Sirac 42
42
Ang mga Dapat Ipabugal
1Amo ini nga mga butang ang indi mo pag-ikahuya,
kag indi ka magpakasala paagi sa kahadlok kon ano ang hunahunaon sang iban:
2nahanungod sang Kasugoan sang Labing Mataas kag sang iya kasugtanan,
sang paghukom nga nagakabagay sa mga di-diosnon,
3sang paghatag sing husto nga husay sa imo upod sa pagpanglakaton,
sa paghatag sang parti sang imo mga abyan,
4sang imo husto nga mga talaksan kag timbangan,
sang imo ganansya nga dalagku ukon magamay,
5sang imo ganansya sa negosyo,
sang imo pagdisiplina sing maid-id sang imo mga kabataan,
sang imo paghanot sa malaut nga ulipon tubtob maggwa ang iya dugo.
6Sa asawa nga mahilabtanon, maayo nga gamiton mo ang imo kandado,
kag sa diin may madamo nga mga kamot, trangkahi ang imo mga pagkabutang.
7Sa bisan ano nga ginapatago sa imo, isipa ini kag timbanga,
kag ang imo ginagasto kag ginabaton, ilista gid.
8Indi ka magkahuya sa pagtudlo sang tawo nga ignorante ukon buangbuang
kag sang isa ka tigulang nga nagaupod-upod sa mga babayi nga imoral.
Dayon mapakita mo nga ikaw isa ka edukado
kag maluyagan ka sang tanan.
Ang mga Amay kag ang mga Anak nga Babayi
9Bisan#Sir. 7:24-25; 26:10-12. wala niya ginapasat-om sa iya anak nga babayi, ang amay indi makatulog
tungod sang iya pakabalaka nahanungod sa iya.
Kon sia pamatan-on pa, basi indi sia makapamana,
kon makapamana na sia, basi kon indi sia magmalipayon sa iya bana.
10Kon birhen pa sia, basi lugoson sia
kag masapwan nga nagabusong sa poder sang iya amay,
kag kon may bana na sia, basi kon magluib sia,
ukon basi man baw-as sia.
11Kon ang imo anak nga babayi matig-a sing ulo, bantayi gid sia sing maayo,
agod indi ka pagkadlawan sang imo mga kaaway.
Libakon ka sang banwa, kag kutsokutsohon
kag mahuy-an ka sa atubang sang mga tawo.
Mga Babayi
12Indi pagtuloka ang tawo tungod sang iya ka gwapo,
indi ka magpungko upod sa mga babayi,
13kay ang sapatsapat nagagwa sa mga bayu,
kag gikan sa babayi nagaabot ang kalautan.
14Mas maayo pa ang pagkalaut sang isa ka lalaki sang sa kaayo sang isa ka babayi,
kay ang babayi amo ang nagadala sing kahuloy-an kag pagtamay.
Ang Himaya sang Dios sa mga Tinuga
15Karon, pahanumdomon ko kamo sang mga binuhatan sang Ginoo,
kag sugiran ko kamo sang akon nakita.
Paagi sa mga pulong sang Ginoo ang tanan nahimo
kag ang tanan nga mga tinuga nagatuman sa iya.
16Subong nga ang adlaw nga nagasiga nagatan-aw sa tanan nga mga butang,
amo man ang mga binuhatan sang Ginoo puno sang iya himaya.
17Ang Ginoo wala maghatag sa iya mga angheles sang gahom
sa pagsugid nahanungod sang iya mga katilingalahan
nga gintuga sing malig-on sang Makagagahom nga Ginoo
agod ang kalibutan mapasad sing malig-on sa iya himaya.
18Gintungkad niya ang kadagatan kag ang tagipusoon sang tawo,
kag nakahibalo sia sang ila dayaon nga mga paagi.
Kay ang Labing Mataas nakahibalo sang tanan,
kag nakahangop sang mga tanda sang mga panahon.
19Ginapahayag niya ang nagligad kag ang palaabuton,
kag ginapakita niya ang tinago nga mga butang.
20Wala sing panghunahuna nga makalikaw sa iya,
wala sing pulong nga matago sa iya.
21Ginpahamtang niya ang dalagku nga mga binuhatan sang iya kaalam,
kag nagikan sia sa walay katapusan tubtob sa walay katapusan.
Wala sing sarang madugang, ukon mabuhin sa iya,
kag wala sia kinahanglan sing laygay.
22Daw ano katahom sang iya mga hinimuan,
daw ano ka makagalanyat sa mata!
23Sila tanan nagakabuhi kag nagapadayon sa walay katapusan,
sa bisan ano nga kahimtangan, sila tanan nagatuman sa iya.
24Ang tanan nga mga butang nagaparisparis, ang isa lain sa isa,
kag wala sia sing nahimo nga may depekto.
25Ang isa nagabulig sa kaayo sang isa;
sin-o bala ang matak-an sa pagtan-aw sang iya himaya?
Currently Selected:
Sirac 42: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012