Sirac 32
32
Mga Bangkite
1Kon pilion nila ikaw nga pangulo sang isa ka punsyon, indi ka magpabugal.
Maggawi ka pareho sang isa sa ila,
tatapa anay sila sa wala pa ikaw magpungko.
2Indi ka anay magpungko tubtob matapos mo ang imo mga katungdanan.
Magkalipay ka sa ila pagkinasadya,
kag makabaton ka sing premyo tungod sang imo maayo nga pagdumala.
3Maghambal ka, kon tigulang ka na, amo ini ang imo kahigayunan,
pero indi ka na magpalikuliko, kag indi pagpauntata ang musika.
4Kon may yara nga kalingawan indi ka magsagi sugilanon.
Indi ini ang nagakaigo nga tion sa pagpakita sang imo kaalam.
5Kaangay sang isa ka tampok nga rubi sa isa ka bulawan nga singsing,
amo man ang isa ka konsierto sa isa ka punsyon nga may imnanay.
6Kaangay sang isa ka tampok nga esmeralda nga natampok sa bulawan,
amo man ang manami nga sonata upod sa manamit nga bino.
7Maghambal ka, pamatan-on, kon kinahanglanon,
pero indi magsobra sa makaduha kon ginapangayo nga maghambal ka.
8Indi na magpalikuliko, kundi lip-ota lang basta may unod
kaangay sang isa ka tawo nga maalam kag ginapunggan lang niya ang iya kaugalingon.
9Upod sa mga kadalagkuan indi ka maggawi nga daw pareho ka sa ila
kag indi ka magsagi wakal samtang may nagahambal.
10Subong nga ang kilat nagauna sa daguob,
amo man ang pagkabantog nagauna sa mabuot nga tawo.
11Mag-undang ka sa nagakaigo nga tion, kag indi paghulata nga ikaw ang katapusan.
Magpauli ka nga wala nagapaawat-awat.
12Didto makapagusto ka sang imo kaugalingon,
kag indi ka magpakasala sa paghambal sang hinambog.
13Kag labaw sa tanan, dayawa ang imo Manunuga
nga naghatag sa imo sang maayo nga mga butang.
Ang Pagsaysay sang Kasugoan
14Ang tawo nga nagatahod sa Ginoo magabaton sang iya disiplina,
kag ang nagabangon sing aga pa sa pagpangamuyo magabaton sang iya kaayuhan.
15Ang nagapangita sang Kasugoan mapun-an sini,
pero manginkasandaran ini sa mga hipokrito.
16Ang mga nagatahod sa Ginoo magahimo sang matarong nga paghukom,
kag himuon niya ang ila maayo nga mga binuhatan nga magsiga subong sang isa ka suga.
17Ang makasasala indi magbaton sang pagsaway,
magapangita sia sing balibad sa pagpakamatarong sang iya luyag.
18Ang tawo nga may alam wala nagasikway sang laygay,
pero ang bugalon kag di-diosnon indi magkahadlok.
19Indi gid maghimo sang bisan ano nga wala anay nagapatugsiling,
kag sa ulihi indi ka maghinulsol kon nahimo mo ini.
20Indi ka mag-agi sa mabudlay nga dalan
sa kahadlok nga masandad ka sa mga bato.
21Indi ka magtangatanga sa mahawan nga dalan,
22kag bantayan mo ang imo kaugalingon nga mga kabataan.
23Magsalig sa imo kaugalingon sa tagsa ka butang nga imo ginahimo,
amo ini ang kahulogan sang pagtuman sang mga sugo.
24Ang tawo nga nagasalig sa kasugoan nagatuman sang mga sugo.
Ang tawo nga nagasalig sa Ginoo indi maano.
Currently Selected:
Sirac 32: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012