Sirac 36
36
Pangamuyo para sa Israel
1Kaluoyi kami, O Ginoo, Dios sang tanan, tamda man kami,
2kag himua nga magkahadlok ang tanan nga mga kapungsoran sa imo.
3Bayawa ang imo mga kamot batok sa dumoluong nga mga pungsod
kag ipakita sa ila ang imo gahom.
4Subong nga nakita nila ang imo pagkabalaan sa amon,
gani karon ipakita man sa amon ang imo pagkagamhanan sa atubang nila.
5Pakilalaha man sila subong sang amon pagkilala nga wala na sing iban nga Dios,
kundi ikaw lamang, O Ginoo.
6Ipakita liwat ang mga tanda, himo ka liwat sing mga milagro.
Ipahayag sing mahimayaon ang imo gahom!
7Pukawa ang imo kaakig kag iula ang imo kasingkal,
laglaga ang kasumpong, kag papasa ang kaaway.
8Padalia ang adlaw, dumdoma ang panumpa,
kag hatagi ang mga tawo sing kahigayunan sa pagsugid sang imo gamhanan nga mga buhat.
9Kabay nga ang imo nagabalingaso nga kaakig maglamon sang mga nabilin nga buhi,
kag kabay nga ang nagapigos sang imo mga tawo maabtan sang kalaglagan.
10Buonga ang mga ulo sang mapintas nga mga pangulo nga nagasiling,
“Wala sing makasarang sa amon!”
11Tipuna ang tanan nga mga tribo ni Jacob,
kag ihatag sa ila ang ila panublion subong sang imo ginhimo sang una.
12Kaluoyi, O Ginoo, ang mga tawo nga gintawag sa imo ngalan,
ang Israel nga imo ginkabig nga imo panganay nga lalaki.
13Kaluoyi ang balaan nga siudad nga imo ginaestaran,
ang Jerusalem, ang lugar nga imo palahuwayan.
14Pun-a ang Sion sang mga ambahanon sa pagdayaw sa imo,
pun-a ang imo santuaryo sang imo himaya.
15Magsaksi ka sa imo mga gintuga sa ginsugoran
kag tumana ang imo mga ginsiling suno sa imo ngalan.
16Hatagi sang padya ang mga nagahulat sa imo,
pamatud-i nga masaligan ang imo mga propeta.
17Pamatii, O Ginoo, ang pangamuyo sang imo mga alagad,
suno sa bendisyon ni Aaron sa imo mga tawo,
agod ang tanan nga nagaestar sa duta magkilala nga ikaw ang Ginoo,
ang walay katapusan nga Dios.
Ang Pagkilala sang Kinatuhay
18Ang tanan nga kalan-on sarang makaon,
pero may iban nga kalan-on nga maayo sang sa iban.
19Subong nga ang dila nakahibalo sang sabor sang nagkalainlain nga mga karne,
amo man ang maabtik nga tawo makahibalo sang mga binutig.
20Ang malaut nga tagipusoon nagatuga sang kalisod,
pero ang tawo nga may inagihan makabalos sa iya.
Ang pagpili sang Asawa
21Ang isa ka babayi makabaton sang bisan sin-o nga lalaki subong bana,
pero may iban nga babayi nga mas maayo sang sa iban.
22Ang katahom sang isa ka babayi makapahalipay sang isa ka lalaki,
kag wala na sia sing iban pa nga handom.
23Kon malulo kag malagnay sia maghambal
ang iya bana wala sing tupong sa tanan nga mga lalaki.
24Ang lalaki nga makapangasawa nagaangkon sang labing maayo nga manggad,
isa ka kabulig nga bagay sa iya kinahanglan kag isa ka haligi nga iya nasandigan.
25Kon ang isa ka pagkabutang wala sing kudal, pagakawaton ini.
Kon ang isa ka tawo wala sing asawa, magadalangdalang sia kag magapanghayhay.
26May nagasalig bala sa buyong nga nagalagaw halin sa isa ka banwa pakadto sa isa?
Amo man ang isa ka tawo nga wala sing balay nga nagatulog lamang sa lugar diin sia magab-ihan.
Currently Selected:
Sirac 36: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012