Sirac 19
19
1Magginawi ka sing pareho sini kag indi ka gid magmanggaranon;
ang indi matinatapon sa magagmay nga mga butang nagapadulong sing amat-amat sa kalaglagan.
2Ang bino kag ang mga babayi nagakuha sang kaalam sang tawo,
kag ang nagagamit sang malain nga mga babayi nadulaan sang tanan nga huya.
3Ang pagkamudmod kag ang mga ulod magapanag-iya sa iya,
kag ang tawo nga wala sing huya madulaan sang iya kabuhi.
Batok sa Malain nga Hambal
4Ang nagasalig gilayon sa isa ka tawo nagapakita sang manabaw nga panghunahuna,
kag ang pagpakasala amo ang paghalit sang kaugalingon.
5Ang nagakalipay sa kalautan pagakondenahon.
6Pero ang kalaut wala sing gahom sa tawo nga nagadumot sang kutsokutso.
7Indi pag-ipanugid ang imo nabatian
kag indi ka mahalitan.
8Bisan sa abyan ukon sa kaaway indi ini pag-ipanugid,
luas kon nagapakasala ka sa imo indi pagpanugid sini.
9Mahimo nga mabatian niya ikaw, kag indi na sia magsalig sa imo,
kag sa ulihi pagadumtan ka niya.
10Nakabati ka bala sing kunokuno? Pauntata ini sa imo.
Indi ka magkahadlok! Indi ka sini maglupok!
11Ang buangbuang ginasakitan kaangay sa isa ka manugbata
kon sugiran sia sang isa ka sekrito.
12Kaangay sang isa ka baslay nga nagaungot sa paa,
amo man ang isa ka kunokuno sa tagipusoon sang buangbuang nga tawo.
Indi Pagsaligi ang Tanan Mo nga Nabatian
13Pamangkuta ang imo abyan sang kutsokutso nahanungod sa iya, basi wala man sia sing hinimuan,
kag kon nahimo gid man niya, indi na niya ini paghimuon liwat.
14Pamangkuta ang imo kaingod, basi wala man sia sing may ginhambal,
kag kon nakahambal gid man sia, indi na niya pag-ihambal ini liwat.
15Pamangkuta ang imo abyan, kay madamo ang nagakutsokutso,
indi pagpatihi ang tanan mo nga nabatian.
16Ang isa ka tawo, ayhan makatabinas, nga indi niya hungod ang iya ginasiling,
kag sin-o bala sa aton ang wala nagasala sa aton paghambal?
17Pamangkuta ang imo kaingod sa wala pa nimo sia mapahog,
itugyan ini sa Kasugoan sang Labing Mataas.#19:17 Ang iban nga mga manuskrito nagadugang sang mga bersikulo 17c-19: kag indi ka magkaakig. 18 Ang pagtahod sa Ginoo amo ang nahauna nga tikang padulong sa iya pagbaton sa imo, higugmaon ka niya kon ikaw maalam. 19 Tun-an mo ang mga sugo sang Ginoo. Ini ang pagtulon-an nga nagahatag sang kabuhi. Sila nga mga nagapahamuot sa iya nagakalipay sa pagkaon sang bunga sang kahoy sang pagkadi-mamalatyon.
Ang Matuod nga Kaalam
20Ang bug-os nga Kaalam amo ang pagtahod sa Ginoo,
kag nagalakip ini sa pagtuman sang Kasugoan,#19:20a Ang iban nga mga manuskrito nagadugang sang mga bersikulo 20b-21: kag kon ano ang kahulogan sang kaalam sang iya pagkamakagagahom. 21 Kon ang suloguon indi magsunod sa iya agalon, pero sa ulihi masunod man sa iya, ang agalon nagakaakig pa.
22Ang paghibalo sang kalautan indi kaalam,
kag wala sing kaayuhan sa laygay sang mga makasasala.
23May yara nga kaabtik nga makaulogot,
kag ang wala sing kaalam buangbuang.
24Mas maayo pa ang nagatahod sa Ginoo nga kulang sa ihibalo,
sang sa tama nga kaalam nga nagalapas sang Kasugoan.
25May mauti nga pagkaabtik nga nagapadulong sa pagkadi-matarong,
may mga tawo nga nagaabusar sang pagkaayo agod mapakamatarong sila.
26May tawo nga nagapaubos kag nagapangasubo,
pero ang iya tagipusoon puno sang pagdaya:
27ginatabunan niya ang iya guya kag nagapakunokuno nga indi makabati,
pero kon wala ka nagatan-aw, ginapamintahaan niya ikaw.
28Ayhan nagahunahuna sia nga indi sia makahimo sing malain,
pero magahimo sia sing malain kon may kahigayunan sia.
29Makilala mo ang tawo sa iya hitsura
kag mahibal-an mo kon maalam sia sa nahauna mo nga pagkakita sa iya.
30Ang pangbayu sang isa ka tawo nagapakilala kon ano ang iya obra,
kag ang iya panglakat kag pagkadlaw nagapahayag sang iya kinaugali.
Currently Selected:
Sirac 19: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012