Sirac 26
26
1Malipayon ang bana nga may maayo nga asawa,
ang mga inadlaw sang iya kabuhi magadoble.
2Ang matutom nga asawa amo ang kalipay sang iya bana,
magakabuhi ang iya bana sing malinong sa bug-os niya nga kabuhi.
3Ang isa ka maayo nga asawa nagakahulogan sang maayo nga pangabuhi,
sia amo ang isa sang mga dulot sang Ginoo sa mga nagatahod sa iya.
4Bisan manggaranon sila ukon imol, may kalipay sila sa ila tagipusoon,
kag pirme lang manayanaya ang ila guya sa tanan nga tion.
5May tatlo ka butang nga akon ginakahadlukan,
kag may ikap-at nga nakulbaan ako mag-atubang:
ang eskandalo sang banwa, ang pagtipon sang madamo nga mga tawo nga nagakinagula,
kag ang binutig nga mga panumbongon—mas malain pa ini tanan sang sa kamatayon.
6Pero masakit kag masubo batyagon kon ang isa ka babayi magpangimon,
kag ang tanan pareho nga makabatyag sang kahapdi sang pagyawyaw sang iya dila.
7Ang malain nga asawa pareho sang isa ka gota nga indi mag-igo,
ang nagatinguha sa pagpugong sa iya kaangay sang nakadakop sang isa ka iwiiwi.
8Ang hubog nga asawa makaulogot tulokon,
kay indi niya matago ang iya kahuloy-an.
9Ang maulag nga babayi ginapakita sang iya masaw-a nga hitsura,
makilala mo sia sa iya panulok.
10Bantayi sing maayo ang isa ka anak nga babayi nga matig-a sing ulo,
kay kon may kahigayunan sia, mangalit gid sia.
11Mag-andam ka sang iya panulok nga wala mahuya,
kag indi magkatingala kon pakahuy-an ka niya.
12Kaangay sang ginauhaw nga nagapanglakaton
magainom sia sa bisan diin nga tuboran nga iya makita;
magahakos sia sa kay bisan sin-o nga makakupo sa iya
kag magpakighilawas sa iya.
13Ang katahom sang asawa amo ang kalipay sang iya bana,
ang iya mga binuhatan magapabakod sang iya bana.
14Ang mabuot nga asawa dulot halin sa Ginoo,
ang iya maayo nga panimuot indi mabakal sang pilak.
15Ang mabuot nga asawa may madamo nga kinaayo,
wala sing makatimbang sang bili sang iya pagkaputli.
16Subong katahom sang pagbutlak sang adlaw sa kalangitan sang Ginoo,
amo man ang maayo nga asawa sa balay nga maayo ang pagdumala.
17Subong kasanag sang kapawa sa balaan nga kandelirohan,
amo man ang matahom nga guya sa isa ka matahom nga lawas.
18Subong sang haligi nga bulawan sa sadsaran nga pilak,
amo man ang matahom nga mga batiis sa mabakod nga mga tiil.#26:18 Ang iban nga mga manuskrito nagadugang sang mga bersikulo 19-27: Anak ko, magpabilin ka nga maayo ang lawas samtang bataon, kag indi pag-ihatag ang imo kusog sa mga dumoluong. 20 Pangitaa sa bug-os nga duta ang mabungahon nga ulomhan, kag tamnan sang imo kaugalingon nga binhi, nga nagasalig sa imo maayo nga sari. 21 Dayon ang imo mga anak magakabuhi kag magadalagku nga may pagsalig sa ila kaugalingon nga panimalay. 22 Ang malain nga babayi subong sang dupla, ang kinasal nga babayi nga may relasyon sa iban nga lalaki nagadala sang kamatayon sa iya mga kahagugma. 23 Ang malinapason sa Kasugoan makapangasawa sang di-diosnon, nga nagakabagay sa iya, apang ang tawo nga nagatahod sa Ginoo magaangkon sang diosnon nga asawa. 24 Ang wala sing huya nga asawa nagakalipay sa paghimo sang kahuloy-an sa iya kaugalingon, apang ang but-anan nga asawa magahulag nga may kaligdong bisan pa silahanon lang sang iya bana. 25 Ang maiyaiyahon nga babayi isa ka ido, apang ang babayi nga may dungog nagatahod sa Ginoo. 26 Ang asawa nga nagapasidungog sa iya bana ginatamod nga maalam, apang kon ginapakahuy-an niya sia sa iya pagkamatinaastaason, ang tagsatagsa makahibalo nga sia di-diosnon. Malipayon ang bana sang dungganon nga asawa, tungod kay magakabuhi sia sing pilo. 27 Ang magahod kag baba-an nga babayi pareho sang trumpeta nga nagatunog subong tanda sa pagsalakay, kag ang bisan sin-o nga lalaki nga may amo nga asawa magakabuhi sa pagpakig-away.
Nagapasubo nga mga Butang
28May duha ka butang nga nagapasubo sang akon tagipusoon,
kag may ikatlo nga nagapaakig sa akon:
ang isa ka soldado nga naganiwang tungod sang kaimulon,
ang maalam nga mga tawo nga ginatamay,
kag ang isa ka tawo nga nagabiya sang katarungan sa paghimo sing malain—
ang Ginoo magadala sa iya sa hinali nga kamatayon.
29Mabudlay sa isa ka negosyante ang paglikaw sa pagpakasala,
kag sa isa ka manugbaligya sa pagbinutig.
Currently Selected:
Sirac 26: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012