Sirac 20
20
Ang Paghibalo kon San-o ang Paghambal
1May pagsaway sa indi nagakaigo nga panahon,
kag may yara nga mahipos, pero may abtik.
2Pero labing maayo ang magreklamo sang sa maghupot sing dumot!
3Kag ang nagakilala sang iya sayop makaluwas sa kahuy-anan.
4Kaangay sang isa ka kapon nga luyag maghimulos sang isa ka lamharon nga babayi,
amo man ang isa ka tawo nga luyag magdaog sang iya kaso paagi sa pakusog.
5May tawo nga mahipos kag ginakilala nga maalam sia,
kag may yara nga ginakaugtan tungod sang iya pagkapalawakal.
6May tawo nga mahipos, tungod kay wala sia sing isabat,
pero may yara nga nagahipos, tungod kay nagahulat lamang sia sang nagakaigo nga tion sa paghambal.
7Ang maalam nga tawo nagahipos tubtob mag-abot ang nagakaigo nga tion,
pero ang palawakal nga buangbuang nagahukom sini sing di-nagakaigo.
8Ang palawakal nga tawo ginakaugtan sang iban,
kag ang nagapang-agaw sang hambal sang iban ginakangil-aran.
Ang Hinali nga Pagkambyo sang Hitabo
9Ang isa ka tawo kon kaisa may makuha nga kaayuhan sa mga pag-antos,
kag may yara nga maayo nga maabutan nga mangin-kapierdihan.
10May regalo nga wala gid sing pulos,
kag may regalo nga doble ang balos sa imo.
11Ang paghandom sing kadungganan mahimo nga magapadulong sa kahuloy-an,
pero may yara nga naggikan sa kaimulon kag nanginbantog.
12May yara nga tawo nga makaayo sing daku
pero nagabayad sini sing makapito ka pilo.
13Ang maalam nga tawo ginapakamahal bangod sa iya paghambal,
pero ang mga buangbuang nagapalapta sing mga pagdayaw nga wala sing pulos.
14Ang dulot halin sa isa ka buang indi makahatag sa imo sing kaayuhan,
pero nagapaabot sia sing balos nga makapito ka pilo.
15Diutay ang iya ginahatag, pero bugana manghikay,
daku pa ang iya baba sang sa mensahero sang banwa.
Nagapahulam sia karon nga adlaw kag manukot pagkaaga,
daw ano sa iya ka makangilil-ad!
16Ang buangbuang nagasiling, “Wala ako sing mga abyan,
wala gid ako ginapasalamati sa akon kaalwan,
bisan ginakaon nila ang akon kalan-on, malain pa ang ila hambal sa akon.”
17Ginakadlawan lang sia pirme sang madamo!
Ang Wala Nagakabagay nga Panghambal
18Mas maayo pa nga madanlog ka sa salog nga semento sang sa madanlog ang dila mo,
gani ang pagkapukan sang malauton nagaabot sa hinali lang.
19Ang isa ka bastos nga tawo kaangay sa isa ka istorya nga ginsugid sa indi nagakaigo nga tion,
nga pirme lang ginasaysay sang isa ka ignorante nga tawo.
20Ang isa ka hulobaton wala gid sing pulos kon ihambal sang isa ka buangbuang,
kay iya ini gamiton sa indi husto nga tion.
21May tawo nga bisan imol sia wala nagapakasala,
kag kon sia magpahuway, ang iya konsensya wala nagatublag sa iya.
22May tawo nga nagalaglag sang iya kaugalingon tungod sang indi nagakaigo nga pagkamahuloy-on,
ginalaglag niya ang iya kaugalingon tungod sang mga panghunahuna sang mga buangbuang.
23May tawo nga tungod sang indi nagakaigo nga kahuya, mapilitan magsaad sa isa ka abyan,
kag sa wala sing kabangdanan nangin-isa sia ka kaaway.
Pagbinutig
24Ang butig isa ka malaw-ay nga mansa sa ngalan sang isa ka tawo,
kag masunson ini ginahambal sang mga wala sing tinun-an.
25Mas maayo pa ang isa ka makawat sang sa isa ka tawo nga pirme nagabutig,
pero amo man nga kalaglagan ang maabtan nila nga duha.
26Ang pagbinutig isa ka makangilil-ad nga batasan,
ang kahuloy-an sini wala sing katapusan.
Ang Pagkatinugyanan sang Kaalam
27Nagadugang ang pag-uswag sang maalam nga tawo kon sia maghambal,
kag ang isa ka tawo nga may tinun-an naluyagan sang mga kadalagkuan.
28Ang tawo nga nagauma sang iya duta nagapatubas sing madamo,
kag ang nagalipay sang mga gamhanan nagabaton sing kapatawaran sa iya mga kasaypanan.
29Ang pag-amuma kag ang mga regalo nagabulag sang maalam nga mga tawo,
kaangay sang busal sa baba nga nagapahipos sang pagreklamo.
30Ang tinago nga kaalam kag ang manggad nga ginlubong,
ano bala ang pulos sini?
31Mas maayo pa ang tawo nga nagatago sang iya kabuangan
sang sa tawo nga nagatago sang iya kaalam.
Currently Selected:
Sirac 20: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012