Sirac 37
37
Ang Indi Matuod nga mga Abyan
1Ang tagsa ka abyan nagasiling, “Ako imo man abyan”,
pero ang iban nga mga abyan sa hambal lamang.
2Daw ano ka makamamatay nga kalisod
kon ang isa ka abyan mangin-isa ka kaaway!
3O handom sa paghimo sang malaut, ngaa bala nagtuhaw ka,
sa pagtugob sang duta sing mga pagdaya?
4Ang isa ka sahi sang abyan nagapamintaha sa kauswagan sang iya abyan,
pero sa tion sang kabudlayan nagakontra sa iya.
5Ang matuod nga abyan magabulig sa imo batok sa imo kaaway,
kon may inaway ginaapinan niya ikaw.
6Indi gid pagkalimti ang isa ka abyan nga nagpakig-away tungod sa imo,
indi sia pagkalimti, kon manggaranon ka na.
Ang Paandam sa Pagsunod sang Laygay
7Ang tagsa ka manuglaygay nagasiling nga ang iya laygay amo gid ang labing maayo,
pero ang iban nagapangita sang ila kaugalingon nga kaayuhan.
8Mag-andam ka sa tawo nga nagalaygay,
una sa tanan, hibalua kon ano ang iya luyag,
kay ang iya laygay magasanto sa iya kaugalingon nga naluyagan.
Ngaa bala ang kaayuhan magakadto sa iya? Basi kon may mga plano sia batok sa imo
9kag magasiling sia, “Husto ang ginahimo mo,”
pero magatindog sia sa unhan kag magatan-aw kon ano ang mahanabo sa imo.
10Indi ka magpalaygay sa tawo nga nagaduhaduha sa imo,
kag indi pag-isugid ang imo tinutuyo sa mga nahisa sa imo.
11Indi ka gid magkonsulta sa babayi nahanungod sang iya kaagaw,
ukon sa isa ka matalaw nahanungod sa inaway,
ukon sa isa ka negosyante nahanungod sang mga bili,
ukon sa isa ka manugbakal nahanungod sang pagbaligya,
ukon sa isa ka madumot nahanungod sa pagpasalamat,
ukon sa maiyaiyahon nahanungod sa pagkaalwan,
ukon sa matamad nahanungod sa bisan ano nga obra,
ukon sa umalagi nga obrero nahanungod sa pagtapos sang obra,
ukon sa matamad nga suloguon nahanungod sa daku nga hilikuton;
indi ka magpalaygay sa ila.
12Sa baylo, magsalig ka sa tawo nga nagatahod sa Dios,
kag imo nahibaluan nga sia nagatuman sang mga sugo,
nga ang iya pagtuo pareho man sang imo,
kag sia magaunong sa imo kon ikaw yara sa kapaslawan.
13Pero magsalig man ikaw sa imo kaugalingon nga pamat-od,
kay wala na ikaw sing labi pa gid nga masaligan.
14Ang kaugalingon nga panghunahuna sang isa ka tawo, kon kaisa may paagi sa pagpaandam sa iya
labaw pa sang sa pito ka mga tawo nga nagabantay sa tore.
15Pero labaw sa tanan magpangamuyo ka sa Labing Mataas
sa pagtuytoy sa imo sa dalan sang kamatuoran.
Ang Kaalam kag Pagsalig
16Ang tagsa ka hilikuton ginasugoran sa pagpatugsiling,
kag ang pagbinagbinag magauna sa tagsa ka pamat-od.
17Ang mga panghunahuna nagikan sa tagipusoon,
18apat ka mga butang ang padulongan sini:
maayo kag malain, kabuhi kag kamatayon,
kag sa gihapon ang dila amo ang magagahom sa ila.
19Ayhan ang isa ka tawo may abtik sa pagtudlo sa iban,
pero wala ini sing pulos sa iya.
20May tawo nga maayo maghambal, pero mahimo nga may madamo nga mga kaaway,
kag mapatay sa gutom,
21kon ang Ginoo indi maghatag sa iya sing bugay,
tungod kay nakulangan sia sing kaalam.
22Kon ang isa ka tawo maalam sa pagdumala sang iya kaugalingon nga kabuhi,
ang iya maayo nga paghangop masaligan kon sia maghambal.
23Ang matuod nga maalam nga tawo nagatudlo sa iya mga ginsakpan,
kay ang iya maayo nga paghangop masaligan.
24Ang maalam nga tawo mapun-an sing pagdayaw
kag ang tanan nga makakita sa iya magakabig sa iya nga malipayon.
25Ang kabuhi sang tawo maisip sa mga inadlaw,
pero ang mga inadlaw sang Israel indi maisip.
26Ang maalam nga tawo magaangkon sang pagsalig sang iya mga ginsakpan,
kag ang iya ngalan magakabuhi sa walay katapusan.
Pagpugong sang Kaugalingon
27Anak ko, tilawi ang imo kaugalingon.
Sa bug-os mo nga kabuhi, kilalaha ang malain para sa imo
kag indi pagpadayuna ang paghimo sini.
28Kay indi ang tanan nga butang maayo para sa tagsatagsa,
kay indi ang tanan nanamian sang tanan nga butang.
29Indi ka magdinalukdalok sa tagsa ka manamit nga pagkaon,
kag indi magkaon nga wala sing pugongpugong,
30Kay ang tama nga pagkaon magadala sing balatian
kag ang pagkahakugan magaresulta sa pagsakit sang tiyan.
31Madamo ang napatay tungod sa kahakog;
mag-andam ka sini, agod maglawig ang imo kabuhi.
Currently Selected:
Sirac 37: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012