Sirac 28
28
1Ang tawo nga nagatimalos magaantos sang pagtimalos sang Ginoo,
nga nagalista sing maid-id sang iya mga sala.
2Patawara#Mat. 6:14; Mar. 11:25. ang imo kaingod sang iya mga sayop,
dayon kon mangamuyo ka, ang imo mga sala patawaron.
3Kon ang isa ka tawo nagahupot sing kaakig sa isa,
magapaabot bala sia sing kaluoy sa Ginoo?
4Kon wala sia sing kaluoy sa iya kapareho,
makapangayo bala sia sing kapatawaran tungod sang iya kaugalingon nga mga sala?
5Kon ang isa ka mamalatyon nga tawo nagahupot sing kaakig,
sin-o bala ang magapatawad sa iya sang iya mga sala?
6Dumdoma kon ano ang imo maabutan, kag untati ang pagdumot.
Panumdoma ang pagkadunot kag ang kamatayon kag magkabuhi ka suno sa mga sugo.
7Talupangda ang mga sugo, kag indi ka magkaakig sa imo isigkatawo.
Dumdoma ang kasugtanan sang Labing Mataas, kag kalimti ang sayop.
Mga Pagsinuay
8Maglikaw sa pag-inaway kag indi magdamo ang imo sala,
kay ang pagkamainiton amo ang kabangdanan sang pag-inaway.
9Ang makasasala nagasugod sing gamo sa mga nagaabyanay
kag nagasab-og sang pagsinuay sa diin may paghidait.
10Ang kalayo nagadabdab kon ginagatungan,
ang inaway nagainit kon may nagasumpong.
Ang kaakig sang isa ka tawo depende sa iya kusog
ang iya kasingkal depende sa iya manggad.
11Ang hinali nga pagbaisay nagapasagrab sang kalayo,
kag ang hinali nga inaway nagapadulong sa patyanay.
12Huypa ang alipalok kag magdabdab ini,
duplai kag mapatay ini.
Ining duha nagikan sa imo baba.
Ang Malaut nga Hambal
13Ang#Sir. 51:2-6; San. 3:5-12. pagpakamalaut yara sa kutsokutsero kag sa nagasugid sing binutig!
Sia ang kabangdanan sang pagkalaglag sang mga tawo nga mahidaiton.
14Ang hambal sang nagapasilabot naglaglag sang kabuhi sang madamo,
kag nagtabog sa ila halin sa isa ka pungsod pakadto sa isa.
Naglaglag ini sang mga banwa nga napamakuran
kag nagguba sang mga balay sang mga gamhanan.
15Ang hambal sang nagapasilabot nagpabulag sang matutom nga mga asawa,
kag ginbayaan nila ang tanan nga ila ginpangabudlayan.
16Ang bisan sin-o nga nagapamati sini indi na gid liwat makaangkon sing kapahuwayan
kag indi magkabuhi nga may paghidait.
17Ang lapdos sang hanot nagahimo sang labhag
pero ang lapdos sang dila nagabali sang mga tul-an.
18Madamo ang ginpamatay sa espada
pero sobra pa ang ginpamatay sang dila.
19Malipayon ang tawo nga naapinan sa sini
nga wala makaagi sang iya kasingkal,
nga wala matakdi sang iya gota
kag wala magapos sang iya mga kadena.
20Kay ang iya gota salsalon,
ang iya mga kadena bronsi.
21Ang kamatayon nga iya gindala isa ka mahapdi nga kamatayon,
maayo pa ang lulobngan sang sa dila.
22Pero wala ini sing gahom sa mga nagatahod sa Dios,
indi sila masunog sa kalayo sini.
23Ang mga nagasikway sa Ginoo mahulog sa sini,
magadabdab ini sa tunga nila kaangay sang kalayo kag indi na mapalong.
Magasalakay ini sa ila kaangay sang leon
kag kusniton sila kaangay sang leopardo.
24Subong sang imo pagkudal sang imo hardin sang tunokon nga mga kahuykahoy,
amo man ang pagtago mo sang imo pilak kag sang imo bulawan.
25Timbanga man ang imo mga hambal,
kag maghimo ka sing pwertahan nga may sira sa imo baba.
26Mag-andam ka nga indi mapatalang sang imo dila
kag mahulog ka sa gahom sang kaaway nga nagabantay sa imo.
Currently Selected:
Sirac 28: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012