Sirac 31
31
Mga Palaligban nga Ginabangdan sang Kwarta
1Ang manggaranon nga tawo naganiwang tungod kay indi sia makatulog kon gab-i,
kay ang pagpalibog tungod sang manggad indi makapatulog sa iya.
2Tungod sang iya pagpalibog indi sia makatulog,
subong sang malubha nga balatian nga indi makapatulog sang tawo.
3Ang manggaranon nga tawo nagapangabudlay sa pagtipon sing manggad,
kag kon magpahuway sia nagapaayaw sia sang tanan nga mga kaayuhan.
4Ang imol nga tawo nagapangabudlay pero pigado man sa gihapon,
kag kon magpahuway sia mawad-an sia.
5Ang paghigugma sa bulawan indi gid matarong,
ang paghingamo sang tawo sing kwarta magapatalang sa iya.
6Madamo nga mga tawo ang nalaglag tungod sang bulawan
kag ila nasugata ang kapahamakan.
7Ang bulawan isa ka siod sa mga tawo nga nagahamkon gid sini,
kag ang tagsa ka buangbuang masiod sini.
8Malipayon ang manggaranon nga wala madagtai sini,
kag wala nagahimo sang bulawan nga iya handom labaw sa tanan.
9Ipakita sa amon ina nga tawo kay kami magapanginbulahan sa iya,
nakahimo sia sing milagro sa tunga sang iya mga kapareho.
10May yara bala nga nakaagi sini nga pagtilaw kag wala gid sia madagtai?
Kon amo sarang sia makapabugal!
May yara bala nga may kahigayunan sa pagpakasala kag wala magpakasala?
Ukon may kahigayunan sa paghimo sing malaut kag wala niya paghimua ini?
11Kon amo, magapadayon sia sa pag-uswag,
kag ang bug-os nga katilingban magakilala sang iya daku nga bulig.
Ang Pagbinatasan sa mga Punsyon
12Kon magpungko ka sa daku nga punsyon,
indi ka magdilapdilap kag magsiling,
“Abaw! Kanamit!”
13Dumdoma nga ang mahakog nga mata malain nga butang.
Wala na sing mahakog pa sa tanan nga mga tinuga kundi ang mata.
Amo ini ang kabangdanan nga nagaluha ini sa bisan ano lang nga iya makita.
14Indi pagdab-uta ang tagsa ka butang nga imo makita,
kag indi ka managil-ot sa kaupod nimo nga mga bisita sa punsyon.
15Batyaga man ang balatyagon sang imo kaupod
kag magpatugsiling ka gid sa iya.
16Kauna ang bisan ano nga ginabutang sa atubang mo subong sang isa ka maayo nga tawo,
indi ka magdinalukdalok basi kaugtan ka.
17Bilang maayo nga pamatasan, mag-una ka sa pag-undang
kag indi ka magpakita nga wala ka mabusog kay magalain ang ila buot.
18Kon nagakaon ka upod sa madamo nga mga tawo,
indi ka magdab-ot sing una sa ila.
19Ang tawo nga may maayo nga tinun-an kontento na bisan sa diutay lang,
kag indi sia paghapuon kon magtulog sia.
20Ang tawo nga indi palakaon mahamuok ang katulogon,
nagabugtaw sia sing aga pa kag maayo ang iya panimuot.
Pero ang indi matulogan ang di-matunawan,
kag ang pagsakit sang tiyan, iya sang hakugan.
21Kon piliton ka sa pagkaon sing tudo,
maghalin ka sa lamisa kag magsuka kag magaayo ka.
22Pamati ka sa akon, anak ko, kag indi ako pagsikwaya,
kag sa ulihi magapasalamat ka sang akon ginsiling.
Ang bisan ano nga imo pagahimuon, himua sing haganhagan
kag wala sing balatian nga mag-abot sa imo.
23Ang tagsatagsa nagadayaw sa maalwan nga tagbalay,
kag ang ila pagpamatuod sang iya kaalwan masaligan.
24Ang bug-os nga banwa nagareklamo sa tagbalay nga tama kadalok sa pagkaon,
kag husto gid ang ila ginasiling.
Bino
25Indi pagpamatud-i ang imo pagkalalaki paagi sa pag-inom,
kay ang bino amo ang kabangdanan sang pagkalaglag sang madamo.
26Subong nga ang horno nagatilaw sang salsalon kon ginasubwan ini,
amo man ang bino nagatilaw sang pamatasan sang tawo kon magbinais ang bugalon nga mga tawo.
27Ang bino nagapapagsik sa tawo,
kon mag-inom sia sing husto lang.
Ano bala ang kabuhi sang tawo kon wala bino?
Gintuga ini sa pagpasadya sang tagipusoon sang mga tawo.
28Ang bino nagahatag sing kalipay kag nagapasadya sang espiritu,
kon ang tawo nakahibalo sang tion sa pag-inom kag nagakaigo nga kadamuon sang ginainom.
29Pero ang bino kon sobra na nagadala sing kaakig
kag nagapadulong sa kalainan kag sa kahuloy-an.
30Ang kahulogbon nagapasingkal sang kaakig sang buangbuang sa iya kaugalingon nga kapahamakan,
nagapaluya ini sa iya kag nagadala sing halit.
31Sa punsyon indi pagsawaya ang imo kapareho nga dumoluaw
kag indi mo sia pagpakanuboon samtang ginasadyahan sia.
Indi ini tion sa pag-away sa iya
ukon pagsukot sa iya sang iya utang.
Currently Selected:
Sirac 31: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012