Sirac 34
34
Ang mga Damgo Wala sing Kahulogan
1Ang#Deut. 13:1-5; 18:9-14. wala sing pulos nga paglaom makapatalang sa mga buangbuang,
kag ang ila mga dalamguhanon nagpasadya sa ila.
2Ang pagsalig sa mga damgo kaangay sang nagadakop sang landong,
kag nagalagas sang hangin.
3Ang makita mo sa damgo indi matuod,
kaangay sang laragway sang isa ka guya sa isa ka espeho.
4Ang pagkaputli wala nagagikan sa higko.
Paano ang paggikan sang kamatuoran sa kabutigan?
5Ang pagpamakot, ang mga paghimalad, kag ang mga damgo wala sing pulos,
kaangay ini sang mga dalamguhanon sang isa ka babayi nga ginasakitan.
6Luas kon ini ginpadala halin sa Labing Mataas
subong isa ka tanda, indi ini pagsapaka.
7Ang mga damgo nagpatalang sang madamo,
kag ang mga nagbutang sang ila paglaom sa sini napaslawan.
8Wala na kinahanglan ini nga mga pagpatalang sa pagtuman sang Kasugoan,
kag ang kaalam nga bug-os ginahambal sang mga bibig nga wala nagabutig.
Pagpanglakaton
9Ang tawo nga nakapanglugayawan#34:9 nakapanglugayawan: Sa iban nga mga manuskrito may tinun-an. madamo ang nahibal-an
kag ang isa ka tawo nga may inagihan nakahibalo kon ano ang iya ginahambal.
10Ang tawo nga wala sing inagihan diutay ang nahibal-an
pero ang isa ka tawo nga nagapanglakaton nagadugang ang iya ihibalo.
11Madamo ang akon nakit-an sa akon pagpanglakaton,
kag makahangop ako sing labi pa sa akon mahambal.
12Nakaagi ako sa katalagman sang kamatayon
kag naluwas ako, tungod sining mga inagihan.
Magtahod sa Ginoo
13Ang espiritu sang mga nagatahod sa Ginoo magakabuhi,
kay ang ila pagsalig yara sa isa nga makaluwas sa ila.
14Ang tawo nga nagatahod sa Ginoo indi gid magmatalaw ukon magkahadlok,
tungod kay ang iya pagsalig yara sa Ginoo.
15Daw ano ka malipayon sang tawo nga nagatahod sa Ginoo!
Nakahibalo sia kon diin mangayo sing bulig.
16Ang Ginoo nagabantay sang mga nagahigugma sa iya.
Sia ang ila makusog nga mangangapin kag malig-on nga manugbulig.
Sia isa ka palalipdan sa mainit nga hangin kag isa ka handong sa nagatagiti nga init sang udtong adlaw,
isa ka apin sa pagkasandad kag pagkapukan.
17Ginpasidla sila sang Ginoo kag ginpainggat niya ang ila mga mata.
Ginhatagan niya sila sang maayong lawas, sang kabuhi kag bendisyon.
Ang Pagdulot sang mga Halad
18Ang isa ka halad nga naangkon sa di-matarong nga paagi ginakabig nga nadagtaan,
ang mga dulot sang mga malinapason indi mabaton.
19Ang Labing Mataas wala malipay sa mga dulot sang mga di-diosnon,
kag wala man sia nagapatawad sang mga sala tungod sang madamo nga mga halad.
20Ang pagdulot sing halad halin sa pagkabutang sang mga imol
pareho kalain sang sa pagpatay sang isa ka bata nga lalaki sa atubang sang iya amay.
21Ang diutay nga kalan-on kabuhi para sa mga imol,
kag ang nagakuha sini sa ila isa ka tawo nga manugpatay.
22Ang pagkuha sang palangabuhian sang imo isigkatawo amo ang pagpatay sa iya,
kag ang tawo nga nagadaya sa obrero sang iya sweldo nagapaagay sing dugo.
23Kon ang isa nagapatindog kag ang isa nagaguba,
ano bala ang ila ganansya luas sa mabudlay nga obra?
24Kon ang isa magpangamuyo kag ang isa magpakamalaut,
sin-o bala ang pamatian sang Ginoo?
25Kon ang isa ka tawo magpanghinaw sa tapos sia makatandog sang isa ka bangkay
kag magtandog sini liwat, ano ang pulos sang iya pagpanghinaw?
26Amo man ang tawo nga nagapuasa tungod sang iya mga sala
kag nagalakat kag nagapakasala liwat.
Sin-o bala ang magapamati sang iya pangamuyo?
Ano bala ang iya napulos sang iya pagpuasa?
Currently Selected:
Sirac 34: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012