Sirac 22
22
Ang Katamad kag ang Kabuangan
1Ang matamad kaangay sang isa ka bato nga nabulit sang higko,
kag ang tagsatagsa nagayaguta sang iya kahuloy-an.
2Ang matamad kaangay sang isa ka tinumpok nga ipot,
ang bisan sin-o nga makapudyot sini nagawaslik sini sa iya kamot.
3Makahuloya ang mangin-amay sang anak nga sutil,
labi na gid kon ini babayi.
4Ang maayo nga anak nga babayi malahalon sa iya bana
pero ang makahuloya nga anak nga babayi nagapakalisod sa iya amay.
5Ang wala sing huya nga anak nga babayi nagapakahuya sang iya amay kag sang iya iloy,
kag ginatamay nila sia.
6Ang hambal nga wala sa nagakaigo nga tion kaangay sang musika sa tion sang paglubong,
pero ang paghanot kag ang pagtadlong kaalam sa tanan nga tion.
7Ang pagtudlo sa isa ka buangbuang kaangay sang pagkaayo sang isa ka banga paagi sa pasta,
ukon kaangay sang pagpukaw sang isa ka palatulog sa iya mahamuok nga katulogon.
8Hatagi sing rason ang isa ka buangbuang, subong man ang isa ka tawo nga ginatuyo,
kag kon makatapos ka na, magasiling sia, “Ano gani ato?”#22:8 Ang iban nga mga manuskrito nagadugang sang mga bersikulo 9-10: Ang mga bata nga ginpadaku sing maayo wala nagapakita sang mapainuboson nga ginhalinan sang ila mga ginikanan. 10 Ang mga bata nga wala ginpadaku sing maayo, nga mga bugalon kag matinaastaason, kasubong sang isa ka mantsa sa maayo nga pamilya.
11Maglalaw ka sa patay tungod sang pagkadula sang iya kapawa,
maglalaw ka sa buangbuang tungod sang pagkadula sang iya kaalam.
Maghaganhagan sa imo paglalaw para sa patay tungod kay sia nagapahuway,
pero ang kabuhi sang isa ka buangbuang mas masubo pa sang sa kamatayon.
12Ang#Gen. 50:10; Jdt. 16:24. paglalaw para sa patay nagalawig sing pito ka adlaw,
pero ang pagpangalisod para sa isa ka buangbuang kag sa di-diosnon nagalawig sa bug-os nga kabuhi.
13Indi ka magpakighambal sing malawig sa isa ka buangbuang
ukon magduaw sa isa ka lukoluko nga tawo.
Mag-andam ka sa iya, agod makapalagyo ka sa gamo,
kag indi ka madagtaan paagi sa imo pag-upod sa iya.
Likawi sia kon luyag mo ang kalinong,
kag indi ka pagtak-an sang iya kabuangan.
14Ano ang mas mabug-at pa sang sa tingga?
Ano ang pagtawag sa sini kundi “Buangbuang”?
15Ang balas, ang asin, kag ang tinumpok nga salsalon
mas mahapos dalhon sang sa lukoluko nga tawo.
16Ang balayan nga kahoy nga nabutang sing malig-on sa isa ka balay,
indi magguba sang isa ka linog.
Amo man ang isa ka hunahuna nga ginpalig-on sang isa ka maalam nga laygay,
indi magaluya sa tion sang mga ital-ital.
17Ang panghunahuna nga napasad sing malig-on paagi sa maalam nga pagbinagbinag,
kaangay sang mapag-on kag matahom nga pader.
18Subong nga ang magagmay nga mga bato sa ibabaw sang pader
indi makabato batok sa hangin,
amo man ang isa ka panghunahuna nga ginapatalaw sang binuang nga balatyagon,
indi makabato batok sa kahadlok.
Pag-abyanay
19Tusloka ang mata kag magatulo ang luha,
tusloka ang tagipusoon kag magagwa ang iya ginabatyag.
20Habuya sing bato ang mga pispis kag magapalagyo sila,
tamaya ang imo amigo kag maguba ang inyo pag-amiguhay.
21Kon gintayaan mo sing espada ang isa ka abyan,
indi ka magdula sing paglaom, may paagi pa sa pagbalik.
22Kon ginsuay mo ang imo abyan,
indi ka magkahadlok, may kahigayunan pa kamo nga mag-ayuhay.
Pero ang pag-insulto, pagyaguta, pagsugid sang iya sekrito, pagbuno sa likod,
magapahilayo sang bisan sin-o nga abyan.
23Angkuna ang pagsalig sang imo kaingod samtang imol pa sia
agod makaambit ka sang kalipay sang iya pag-uswag.
Unongi sia sa tion sang kabudlayan
kag makapakig-ambit ka sa iya panublion.
24Subong nga ang horno nagadabdab kag ang aso nagauna sa kalayo,
amo man ang pag-insulto magaabot sa wala pa ang pagpatay.
25Indi ako magkahuya sa pag-apin sa akon abyan
kag indi ko sia pagtalikdan.
26Kon mahalitan ako tungod sa iya,
ang tagsatagsa nga makabati sini magaandam sa iya.
Pangamuyo Agod Buligan Batok sa Pagpakasala
27Sin-o ang magabutang sing gwardya sa akon baba,
kag sang selyo sang kaalam sa akon mga bibig,
agod indi ako mapukan
kag mapunggan ang akon dila sa paglaglag sa akon?
Currently Selected:
Sirac 22: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012