Sirac 44
44
Ang Kadayawan sang Dios sa Maragtas
1Karon, dayawon naton ang bantog nga mga tawo,
ang aton mga katigulangan sa ila palaagisod nga mga kaliwatan.
2Ang Ginoo nagpasidungog sa ila sing bugana nga himaya,
kag nagpahayag paagi sa ila sang iya pagkagamhanan halin sang una gid nga mga panahon.
3Ang iban nag-angkon sing gahom subong mga hari
kag nabantugan tungod sang ila kusog;
ang iban maalam nga mga manuglaygay
kag naghambal sang kabubot-on sang Dios.
4Ang iban nagtuytoy sang mga tawo paagi sa ila mga laygay,
tungod sang ila paghangop sang panghunahuna sang kalabanan,
kag paagi sa maalam nga mga pulong nga ila ginatudlo.
5Ang iban nagsulat sing mga ambahanon,
kag naghimo sing mga binalaybay.
6Ang iban manggaranon kag gamhanan
nga nagapangabuhi sing matawhay sa ila mga balay.
7Ini sila tanan ginpasidunggan sang ila mga katubotubo,
kag nanginbantog sa ila mga inadlaw.
8Ang iban sa ila nagbilin sang maayo nga ngalan,
sa bagay nga ginakanta pa gihapon ang pagdayaw sa ila.
9Samtang ang iban wala sing ginbilin nga handumanan,
kag nagtaliwan lamang nga daw wala man magkabuhi,
karon daw pareho lang nga wala sila magkabuhi
kag amo man ang ila mga anak nga nagsunod sa ila.
10Pero yari ang lista sang maalwan nga mga tawo
nga ang ila maayo nga mga binuhatan wala malipatan.
11Sa ila mga kaliwat may nabilin nga manggad
nga palanublion sang ila mga anak.
12Ang ila mga kaliwat nagatindog sa mga kasugtanan, kag salamat sa ila,
amo man ang mga kabataan sang ila mga anak.
13Ang ila mga kaliwat magapadayon sa walay katapusan,
ang ila kabantugan indi mawala.
14Ang ila mga bangkay ginlubong nga may kalinong,
kag ang ila mga ngalan nagakabuhi sa tanan nga mga kaliwatan.
15Ang mga kapungsoran magapahayag sang kaalam sining mga tawo,
ang katawhan sang Dios magadayaw sa ila.
Si Enoc
16Si#Gen. 5:24; Heb. 11:5; Jud. 14. Enoc nagpahamuot sa Ginoo kag gindala sia paibabaw sa langit,
isa ka sulondan sang paghinulsol sang tanan nga mga kaliwatan.
Si Noe
17Si#Gen. 6:9–9:17. Noe nasapwan nga himpit kag matarong,
sa tion sang kaakig nahimo sia nga buhi nga salingsing.
Tungod sa iya may nabilin nga kaliwat sa duta
sang pag-abot sang anaw.
18Ang walay katapusan nga mga kasugtanan ginhimo sa iya nga wala na gid sing anaw
nga magalaglag sang tanan nga buhi nga mga tinuga.
Si Abraham
19Si#Gen. 15:1–17:27; 22:1-18. Abraham ang gamhanan nga amay sang madamo nga mga kapungsoran,
wala sing makatupong sa iya kadungganan.
20Gintuman niya ang Kasugoan sang Labing Mataas,
kag naghimo sing kasugtanan upod sa iya.
Ginbutang niya ang kasugtanan sa iya kaugalingon nga lawas,
kag nagpamatuod sang iya kaugalingon nga matutom sa idalom sang pagtilaw.
21Gani ang Ginoo nagpanumpa sa iya
sa pagbendisyon sang mga kapungsoran paagi sa iya mga kaliwatan,
sa pagpadamo sa iya kaangay sang yab-ok sa duta,
sa pagbayaw sang iya mga kaliwat kaangay sang mga kabituonan,
kag hatagan sila sang duta nga ila panublion, halin sa isa ka dagat pakadto sa isa,
kag halin sa Suba sang Eufrates pakadto sa mga punta sang duta.
Si Isaac kag si Jacob
22Tungod#Gen. 17:19; 26:3-5; 27:28; 28:14. sang iya amay nga si Abraham
nagsaad man ang Ginoo kay Isaac sing bendisyon
para sa tanan nga mga katawhan;
23ginpahamtang niya ang kasugtanan sa ulo ni Jacob.
Ginpalig-on niya sia sa iya mga bendisyon
kag ginhatag sa iya ang duta nga iya panublion,
ginparti niya ini
kag ginhatag sa dose ka mga tribo.
Currently Selected:
Sirac 44: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012