Sirac 18
18
Ang Pagkagamhanan sang Dios
1Ang Ginoo nga nagakabuhi sa walay katapusan
amo ang manunuga sang bug-os nga kalibutan.
2Ang Ginoo lamang amo ang matarong.#18:2 Ang iban nga mga manuskrito nagadugang sang mga bersikulo 2b-3: kag wala na sing iban luas sa iya. 3 Iya ginatuytuyan ang kalibutan sang iya mga kamot kag ang tanan nagasunod sa iya. Sia ang hari sang tanan, kag ang iya gahom nagapahamulag sang balaan kag indi balaan.
4Wala sing tawo nga ginhatagan sing ikasarang
sa pagpahayag sang iya mga hinimuan.
5Sin-o bala ang makatungkad sang iya makatilingala nga mga binuhatan?
Wala sing makatakos sang iya daku nga gahom,
wala man sing makasugid sing bug-os sang tanan niya nga mga kaluoy.
6Wala sing makadugang ukon makabuhin sini,
wala sing makahangop sang mga kalatingalahan sang Ginoo.
7Kon ang tawo makatapos na, nagasugod pa lang sia,
kag kon mag-untat na sia, matingala pa gihapon sia.
Ang Pagkakubos sang Tawo
8Ano bala ang tawo kag ano bala ang iya pulos?
Ano bala ang kahulogan sang iya maayo ukon malain nga mga binuhatan?
9Ang labing malawig niya nga kabuhi isa lamang ka gatos ka tuig.
10Kon ipaanggid sa walay katapusan nga panahon,
ang iya pila lamang ka mga tinuig kaangay sang isa ka tulo nga tubig sa dagat
ukon isa ka bilog nga balas sa baybayon.
11Gani ang Ginoo mapainulobon sa ila,
nga nagapasagahay sang iya kaluoy sa ila.
12Nakita kag nahibaluan niya ang mabudlay nga palaabuton para sa ila,
kag tungod sini maalwan sia sa pagpatawad sa ila.
13Ang tawo magakaluoy sa iya lamang isigkatawo,
pero ang kaluoy sang Ginoo para sa tanan nga nagakabuhi nga tinuga.
Ginasaway niya, ginadisiplina, ginatudloan,
kag gindala sila pabalik subong sang isa ka manugbantay sang iya mga karnero.
14Nagakaluoy sia sa mga nagabaton sang iya pagdisiplina
kag nagatuman sing matutom sang iya mga sugo.
Ang Pagkaayo kag Pagkaalwan
15Anak ko, maghimo ka sing maayo nga wala na nagapanghikay,
indi pagdagtai ang imo kaalwan sang maparas nga mga pulong.
16Wala bala nagahatag sing kapahuwayan ang tun-og sa tama nga kainit?
Amo man ang pulong mas maayo pa sang sa isa ka dulot.
17Bisan ang malulo nga hambal sobra pa sang sa malahalon nga dulot,
pero sa maalwan nga tawo makita mo ini sila nga duha.
18Ang buangbuang wala sing mahatag kundi paghikay,
kag ang paghatag nga may paglangot nagapakurisong sang guya.
Pag-usisa sang Kaugalingon
19Magtuon ka anay sa wala pa ikaw maghambal,
kag amligi ang imo kaugalingon sa wala pa ikaw magmasakit.
20Usisaa ang imo kaugalingon sa wala pa ang paghukom,
kag mahilway ikaw sa tion sang pagpamatbat.
21Magpaubos ka sang imo kaugalingon sa wala pa ikaw magmasakit
kag maghinulsol ka kon ikaw makasala.
22Indi pagtugoti nga masablagan ang pagtuman sang imo mga panaad,
indi paghulata tubtob sa kamatayon ang pagtadlong sang tanan nga mga butang.
23Panghunahunai anay sing maayo sa wala pa ikaw maghimo sing panaad,
indi ka magsunod sa nagasulay sa Ginoo.
24Dumdoma ang kaakig nga nagahulat sa imo sa tion sang kamatayon,
kon mag-abot ang tion sang paghusay kag talikdan ka sang Ginoo.
25Sa tion sang kabuganaan dumdoma ang tion sang tiggulotom,
ang kaimulon kag ang kinawad-on sa adlaw sang kabuganaan.
26Sa tunga sang kaagahon kag sang kasisidmon may yara nga pagbalhin sang panahon.
Ang tanan nga pagbalhin nagaabot sing hinali kon ang Ginoo magbuot sini.
27Ang maalam nga tawo mainandamon sa tanan nga butang,
kon nagahimugasa ang sala nagahalong sia nga indi makasayop.
28Ang tagsa ka tawo nga may paghangop nagakilala sang kaalam,
kag nagatahod sa mga tawo nga nakaangkon sini.
29Ang nakahangop sang mga hulobaton nagatubo sa kaalam
kag nagagamit sini sing nagakaigo sa ila paghambal.
Ang Pagpugong sang Kaugalingon
30Indi ka magpadaladala sa imo mga kailigbon,
kundi punggi ang imo mga handom.
31Kon magpaayaw-ayaw ka sa imo mga handom,
mahimo ka nga kaladlawan sang imo mga kaaway.
32Indi ka magpaayaw-ayaw sa daku nga kasulhayan,
kay ini magadala sa imo sa tuman nga kaimulon.
33Indi paghimua ang imo kaugalingon nga isa ka manugpakilimos paagi sa pagpapunsyon nga inutangan,
pero wala sing unod ang imo bulsa.
Currently Selected:
Sirac 18: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012