Sirac 24
24
Sa Pagdayaw sang Kaalam
1Ang Kaalam nagahambal sang iya kaugalingon nga pagdayaw,
sa tunga sang iya mga tawo nagapabugal sia sang iya kaugalingon.
2Sa atubang sang katilingban sang Labing Mataas nagahambal sia,
kag nagapabugal sia sang iya kaugalingon sa presensya sang Isa nga Gamhanan.
3“Ako amo ang pulong nga ginhambal sang Labing Mataas.
Ako amo ang nagtabon sang duta kaangay sang tun-og.
4Ang#Exo. 33:9-10. akon balay amo ang mataas nga kalangitan,
kag ang akon trono yara sa haligi nga panganod.
5Ako lang ang naglatid sang langit,
kag naglakat sa kadadalman sang duta.
6Ang mga balod sa kadagatan, ang bug-os nga duta,
ang tanan nga mga katawhan kag ang tagsa ka pungsod akon ginagamhan.
7Sa tunga nila nagapangita ako sing ilistaran,
sa kay sin-o bala duta ako magaestar?
8Dayon ang Manunuga sang kalibutan nagmando sa akon,
ang akon Manunuga nagsugo kon diin ako magaestar.
Nagsiling sia, ‘Mag-estar ka sa kay Jacob,
himua ang Israel nga imo panublion.’
9Sa wala pa magsugod ang panahon gintuga niya ako,
kag ako magapabilin sa walay katapusan.
10Sa Balaan nga Tolda nagaalagad ako sa iya atubang,
gani nag-abot ako agod mag-estar sa Sion.
11Gani ginpaestar niya ako sa siudad nga iya ginhigugma,
kag ginhatagan ako sing awtoridad sa paggahom sang Jerusalem.
12Magpanggamot ako sa tunga sang mga tawo nga ginpasidunggan,
sa pinili sang Ginoo nga mangin-iya kaugalingon.
13Didto nagtaas ako kaangay sang sedro sa Libano,
kaangay sang sipres sa Bukid sang Hermon.
14Nagtaas ako kaangay sang palma sa Engedi,
kag kaangay sang tanom nga rosas sa Jerico,
kaangay sang matahom nga kahoy nga olivo sa patag,
kaangay sang kahoy nga kastanyo sa tupad sang tubig nagtaas ako.
15Kaangay sang sinamon kag pinili nga mira nagapangamyon ako sa kahumot,
nagapangalisbong ang akon kahumot
kaangay sang galbano, onika, kag estakte,
kaangay sang aso sang insyenso sa Balaan nga Tolda.
16Kaangay sang kahoy nga terebinto nagagapa ang akon mga sanga,
kag ang akon mga sanga matahom kag nagalubaylubay.
17Magapanalingsing ako sing matahom kaangay sang balagon sang mga ubas,
kag ang akon mga bulak nagapatubas sang manggad kag sang kadungganan.#24:17 Ang iban nga mga manuskrito nagadugang sang bersikulo 18: Ako ang iloy sang matahom nga paghigugma, sang kahadlok, kaalam, kag balaan nga paglaom. Tungod kay ako walay katapusan, ginhatag ako sa tanan ko nga mga anak, nga ginhingalanan niya.
19Dali kamo sa akon, kamo nga nagahandom sa akon,
kag magpaayaw kaon sang akon mga bunga.
20Ang akon handumanan mas matam-is pa sang sa dugos.
Ang pag-angkon sa akon mas matam-is pa sang sa dugos nga nagatulo sa balayan sang dugos.
21Ang nagakaon sa akon magahandom sing dugang pa.
Ang bisan sin-o nga makainom sa akon pagauhawon sing dugang pa.
22Ang nagapamati sa akon indi na kinahanglan magkahuya,
ang nagatuman sang akon ginasiling indi na gid magpakasala.”
Ang Kaalam kag ang Kasugoan
23Ini tanan amo ang libro sang kasugtanan sang Dios nga Labing Mataas,
ang Kasugoan nga ginhatag ni Moises
subong panublion nga pagatumanon sang mga katilingban ni Jacob.#24:23 Ang iban nga mga manuskrito nagadugang sang bersikulo 24: Magmalig-on sa Ginoo sa gihapon, magpabilin sa iya, agod nga palig-unon ka niya. Wala sing iban nga Dios luas sa Ginoo nga Makagagahom, kag wala sing iban nga manluluwas kundi sia lamang.
25Nagpadala sia sing Kaalam kaangay sang nagadaganas nga baha sang suba sang Pison,
kag kaangay sang Tigris sa tion sang nahauna nga pagpamunga.
26Nagaawas ini sa ihibalo kaangay sang Eufrates,
ukon kaangay sang Jordan sa tion sang tig-alani.
27Nagapailig ini sang pagtudlo kaangay sang Nilo,
kaangay sang Gihon sa panahon sang pagpatubas sang mga ubas.
28Ang nahauna nga tawo wala makahibalo sing bug-os sang kaalam,
ang naulihi wala man makatungkad sa iya.
29Kay ang iya mga panghunahuna mas malapad pa sang sa kadagatan,
kag ang iya tinutuyo madalom pa sang sa daku nga kadadalman.
30Ako iya kaangay sang isa ka kanal halin sa suba,
isa ka alagyan sang tubig pakadto sa hardin.
31Nagsiling ako, “Bunyagan ko ang akon hardin,
bas-on ko ang ginatuboan sang akon mga bulak.”
Kag sa gilayon ang akon kanal nangin-isa ka suba
kag ang akon suba nangin-isa ka dagat.
32Karon pasilakon ko ang pagdisiplina,
agod ang iya kapawa makita sa malayo.
33Ibubo ko liwat ang pagtudlo kaangay sang isa ka propeta,
kag ibilin ko ini sa palaabuton nga mga kaliwatan.
34Talupangda gid nga ang akon pagpangabudlay indi lamang para sa akon kaugalingon
kundi para sa nagapangita sang Kaalam.
Currently Selected:
Sirac 24: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012