Sirac 33
33
1Kon ang tawo magtahod sa Ginoo indi sia pag-abtan sang kalautan,
pagaluwason sia sa gihapon sa mga pagtilaw.
2Ang maalam nga tawo wala nagadumot sang Kasugoan,
pero ang tawo nga hipokrito sa iya pagtuman sini
kaangay sang isa ka sakayan sa tunga sang bagyo.
3Ang#Exo. 28:30; Sir. 45:10. maalam nga tawo nagasalig sa Kasugoan
kag iya masapwan nga ini masaligan kaangay sang ginsiling sang Dios.
4Maghanda ka sang imo inughambal kon luyag ka nga may mamati sa imo.
Gamita ang imo tinun-an sa wala pa ikaw magsabat.
5Ang balatyagon sang isa ka buangbuang kaangay sang rueda sang karo,
kag ang iya mga panghunahuna kaangay sang nagatiyog nga ehe.
6Ang langulango nga amigo kaangay sang lalaki nga kabayo
nga nagahirihiri bisan sin-o ang magsakay sa iya.
Ang mga Tawo Indi Alalangay
7Ngaa bala ang isa ka adlaw importante sang sa isa,
nga ang tagsa ka adlaw sa bug-os nga tuig may kapawa halin sa adlaw?
8Ang Ginoo amo ang nagpat-od sini,
ginpat-od niya ang nagkalainlain nga mga panahon kag mga piesta.
9Ang iban nga mga adlaw iya ginpakamahal kag ginpakabalaan,
kag ang iban ginhimo niya nga ordinaryo.
10Ang tanan nga mga tawo naghalin sa duta,
si Adan gindihon man halin sa duta.
11Pero sa daku nga kaalam sang Ginoo ginhimo niya sila sing lainlain
kag ginbutang niya sila sa lainlain nga kahimtangan.
12Ang iban ginbendisyunan niya kag ginbayaw,
ang iban ginpakabalaan niya kag ginpapalapit sa iya.
Ang iban iya ginpakamalaut kag ginpaubos
kag ginpahalin sa ila mga lugar.
13Subong nga ang lunang yara sa kamot sang maninihon
agod dihunon suno sa iya luyag,
gani amo man ang mga tawo sa mga kamot sang ila Manunuga,
kag pagahimuon sa ila suno sa ginpat-od niya.
14Ang maayo amo ang baliskad sang malaut
kay ang kabuhi amo ang baliskad sang kamatayon,
amo man ang makasasala, ang baliskad niya amo ang diosnon.
15Tan-awa ang hinimuan sang Labing Mataas,
nagaparisparis sila, ang isa baliskad sang isa.
16Ako amo ang ulihi nga nagpulaw,
kaangay ako sang nagpanaghaw nga nagasunod sa mga nagapang-ipo sang mga ubas.
Sa pagbendisyon sang Ginoo nakaabot ako sing una,
sa pagpuno sang akon pulogaan kaangay sang ila.
17Dumdoma nga wala ako magpangabudlay para lamang sa akon kaugalingon,
kundi para sa tanan nga luyag makatuon.
18Pamati kamo sa akon, mga dungganon, mga pangulo sang katilingban,
magpamati kamo sa akon sing maayo.
Kahilwayan
19Samtang buhi pa ikaw indi pag-itugyan ang imo kaugalingon
sa anak nga lalaki, sa asawa, sa utod nga lalaki ukon sa abyan.
Indi pag-ihatag ang imo pagkabutang sa iban,
basi kon maghinulsol ka, kag bawion mo ini.
20Samtang buhi pa ikaw kag may ginhawa pa,
indi ikaw magpagahom sa iban.
21Mas maayo pa nga ang imo kabataan ang magpangayo sa imo
sang sa ikaw ang magsalig sa ila.
22Sa bisan ano nga imo himuon, ikaw ang magdumala
kag indi pagtugoti nga madagtaan ang imo ngalan.
23Hulata ang katapusan sang imo kabuhi,
kag sa tion sang imo kamatayon, ipanagtag ang imo mga pagkabutang.
Ang Pagkabig sa mga Ulipon
24Kalan-on, inughanot, kag mga karga para sa asno,
kan-on, kag disiplina, kag obra para sa ulipon!
25Paobraha ang imo ulipon, kag ikaw makapahuway.
Kon pabay-an mo sia nga wala sing obra magapangita sia sang kahilwayan niya.
26Ang baka mahanas sa gota kag sa karosa.
para sa malain nga ulipon yara ang pag-ipit kag ang silot.
27Paobraha sia, agod indi sia magtinamad,
kay ang pagkatamad nagatudlo sang tanan nga kalautan.
28Paobraha sia kay amo ina ang tinutuyo para sa iya,
kag kon indi sia magtuman sa imo, kadenahi sia.
29Indi ka mag-estrikto sing tama sa bisan kay sin-o,
kag indi ka maghimo sang bisan ano nga di-matarong.
30Kon may isa lang ikaw ka suloguon, kabiga sia pareho sang imo kaugalingon,
tungod kay ginbakal mo sia sang dugo.
31Kon may isa lang ikaw ka suloguon, kabiga sia kaangay sang imo utod nga lalaki,
kinahanglan mo sia subong sang imo kaugalingon.
Kon pintasan mo kag magpalagyo sia
sa diin mo sia pagapangitaon?
Currently Selected:
Sirac 33: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012