Sirac 43
43
Ang Adlaw
1Daw ano katahom sang masanag kag mahawan nga kahawaan sa ibabaw naton!
Daw ano ka mahimayaon nga lalantawon ini!
2Sa paggwa sang adlaw, nagapahayag ini sa iya pagbutlak,
ang butang nga makatilingala amo ang binuhatan sang Labing Mataas.
3Sa iya pagtaas ginapamala niya ang duta,
sin-o ang makaagwanta sa iya kainit?
4Ang tawo nagadabok sang hornohan sa pagpainit sini,
pero ang adlaw nagasunog sang mga bukid sing makatlo ka pilo.
Nagapasungaw ini sang init kag nagapagwa ini sang silak
nga masilaw sa mga mata.
5Gamhanan ang Ginoo nga naghimo sini,
kag sa iya sugo nagapadayon ini sa iya alagyan.
Ang Bulan
6Kag dayon, ang bulan nga wala nagaatrasar,
sa pagtanda sang mga binulan kag sa pagpain sang mga panahon.
7Ang bulan amo ang talandaan sang mga piesta,
isa ka kapawa nga nagaamat dulom sa tapos ang iya pag-ugsad.
8Ang ngalan sang mga binulan nagahalin sa iya,
katahom sa iya kon magbaylo ang iya dagway,
bandera sang mga hangaway sa kahitaasan
nga nagasiga sa kahawaan sang langit.
Ang mga Bituon
9Ang himaya sang mga bituon amo ang nagapatahom sang langit,
isa ka masilaw nga adorno sa kahitaasan sang Ginoo.
10Sa paghambal sang balaan nga Dios nahamtang sila suno sa iya pagmando,
wala gid sila nagapalta sa ila pagbantay.
Ang Balangaw
11Tan-awa ang balangaw kag dayawa ang naghimo sini.
Daw ano katahom sang iya sini himaya.
12Sa palibot sang kalangitan nagaporma ini sing mahimayaon nga kurba
nga gindibuho sang mga kamot sang Labing Mataas.
Ang mga Kalatingalahan sang mga Tinuga
13Sa iya pagmando nagakalahulog ang mga yelo,
nagapangilat sa pagtuman sang iya mga paghukom.
14Gani ginabuksan ang mga talaguan sang iya manggad sa kahawaan,
kag ang mga panganod nagalupad kaangay sang mga pispis.
15Sa iya daku nga gahom ginatipon niya ang mga panganod,
kag ginapamuka niya ang mga yelo nga daw mga bato.
16-17Sa iya atubang nagakurog ang mga bukid
sa pagtunog sang daguob, ang duta nagalubid sa kasakit.
Sa iya kabubot-on, nagahuyop ang habagat
ukon nagaporma ang bagyo sa aminhan kag ang buhawi.
Ginawisik niya ang mga yelo kaangay sang mga pispis nga nagahugpa,
nagahugpa ini kaangay sang mga apan.
18Ang mata nagadayaw sang katahom sang iya kaputi
kag ang hunahuna natingala sang iya pagkalahulog.
19Kaangay sang asin, nagaula sia sing mga yelo sa ibabaw sang duta,
nga kon magbilog ini nagatig-a kaangay sang mga tunok.
20Ang mabugnaw nga hangin nagahuyop halin sa aminhan,
kag ang yelo nagaporma sa ibabaw sang tubig,
nga napahamtang sa kalaparan nga tubigon,
kag ginasuksok ini sang tubig subong panaming sa dughan.
21Ginahalunhon niya ang mga kabukiran kag ginapakigas ang desierto,
kaangay sang kalayo ginapalaya niya ang mga tanom.
22Pero ang ambon nagaayo sang tanan sa nagakaigo nga tion,
sa tapos ang init nagatupa ang tun-og nga nagapabuhi.
23Sa iya kaalam ginpalinaw niya ang kadagatan,
kag ginpamutangan ini sing mga isla.
24Ang mga nagapanakayon sa kadagatan magasugid sang iya sini mga katalagman,
ang ila mga ginasugid nagapuno sa aton sing katingala.
25Kay didto may makatalanhaga kag makatilingala nga mga binuhatan,
tagsa ka sahi sang mga sapat kag dalagku nga mga tinuga sa kadagatan.
26Salamat sa iya, ang tanan nahimo sing maayo,
ang tanan nga mga tinuga nagaalalangot tungod sang iya pulong.
27Bisan madamo ang aton mahambal indi pa maurot ang aton inugsiling,
sa malip-ot nga pulong, “Sia amo ang tanan.”
28Sa diin kita makuha sing tuman nga gahom sa pagdayaw sa iya?
Kay sia ang Gamhanan, labaw sa tanan niya nga mga binuhatan.
29Ang Ginoo makakulogmat, labing gamhanan,
kag makatilingala sa iya gahom.
30Bayawa ang Ginoo sa imo mga pagdayaw tubtob sa imo masarangan—
sa gihapon labaw pa sia sa imo mga pagpahayag.
Ubosa ang imo tanan nga kusog kon ikaw magdayaw sa iya.
Indi ka magkataka, kulang pa ang imo pagdayaw sa iya.
31Sin-o bala ang nakakita sa iya sa pagsaysay sa iya?
Sin-o bala ang makadayaw sa iya nga nagakabagay sa iya?
32May madamo pa nga mga katanhagaan nga labaw pa sang sa sini,
kay diutay lamang sang iya mga binuhatan ang aton nakita.
33Ang Ginoo mismo ang naghimo sini tanan nga mga butang,
kag naghatag sing kaalam sa diosnon nga mga tawo.
Currently Selected:
Sirac 43: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012