Sirac 23
23
1O Ginoo, Amay kag Manugdumala sang akon kabuhi,
indi ako pagpabay-i sa gahom sang akon mga bibig,
kag indi pag-itugot nga mapukan ako tungod sa ila.
2Sin-o ang maghanda sang bilugon sang kaalam sa pagtuytoy sang akon painuino
kag pagdisiplina sang akon panghunahuna,
nga wala sing kaluoy sa akon mga sayop
ukon nagapahanugot sang akon mga sala?
3Dayon ang akon mga sayop indi magdamo
kag indi magdugang ang akon mga sala,
kag indi ako mapukan sa atubang sang akon mga kaaway
kag indi mahatagan sing kahigayunan ang akon mga kaaway sa pagyaguta sa akon.
4O Ginoo, Amay kag Dios sang akon kabuhi,
indi pagtugoti nga may matinaastaason ako nga panulok.
5Apini ako nga indi madaog sang malaut nga balatyagon.
6Indi pag-itugot nga ang kahakog kag kailigbon maggahom sa akon.
kag indi ako pag-itugyan sa gahom sang makahuloya nga balatyagon.
Mga Pagpanumpa
7Pamatii, mga anak ko, ang pagtudlo nga akon ihatag,
ang nagatuman sini indi madakpan.
8Paagi sa iya kaugalingon nga dila masiod ang makasasala,
ang abusador kag ang bugalon nga tawo madakpan sini.
9Indi#Mat. 5:34; San. 5:12. pagpaanara ang imo baba sa pagsumpa,
kag indi ka magpaanad sa paghinambit sang ngalan sang Balaan nga Dios.
10Subong nga ang ulipon nga pirme lang ginahanot,
indi hilway sa mga labod,
amo man ang tawo nga pirme lang nagapanumpa, kag ang Balaan nga Ngalan yara pirme sa iya baba,
indi hilway sa sala.
11Ang tawo nga naanad sa panumpa napun-an sang sala,
ang pag-antos indi gid maghalin sa iya balay.
Kon makasala sia, manabat sia.
Kon magsumpa sia sing lahuglahog doble ang iya pagpakasala,
kon ang iya panumpa indi matuod, indi sia mapatawad,
kag ang iya balay mapun-an sing kagamo.
Binastos nga Hambal
12May yara nga paghambal nga ang iya timbang kamatayon,
kabay nga indi ini makita sa mga kaliwat ni Jacob!
Ang nagatahod sa Dios nagapahilayo sa sini nga pagginawi
kag wala nagalumoylumoy sa sala.
13Indi ka magpaanad sa hambal nga masakit kag binastos,
kay ini nagakahulogan sang malaut nga hambal.
14Dumdoma ang imo amay kag ang iloy
kon magpungko ka upod sa mga gamhanan nga mga tawo,
kay basi malimtan mo ang imo kaugalingon sa ila atubang
kag tungod sang imo pagbinatasan makahimo ka sang binuang nga mga butang.
Dayon handumon mo nga kuntani wala ka na lang matawo,
kag pakamalauton mo ang adlaw sang imo pagkatawo.
15Ang tawo nga naanad sa malaut nga hambal,
indi gid makatuon sing maayo tubtob nagakabuhi sia.
Mga Sala sang Kailigbon
16Duha ka sahi sang tawo ang nagapadayon sa pagpakasala,
kag ang ikatlo nagadala sing silot sa iya kaugalingon:
ang mainit nga kailigbon nga nagadabdab kaangay sang kalayo,
indi gid mapalong tubtob malaglag ang kabuhi;
ang isa ka tawo nga ang iya bug-os nga lawas natugyan sa kailigbon,
indi gid mag-untat tubtob masunog sia sang kalayo;
17sa makihilawason nga tawo, ang tanan nga pagkaon manamit,
kag wala sia ginatak-i tubtob mapatay sia.
18Ang tawo nga nagaluib sang iya asawa
nagasiling sa iya kaugalingon, “Sin-o bala ang makakita sa akon?
Ang tanan madulom sa palibot ko kag ang mga dingding nagalipod sa akon,
wala sing may makakita sa akon, ngaa magpalibog ako?
Ang Labing Mataas indi magsapak sang akon mga sala.”
19Ang iya lamang ginakahadlukan amo ang mga mata sang mga tawo,
nalimtan niya nga ang mga mata sang Ginoo
mas masanag pa sing dies mil ka pilo sang sa adlaw
nga nagatalupangod sang tagsa ka hulag sang tawo
kag nakakita sang labing sekrito nga mga lugar.
20Sa wala pa matuga ang kalibutan, nahibal-an na niya ang tanan,
kag amo man sa tapos ini mahuman.
21Ini nga tawo magabayad sang silot sa atubang sang mga tawo,
kag madakpan sia sa diin wala gid niya ginapaabot.
22Amo man ang babayi nga nagaluib sa iya bana,
nga nagahatag sa iya sing anak sa lain nga amay.
23Nahauna, ginlapas niya ang Kasugoan sang Labing Mataas,
ikaduha, nagluib sia batok sa iya bana,
ikatlo, nanginmalain sia nga babayi sa pagpanginlalaki,
paagi sa pagbata sang mga kaanakan nga unon.
24Dalhon sia sa atubang sang katilingban,
kag ang iya mga kabataan magaantos tungod sang iya sala.
25Ang iya mga kabataan indi magpanggamot
kag indi magpamunga ang iya mga sanga.
26Ang pagpakamalaut magapabilin sa iya panumdoman,
kag ang iya kahuloy-an indi gid mapanas.
27Ang tanan nga mabilin sa iya nga buhi
makatuon nga wala sing maayo kundi ang pagtahod sa Ginoo,
kag wala sing mas matam-is pa sang sa pagtuman sang iya mga kasugoan.
Currently Selected:
Sirac 23: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012