Sirac 38
38
Ang Masakit kag Bulong
1Pasidunggi ang manugbulong tungod sang iya mga pagserbisyo,
kay ang Ginoo amo man ang nagtuga sa iya.
2Ang pag-ayo nagagikan sa Labing Mataas,
kaangay sa isa ka dulot halin sa hari.
3Ang ihibalo sang manugbulong nagapataas sa iya sa katilingban,
kag ginadayaw sia sang mga kadalagkuan.
4Ang Ginoo naghimo sing mga bulong gikan sa duta,
kag ang maalam nga tawo indi maghikay sini.
5Indi#Exo. 15:23-25. bala nga sadto anay ang isa ka kahoy amo ang nagpatam-is sang tubig
kag tungod sini nakilala ang gahom sang Ginoo?#38:5 ang gahom sang Ginoo: ukon ang mga kinaiya sini sa pagbulong.
6Ang Ginoo naghatag man sang ihibalo sa mga tawo,
agod nga magdayaw sila sang iya gamhanan nga mga binuhatan.
7Ginagamit niya ini sa pag-ayo kag sa pagbulong sang mga masakit.
8Gikan sini ang mga parmasyutika nagatempla sing mga bulong.
Wala sing katapusan ang mga bulohaton sang Ginoo,
nga nagapalapnag sang maayo nga panglawason sa bug-os nga kalibutan.
9Anak ko, kon may balatian ka, indi magpangasubo
kundi magpangamuyo ka sa Ginoo, kag sia magaayo sa imo.
10Magbiya ka sa imo mga sala, kag bayluhi ang imo mga pagginawi,
kag tinloi ang imo tagipusoon sa tanan nga sala.
11Magdala ka sing dulot nga insyenso kag sang halad nga pinili nga harina,
kag magmaalwan sa imo dulot suno sa imo masarangan.
12Dayon magtawag ka sing manugbulong, kay ang Ginoo amo man ang nagtuga sa iya,
indi pagtugoti nga bayaan ka niya kay kinahanglan mo sia.
13Kon kaisa ang imo pag-ayo nasandig sa ila,
14kay sila magapangamuyo man sa Ginoo
sa paghatag sa ila sing kadalag-an sa pag-ayo sang masakit
kag sa pagluwas sang iya kabuhi.
15Kon ang isa ka tawo makasala batok sa iya Manunuga,
nagakabagay sa iya nga magmasakit.
Ang Paglalaw sa Minatay
16Anak#Sir. 22:11-12. ko, maghibi ka tungod sa patay,
magpanalambiton ka tungod sang imo daku nga kasubo.
Pasidunggi ang iya bangkay sang nagakabagay sa iya
kag indi pagpabay-i ang paglubong sa iya.
17Maghibi ka nga may kapait, kag magpanalambiton ka sing tudo,
maglalaw ka sing takos sa iya.
Maglalaw ka tungod sa iya sing isa ukon duha ka adlaw agod indi ka paghambalon,
dayon magkalipay ka sa imo pagpangasubo.
18Kay mahimo nga ang kasubo manginkabangdanan sang kamatayon,
kag ang masinulob-on nga tagipusoon nagapaluya sang kusog.
19Untati ang pagpangasubo sa tapos ang lubong,
kay ang pagpadayon sini magadala sa imo sa kaimulon.
20Indi pagpabay-i ang imo kaugalingon sa pagpangalisod,
untati ini, kag dumdoma ang imo kaugalingon nga palaabuton.
21Indi gid pagkalimti nga wala na sing paglaom sa pagbalik niya,
indi ka na makabulig sa iya kag mahalitan mo lang ang imo kaugalingon.
22Dumdoma nga ang iya naabutan mangin-imo man,
“Karon nga adlaw akon, kag buas imo man.”
23Kon ang patay nagapahuway na, papahuwaya man ang iya handumanan.
Indi ka magdula sang paglaom kon magtaliwan na sia.
Ang Pagtuon kag ang Iban nga mga Palangitan-an
24Ang kaalam sang manunodlo sang kasugoan nagagikan sa iya tiempo sa pagtuon,
kag ang tawo nga wala sing madamo nga obra may tion sa pagkuha sing kaalam.
25Ano ang pag-alam sang isa ka tawo nga ang iya obra amo ang pag-arado,
kag ang iya lamang handom amo ang paggamit sang latigo
nga nagapalakat sang mga baka,
kag amo lamang ini ang ginahambal niya?
26Ang iya ginapadaluman sing hunahuna amo ang pagtadlong sang iya mga idas,
kag nagapulaw sa paghatag sang kumpay sa iya mga tinday nga baka.
27Gani amo man ini sa tagsa ka panday kag sa tagsa ka manugdibuho
nga nagaobra sa adlaw kag sa gab-i,
amo man ang nagasilsil sa mga selyo,
kag pirme lang nagapahito sang bag-o nga mga dibuho.
Nagatinguha gid sila sa paghimo sang maayo nga kaanggid,
kag nagapakagab-i sa pagtapos sang ila obra.
28Gani, matuod man ini sa panday sa salsalon nga nagapungko sa luyo sang iya landasan,
nga nagahunahuna nahanungod sang iya ginaobra nga salsalon.
Ang aso sang kalayo nagpakurinot sang iya panit,
samtang nagapakigsumpong sia sa init sang horno.
Ang hagunghong sang maso nagpabungol sang iya dulonggan,
kag ang iya mga mata napatuhoy sa sulondan.
Ginatinguhaan gid niya ang pagtapos sang iya obra,
kag nagapulaw sia sa pagpatahom sini.
29Amo man ang nagadihon sang kolon nga nagapungko sa iya obra,
nga nagapatiyog sang aliling sa iya tiilan,
nga ang iya ginahunahuna amo lamang ang iya obra
kag ginaisip niya kon ano kadamo ang iya mahimo.
30Ginadihon niya ang lunang sa iya butkon,
kag ginabuligan ini sang iya mga tiil.
Ginapanami gid niya ang paghining,
kag nagapulaw sia sa pagtinlo sang horno.
31Ini tanan nagadepende sa ila mga kamot,
kag ang tagsatagsa may abilidad sa iya obra.
32Kon wala sila, wala sing mga tawo nga luyag mag-estar sa sina nga siudad.
Wala sing bag-o nga mga pumoluyo,
ukon mga nagapanglakaton didto.
33Pero wala sila ginakinahanglan sa mga pagbinais sa konseho,
kag indi gid sila kilala sa katilingban.
Wala sila nagapungko sa pulongkuan sang mga hukom
kag wala sila makahangop sang mga kasugoan.
Indi sila makasaysay sang maayo kag matarong nga mga pagsulondan,
kag indi sila makahangop sang mga hulobaton.
34Pero sila ang nagapalig-on sini nga kalibutan
samtang nagapangamuyo sila nahanungod sang ila adlaw-adlaw nga mga bulohaton.
Currently Selected:
Sirac 38: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012