipayon nga mga tagipusoon
kag magdala sing paghidait sa aton panahon
sa Israel, sa wala sing katapusan.
24Kabay ang iya kaluoy mag-ubay sa gihapon sa aton,
kag kabay nga luwason niya kita sa tion sang aton pagkinahanglan.
Ang Tatlo ka Ginadumtan nga mga Pungsod
25May duha ka pungsod nga ginkaugtan sang akon kalag,
ang ikatlo indi gid man isa ka pungsod:
26Ang mga pumoluyo sa bukid sang Seir, kag ang mga Filistinhon
kag ang buangbuang nga mga tawo nga nagaestar sa Siquem.
Ang Kaalam ni Jesus, Anak ni Sirac
27Ang mga pagtudlo sa kaalam kag ihibalo
sa sini nga libro ginsulat ni Jesus,
anak ni Sirac, anak ni Eleazar nga taga-Jerusalem,
nga nagpaulan sing kaalam halin sa iya tagipusoon.
28Malipayon ang tawo nga nagapamalandong sini nga mga butang,
kag nagatubo sa kaalam sa paghupot sini sa iya tagipusoon.
29Kag kon tumanon niya ini, manginmabakod sia sa tanan nga butang,
tungod kay ang kapawa sang Ginoo amo ang iya alagyan.
Currently Selected:
Sirac 50: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012