Sirac 30
30
Ang Pagpadaku sa mga Kabataan
1Ang nagapalangga sang iya anak magahanot sa iya pirme,
agod nga kon magdaku sia manginkalipay niya sia.
2Ang nagadisiplina sa iya anak makapulos sa iya,
kag makapabugal sa iya sa atubang sang iya mga kakilala.
3Ang nagatudlo sing maayo sa iya anak pagahisaan sang iya mga kaaway,
kag magapabugal sa iya sa atubang sang iya mga abyan.
4Kon mapatay ang amay, daw pareho lang nga buhi sia,
kay nagbilin sia sang isa nga pareho gid sa iya.
5Sang buhi pa ang amay nakita na niya ang iya anak kag nagkalipay sia,
kag sang pagkapatay niya wala sia magkasubo.
6Nagbilin sia sing manunubli sa pagtimalos sang iya mga kaaway,
kag sa pagbalos sang kaayo sang iya mga abyan.
7Ang tawo nga ginapagustohan lang ang iya anak magabugkos sang iya kaugalingon nga mga pilas,
kag masakitan sia sa tagsa ka paghibi.
8Ang wala mamanso nga kabayo mabudlay patumanon,
kag ang wala matudloi nga anak matig-a sing ulo.
9Padakua ang ulo sang imo anak kag manginkalahadlukan sia sa imo,
hampangi sia, kag hatagan niya ikaw sing kalisod.
10Indi ka magkadlaw upod sa iya kay basi kon magkalisod ka upod sa iya,
kay sa ulihi magabagrot lamang ang imo mga ngipon.
11Indi sia pagpagustohi samtang bata pa sia
kag indi pagpabay-an ang iya mga sala.
12Tadlunga sia samtang pamatan-on pa sia,
hanuta sia sing husto samtang bata pa sia,
basi kon magtig-a ang iya ulo
kag indi na sia magtuman sa imo kag magaugtas ka.
13Disiplinaha ang imo anak, kag batasa sia,
kay basi batu-an ka niya kag mahuy-an ka.
Maayo nga Panglawason
14Mas maayo pa ang imol nga tawo nga may maayo sing lawas kag mabakod,
sang sa manggaranon nga tawo nga nagaantos sa iya lawas.
15Ang lawas nga maayo kag mabakod mas maayo pa sang sa bisan ano nga bulawan,
kag ang mapagsik nga lawas mas maayo sang sa tama kadamo nga mga pagkabutang.
16Wala sing manggad nga makatupong sa maayo nga lawas,
wala sing kinasadya nga labaw pa sang sa malipayon nga tagipusoon.
17Mas maayo pa ang kamatayon sang sa kabuhi nga masinulob-on,
kag mas maayo pa ang walay katapusan nga kapahuwayan sang sa malawig nga balatian.
18Ang labing maayo nga mga kalan-on nga nabutang sa atubang sang tawo nga wala sing gana,
pareho sang mga dulot nga kalan-on nga nabutang sa ibabaw sang lulobngan.
19Ano ang pulos sang isa ka halad sa isa ka diosdios
nga indi makatilaw kag indi makasimhot?
Amo man sa tawo nga ginasilutan sang Ginoo.
20Nagatan-aw lamang sia sa kalan-on nga yara sa iya atubang kag nagapanghayhay,
pareho sang isa ka kapon nga nagapanghayhay kon maghakos sia sa isa ka dalaga.
Ang Kalipay kag Kasubo
21Indi#Manug. 11:9-10. pagpabay-i ang imo kaugalingon nga magkalisod,
kag indi paghungda ang pagsakit sang imo kaugalingon paagi sa pagpangasubo.
22Ang malipayon nga tagipusoon nagapapagsik sang tawo,
kag ang kalipay nagapalawig sang iya mga inadlaw.
23Magkasadya kag magkalipay ka,
kag dulaa ang imo kalisod,
kay tungod sa kalisod madamo ang nalaglag
kag wala sing pulos ini sa bisan kay sin-o.
24Ang kahisa kag ang kaakig nagapalip-ot sang kabuhi sang tawo,
kag ang pagpalibog nagapadali sang pagtigulang sang tawo.
25Ang tawo nga malipayon may maayo sing panimuot,
may maayo nga gana sa pagkaon kag nanamitan sang iya ginakaon.
Currently Selected:
Sirac 30: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012