Sirac 39
39
Ang Maalam nga Tawo
1Daw ano ang kinatuhay sang tawo nga nagagamit sang iya tion sa pagtuon sang Kasugoan sang Labing Mataas,
nga nagahinguyang sang iya tion sa pag-usisa sang kaalam sang mga tawo sang una,
kag sa pagtuon sang mga ginhambal sang mga propeta!
2Ginatipigan niya ang mga hambal sang bantog nga mga tawo
kag ginahantop niya ang madalom nga mga kahulogan sang mga palaanggiran.
3Ginausisa niya ang tinago nga mga kahulogan sang mga hulobaton
kag nagabinagbinag sang indi maathag nga mga butang sang mga palaangiran.
4Magaalagad sia sa gamhanan nga mga tawo,
kag makita sa atubang sang mga pangulo.
Nagapanglakaton sia sa iban nga mga pungsod
kag iya ginatun-an ang maayo kag malain nga yara sa tawo.
5Nagatinguha sia sa pagbugtaw sing aga pa,
sa pagpangamuyo sa Ginoo nga iya Manunuga,
kag nagapangamuyo sia sa Labing Mataas,
nga nagapangayo sing kapatawaran tungod sang iya mga sala.
6Kon but-on sang Ginoo nga gamhanan,
mapun-an sia sang espiritu sang kaalam.
Dayon magahambal sia nga may kaalam
kag magapangamuyo sia sa pagpasalamat sa Ginoo.
7Magahatag sia sing maayo nga laygay kag sarang sia makatudlo sing kinaalam,
kag magapamalandong sia sang mga kalatingalahan nga iya sang Ginoo.
8Ipahayag niya ang iya kaugalingon nga tinun-an,
kag ipabugal niya ang Kasugoan sang kasugtanan sang Ginoo.
9Madamo ang magadayaw sang iya kaalam,
kay indi gid ini malimtan.
Ang iya handumanan indi madula,
kundi ang iya ngalan magakabuhi sa kaliwatan kag sa kaliwatan.
10Ang mga Hentil magahambal nahanungod sang iya kaalam
kag ang katilingban magakanta sa pagdayaw sa iya.
11Kon magkabuhi sia sing malawig, ang iya ngalan manginlabi pa kabantog sang sa iban nga mga isa ka libo,
kag kon mapatay sia, tuman na ini sa iya.
Kalantahon sa Pagdayaw sa Dios
12May yara pa sa akon hunahuna nga inughambal,
puno gid ako pareho sang isa ka bulan nga ugsad.
13Pamati kamo sa akon, mga matutom ko nga mga anak, kag magpamukadkad kamo
kaangay sang mga rosas nga natanom sa tupad sang isa ka sapa.
14Palaptaha ang inyo kahamot kaangay sang insyenso,
kag magpamukadkad kaangay sang lirio.
Palaptaha ang inyo kahamot, bayawa ang inyo mga tingog sa pagkanta
nga nagadayaw sa Ginoo tungod sang iya mga binuhatan.
15Ipakilala ang pagkahalangdon sang iya ngalan
kag magpasalamat sa iya nga may pagdayaw,
nga may mga ambahanon sa inyo mga bibig, kag pagtinukar sang mga arpa,
kag mangin-inyo ini mga pulong sa pagpasalamat:
16“Ang tanan nga ginhimo sang Ginoo maayo gid,
ang tanan niya nga mga sugo matuman sa nagakaigo nga tion.”
17Wala sing may magpamangkot, “Ano bala ini?” ukon “Ano bala ina?”
Sa nagakaigo nga tion ini tanan nga sahi sang mga pamangkot masabat.
Sang paghambal niya ang tubig nag-untat sa pag-ilig kag nagpihak
kag nagtipon ang tubig tungod sa iya pulong.
18Kon magmando sia, ang iya tinutuyo matuman,
kag wala sing isa nga makabalabag sa iya gahom sa pagluwas.
19Makita niya ang tanan nga ginabuhat sang tanan nga mga tawo,
wala sing matago sa iya atubang.
20Halin sa ginsugoran tubtob sa katapusan sang panahon nagabantay sia,
kag wala sing butang nga tama ka makatilingala para sa iya.
21Wala sing isa nga dapat magpamangkot, “Ano bala ini?” ukon “Ano bala ina?”
Ang tagsa ka butang gintuga nga may tinutuyo.
22Ang iya bugay kaangay sang nagabaha nga suba
nga nagapahumok sa kigas nga duta.
23Iya ginbayluhan ang tab-ang nga tubig nga manginmaasin,
kag iya ginpatuhoy ang iya kaakig sa mga kapungsoran.
24Para sa mga diosnon ang iya mga dalan matadlong,
pero para sa mga malaut, puno ini sing mga katalagman.
25Halin sa ginsugoran ang maayo nga mga butang gintuga para sa maayo nga mga tawo,
kag ang malaut nga mga butang para sa mga makasasala.
26Ang importante nga mga kinahanglanon sang kabuhi sang tawo
amo ang tubig kag kalayo, salsalon kag asin,
harina, dugos kag gatas,
ang duga sang ubas, lana kag mga bayu.
27Ini tanan maayo para sa mga nagatahod sa Dios,
pero ini tanan manginmalaut para sa mga makasasala.
28May mga hangin nga gintuga sa pagsilot,
ginhimo niya ini nga inughanot tungod sang iya kaakig;
sa adlaw sang pagsilot, buy-an nila ang ila kusog
kag maumpawan ang kaakig sang nagtuga sa ila.
29Ang kalayo kag yelo nga daw mga bato, gutom kag makamamatay nga mga balatian,
ini tanan gintuga sa pagsilot.
30Ang mga ngipon sang mga sapat nga mabangis, ang mga iwiiwi kag mga man-og,
kag ang espada nga nagatimalos nga nagalaglag sa mga di-diosnon,
31nasadyahan sila sa pagtuman sang mga sugo sang Ginoo,
nga nakahanda sa gihapon sa pag-alagad sa iya sa duta.
Kag kon mag-abot ang ila tion,
wala gid sila nagalapas sa iya sugo.
32Napat-od ko na ini tanan halin sa ginsugoran,
napanghunahunaan ko na ini kag akon ginsulat:
33Ang tanan nga mga binuhatan sang Ginoo maayo,
kag ginahimun-an niya ang tagsa ka kinahanglanon sa nagakaigo nga tion.
34Indi kamo magsiling, “Malain ini sang sa sina,”
kay ang tanan nga mga butang nagapakita sang ila kaayo sa nagakaigo nga tion.
35Gani karon, magkanta sa pagdayaw sa bug-os nga tagipusoon kag sa bug-os mo nga tingog,
kag dayawa ang ngalan sang Ginoo.
Currently Selected:
Sirac 39: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012