Sirac 25
25
Ang Mga Tawo nga Nagakabagay Dayawon
1May tatlo ka butang nga ginakalipayan sang akon kalag,
kag matahom man ini sa panulok sang Dios kag sang mga tawo:
ang paghilisugot sang mga mag-ulotod, ang pag-abyanay sang mga magkaingod,
kag ang pag-upod sing malipayon sang mag-asawa.
2May tatlo ka sahi sang mga tawo nga akon ginakaugtan,
nga ang ila pagginawi makailinit:
ang isa ka imol nga nagapabugal, ang isa ka manggaranon nga butigon,
kag ang isa ka tigulang nga buangbuang nga nagapanginbabayi.
Mga Tigulang
3Kon wala ka sing nakuha nga kaalam sang pamatan-on pa ikaw,
paano ang pag-angkon mo sini kon tigulang ka na?
4Sa pagkatahom sini: ang husto nga paghukom yara sa mga ubanon
kag ang maalam nga laygay nagagikan sa mga tigulang!
5Sa pagkatahom sini: nagakabagay ang kaalam sa mga tigulang,
kag ang nagakaigo nga laygay sa bantog nga mga tawo!
6Ang malawig nga inagihan amo ang korona sang tigulang nga mga tawo,
kag ang ila bugal amo ang ila pagtahod sa Ginoo.
7May siyam ka mga tawo nga akon ginakabig nga malipayon,
kag may ika-10 nga sarang ko masugid:
ang isa ka tawo nga may kalipay sa iya mga kabataan,
ang isa nga nakakita sang pagkapukan sang iya mga kaaway samtang buhi pa sia;
8malipayon ang bana nga may mahinangpanon nga asawa;
ang mangungoma nga wala nagagamit sang baka kag sang asno nga mag-updanay sa pag-arado;
ang tawo nga ang iya dila wala gid nagapakasala;
ang tawo nga wala makaalagad sa tawo nga kubos pa sa iya;
9malipayon ang tawo nga nakaangkon sing maayo nga paghangop
kag may nagapamati sing maayo sa iya ginasiling kon sia maghambal;
10daw ano ka gamhanan ang tawo nga nakaangkon sing kaalam;
pero wala na sing maglabaw pa sang sa isa ka tawo nga nagatahod sa Ginoo.
11Ang pagtahod sa Ginoo labaw sa tanan,
sin-o bala ang makatupong sa tawo nga nakaangkon sini?#25:11 Ang iban nga mga manuskrito nagadugang sang bersikulo 12: Ang pagtahod sa Ginoo amo ang una nga tikang padulong sa paghigugma sa iya, kag ang pagtuo amo ang una nga tikang padulong sa pagkamainunongon sa iya.
Laygay sa mga Babayi
13Wala na sing mahapdi nga pilas, sang sa pilas sa tagipusoon!
Wala na sing malain nga kalautan, sang sa kalautan sang isa ka babayi!
14Wala na sing malain nga pag-antos, sang sa pag-antos gikan sa pagdumot!
Wala na sing malain nga pagtimalos kundi ang pagtimalos sang kaaway!
15Wala na sing malain nga dalit sang sa dalit sang isa ka man-og,
kag wala na sing malain nga kaakig sang sa kaakig sang kaaway.#25:15 kaaway: Ang iban nga dumaan nga mga pagbadbad babayi.
16Mas maayo pa nga mag-estar ako upod sa leon kag dragon
sang sa magpuyo upod sa isa ka malaut nga asawa.
17Ang kalaut sang babayi nagabalhin sang iya hitsura,
nga kon tan-awon sia daw pareho sang isa ka mapintas nga oso.
18Kon ang iya bana nagakadto sa ila kaingod agod makakaon
indi sia makapugong sang iya mapait nga pagpanghayhay.
19Wala na sing mas malain pa sang sa kalain sang isa ka babayi.
Kabay nga ang madangatan sang isa ka makasasala madangatan man niya!
20Subong sang isa ka bakulod nga balas nga pagataklaron sang tigulang nga tawo,
amo man ang isa ka palawakal nga asawa sa isa ka mabuot nga bana.
21Indi ka magpadaladala sa katahom sang isa ka babayi
ukon maghandom sa iya.
22Kon ang isa ka bana ginasagod sang iya asawa
magapaabot sia nga akigan, insultohan, kag pakahuy-an.
23Ang malaut nga asawa nagadala sa iya bana sang kahuloy-an,
sang kaluyahon, kag sang masakit nga balatyagon.
Maluya ang mga kamot kag nagakurog ang mga tuhod
sang isa ka bana nga ang iya asawa wala nagalipay sa iya.
24Ang babayi amo ang ginsugoran sang sala,
kag tungod sa iya tanan kita magakalamatay.
25Indi pagbayai ang isa ka sulodlan sang tubig nga nagatubod,
kag indi mo pagpabay-an ang isa ka malaut nga asawa sa paghambal sang iya luyag.
26Kon indi sia magtuman sa imo suno sa imo ginasiling sa iya,
bulagi sia, kag palakta.
Currently Selected:
Sirac 25: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012