Sirac 27
27
1Madamo ang nagdinaya agod makaganansya,
kay ang nagahandom sa pagmanggad nadulman ang iya mga mata.
2Subong sang palpal nga nabugsok sa gintung-an sang duha ka bato
amo man ang pagbinutig sa tunga sang pagbakal kag sang pagbaligya.
3Kon ang tawo indi magpadayon sa pagtahod sa Ginoo,
ang iya panimalay malaglag sa labing madali.
Ang Paghambal Nagapahayag sang Matuod nga mga Balatyagon
4Uyoga ang ayagan, kag ang sagbot mabilin,
amo man ang sala sang isa ka tawo mapahayag kon maghambal sia.
5Ang horno nagatilaw sang obra sang maninihon
amo man ang paghambalanay nagatilaw sang isa ka tawo.
6Subong#Mat. 7:17; 12:33; Luc. 6:44. nga ang bunga nagapahayag kon paano gintatap ang kahoy,
amo man ang hambal sang tawo, nagapakita sang iya ginabatyag.
7Indi pagdayawa ang isa ka tawo tubtob mabatian mo sia nga nagahambal,
kay amo ini ang pagtilaw sang iya pagkatawo.
Ang Pagkamaminatud-on
8Kon ang imo ginapangita amo ang pagkamaminatud-on,
makita mo ini, kag isuksok ini kaangay sang matahom nga bayu.
9Ang mga pispis nga pareho sing sahi nagaupdanay,
kag ang pagkamaminatud-on nagabalik sa nagahimo sini.
10Ang leon nagahukmong sa paghulat sang iya tulokbon,
kag amo man ang sala sa mga nagahimo sing kalautan.
Binuang nga Hambal
11Ang hambal sang diosnon nga tawo may kaalam sa gihapon,
pero ang isa ka buangbuang nagabalhin pareho sang bulan.
12Indi ka magtener upod sa mga buangbuang,
pero magpabilin ka upod sa mga maalam.
13Ang hambal sang mga buangbuang makailinit,
ginahimo nila nga kaladlawan ang mga kalautan.
14Ang hambal sang palasumpa nga mga tawo nagapatindog sang mga balahibo,
kon mag-inaway ini nga mga tawo, ang iban nagatabon sang ila mga dulonggan.
15Ang inaway sang mga bugalon nagapadulong sa patyanay,
ang ila insultohanay masakit pamatian.
Pagbuyagyag sang Mga Sekrito
16Ang#Hulo. 20:19; 25:9. nagasugid sang mga sekrito indi masaligan,
kag indi makakita sang abyan nga iya naluyagan.
17Higugmaa ang imo abyan, kag saligi sia,
pero kon isugid mo ang iya mga sekrito, indi ka na lang mag-upod sa iya.
18Subong nga ang isa ka tawo nagapatay sang iya kaaway,
ginguba man nimo ang pagpakig-abyan sang imo kaingod.
19Subong sang isa ka pispis nga ginbuy-an mo sa imo kamot,
amo man ang imo abyan kon madula, indi na makita.
20Indi na paglagsa kay malayo na sia,
kag nakapalagyo sia sa siod kaangay sang usa.
21Ang isa ka pilas sarang mabugkosan kay ang insulto sarang mapatawad,
pero ang nagasugid sang sekrito wala na sing paglaom.
Ang Pagkahipokrito
22Ang tawo nga nagapangilay nagapahito sing malain,
wala sing makapugong sa iya sa paghimo sini.
23Matam-is sia maghambal sa imo atubang
kag nagadayaw gid sang imo ginahambal,
pero lain man ang iya ginasiling kon wala ka na,
kag pakalainon niya ang imo ginsiling.
24Wala na ako sing ginakangil-aran labaw sa tanan, kundi ini nga tawo,
kag ang Ginoo nagakangil-ad man sa iya.
25Ang bisan sin-o nga nagahaboy sing bato sa ibabaw nagahaboy sini sa iya kaugalingon nga ulo,
kag ang maluibon nga bunal nagapilas sang tanan sa palibot.
26Ang nagakutkot sing buho mahulog sa sini,
ang nagabutang sing siod madakpan sini.
27Ang kalautan nga ginahimo sang isa ka tawo magabalik sa iya,
kag indi sia makahibalo kon diin ini maghalin.
28Ang bugalon nga tawo nagayaguta kag nagainsulto,
pero ang balos sa iya nagahulat kaangay sang nagahukmong nga leon.
29Ang mga nagakalipay sa pagkapukan sang diosnon nga mga tawo masiod,
kag magaantos sing kasakit sa wala pa sila mapatay.
Pagkaakig
30Ang aligutgot kag ang kaakig, akon man ginakangil-aran,
pero ini sila yara sa makasasala.
Currently Selected:
Sirac 27: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012