Sirac 21
21
Ang Nagakalainlain nga mga Sala
1Anak ko, nakasala ka bala? Indi na ini paghimua liwat,
kundi magpangayo ka sing kapatawaran tungod sang imo nagliligad nga mga kasal-anan.
2Maglikaw ka sa sala subong sang imo paglikaw sa man-og,
kay kon magpalapit ka, buntogon niya ikaw.
Ang iya mga ngipon kaangay sang mga ngipon sang leon
kag makalaglag ini sang kabuhi sang mga tawo.
3Ang tagsa ka paglapas sang kasugoan kaangay sang isa ka espada nga doble sing sulab,
nagapilas ini nga indi magpali.
4Ang pagkahadlok kag ang pagpamigos magadula sang mga manggad,
amo man ang bugalon nga tawo, madulaan sang iya mga pagkabutang.
5Ang#Sir. 35:17-19. Ginoo nagapamati sang pag-ampo sang imol nga tawo
kag ang iya paghukom nagaabot gilayon.
6Ang nagakaakig kon sawayon nagalakat sa dalanon sang mga makasasala
pero ang nagatahod sa Ginoo nagahinulsol sing maminatud-on.
7Ang palahambal mabantugan bisan diin,
pero kon magsala sia sa iya hambal mahibal-an ini sang maalam nga tawo.
8Ang pagpatindog sing balay sa hinulaman nga kwarta
kaangay sang nagatipon sing mga bato para sa imo kaugalingon nga lulobngan.#21:8 imo kaugalingon nga lulobngan: Sa iban nga mga manuskrito tigtulognaw.
9Ang pagtilipon sang malinapason nga mga tawo kaangay sang isa ka tinumpukan nga mga sagbot,
ang katapusan sini amo ang nagadabadaba nga kalayo.
10Ang alagyan sang mga makasasala gintapan kag ginpino nga dalan,
pero nagapadulong ini sa lulobngan.
Ang Kaalam kag ang Kabuangan
11Ang nagatuman sang Kasugoan nagapugong sang iya panghunahuna,
ang nagatahod sa Ginoo nagaangkon sing kaalam.
12Ang tawo nga indi maalam indi matudloan,
pero may kaalam nga makadugang sang kapaitan sang tawo.
13Ang ihibalo sang maalam nga tawo magadugang kaangay sang isa ka baha,
kag ang iya laygay kaangay sang tuboran nga nagaawas.
14Ang tagipusoon sang buangbuang kaangay sang banga nga nagatubod,
indi magpabilin sa iya ang iya tinun-an.
15Kon makabati ang may tinun-an nga tawo sang isa ka maalam nga hulobaton,
ginadayaw niya ini kag ginadugangan pa gid.
Kon mabatian ini sang isa ka buangbuang nga tawo,
ginakadlawan niya ini kag ginatalikdan.
16Ang pagpamati sa isa ka buangbuang kaangay sang nagapanglakaton nga may mabug-at nga karga,
pero may kalipay sa pagpamati sa hambal sang maalam nga tawo.
17Ang katilingban nagabaton sang hambal sang maalam nga tawo,
kag nagapamalandong sila sang iya ginasiling.
18Ang kaalam sang buangbuang, kaangay sang isa ka balay nga naguba,
ang iya ihibalo kaangay sang isa ka tumpok nga halambalanon nga wala niya mahangpan.
19Para sa buangbuang ang pagtuon kaangay sang mga kadena sa iya mga tiil,
kaangay sang posas sa iya tuo nga kamot.
20Ang buangbuang nagaharakhak sing tudotudo,
pero ang maalam nga tawo nagayuhom lang.
21Sa maalam nga tawo ang tinun-an kaangay sang isa ka bulawan nga adorno,
kaangay sang pulseras sa iya tuo nga butkon.
22Ang buangbuang nagaderetso sa pagsulod sa balay,
pero ang tawo nga may tinun-an nagahulat sing matinahuron.
23Ang harasharas nagasid-ing sa sulod sang balay paagi sa pwertahan,
samtang ang tawo nga may tinun-an nagahulat sa gwa.
24Indi maayo nga batasan ang pagpamati sa may pwertahan,
ang tawo nga may pinanilagan nahuya maghimo sini.
25Ang mga kutsokutsero nagasulit sang ginahambal sang iban,
pero ang mga maalam nagabinagbinag sang tagsa ka pulong.
26Ang mga hunahuna sang mga buangbuang mahibal-an sa ila ginahambal
ang mga ginahambal sang mga maalam nagapakita sang ila mga hunahuna.
27Kon ang di-diosnon nga tawo magpakamalaut sang iya kaaway,
ginapakamalaut niya ang iya kaugalingon.
28Ang kutsokutsero nagadagta sa iya kaugalingon,
kag tungod sini ginadumtan sia sang iya mga kaingod.
Currently Selected:
Sirac 21: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012